Yolkej yejuan chipajkej niman yejuan xchipajkej ixpan Dios
11
ToTEKO okinots Moisés iuan Aarón,
niman okinmilij.
2 “Xkinmijlikan on israelitas ika de nochimej on yolkej yejuan nemij ipan in tlaltikpaktli,
san uelis kikuaskej
3 on yejuan tlakuechouaj niman istimaxaltikej.
4 Pero maka nenkinkuaskej in kenin yolkej maski tlakuechouaj noso istimajxaltikej:
’On camello,
pampa maski tlakuechoua,
xistimajxaltik.
Xkitakan ken sen yolki xchipauak.
5 ’On tejón,
pampa maski tlakuechoua,
xistimajxaltik.
Xkitakan ken sen yolki xchipauak.
6 ’On siutli,
pampa maski tlakuechoua,
xistimajxaltik.
Xkitakan ken sen yolki xchipauak.
7 ’On pitsotl xuelis nenkikuaskej pampa maski istimajxaltik,
xtlakuechoua.
Yejua ika,
in sen yolki xchipauak ixpan Dios.
8 ’Xuelis nenkinkuaskej in yolkej nion xuelis nenkinteloskej ijkuak yomikkej.
Xmatikan ika in yolkej xchipajkej ixpan Dios.
9 ’De nochi yolki yejuan nemi ipan atl,
tla ijtik mar noso ijtik río,
san uelis nenkuaskej yejuan kipiyaj inmastlakapaltsitsiuan niman intojtominyo.
10 Pero nochimej yejuan nemij ipan mar noso ipan río,
tla xkipiyaj inmastlakapaltsitsiuan niman intojtominyo,
xkintlajyelitakan maski uejueyimej noso pipitikej.
11 Maka nenkikuaskej innakayo nochi in kenimej yolkej.
Xkintlajyelitakan niman maka nenkinteloskej ijkuak yomikkej.
12 Nochi yolki yejuan nemi ipan atl,
tla xkipiya imastlakapaltsitsiuan nion itojtominyo,
xkintlajyelitakan.
13 ’De on totomej,
in yejuamej yejuan xuelis nenkinkuaskej,
yej xkintlajyelitakan:
On kuaktli,
on tototl itoka quebrantahueso,
on kuaktli yejuan chanti itech atl,
14 on tototl itoka milano,
niman nochi kech totomej nemij yejuan imintoka halcones,
15 nochi kech kakalotl nemi,
16 on ueyi tototl itoka avestruz,
on pajpaktekolotl,
on tototl yejuan istak itoka gaviota,
nochi kech tojtli nemi,
17 on tekolotl,
on tototl itoka cormorán,
on tototl itoka cisne yejuan kuaporontik,
18 on cisne istak,
on tototl itoka pelícano,
on tsojpilotl,
19 on garzas,
on cigüeña,
on abubilla,
niman on tsinakamej.
20 ’Nochimej yolkatsitsimej yejuan patlanij niman nejnemij xkintlajyelitakan.
21 Pero nemij sekimej yolkatsitsimej yejuan uelis nenkinkuaskej maski patlanij niman nejnemij.
Tla ipan iminmetskojyo kipiyaj iminikxiuan yejuan kimpaleuiya para tsikuinij,
kemaj uelis nenkinkuaskej.
22 In yejuamej yejuan uelis nenkinkuaskej:
nochi sesentlamantikej chapolimej,
chauamej,
xojkaltsitsimej,
niman tapachichimej.
23 Pero nochi on sekimej yolkatsitsimej yejuan patlanij niman nejnemij,
xkintlajyelitikan.
24 ’Yejua ika,
in nemejuamej xnenchipajkej yeskej ixpan Dios:
“Tla yakaj kinteloua inmikatlakayo semej in yolkej,
xchipauak yeskej ixpan Dios nochi on tonajli hasta tlapoyajkan.
25 ’Niman tla yakaj kajkokuis inmikatlakayo semej in yolkej,
noneki kipakas itlaken niman yejua xchipauak yes ixpan Dios nochi on tonajli hasta tlapoyajkan.
26 ’Nochi on yolki yejuan xistimaxaltik niman xtlakuechoua,
xchipauak yes para nemejuamej.
San akinon yejuan kimatokas no xok chipauak yes ixpan Dios.
27 ’No ijki,
san katlejua yolki yejuan kipiya naui ikxi,
niman ika nomatlakechijtiu ijkuak nejnemi,
xmatikan ika xchipauak ixpan Dios.
Niman tla yakaj kitelos inmikatlakayo semej in yolkej nokauas xchipauak ixpan Dios nochi on tonajli hasta tlapoyajkan.
28 No ijki,
ijkuak yakaj kajkokuis inmikatlakayo semej in yolkej,
noneki kipakas itlaken.
Yejua nokauas xchipauak ixpan Dios nochi on tonajli hasta tlapoyajkan.
Noneki nenkintaskej ika in yolkej xchipajkej ixpan Dios.
29 ’In yolkej yejuan noteuilanaj ipan tlajli,
yejuamej xkuajli nenkinkuaskej:
on yolki itoka comadreja,
kemichimej,
niman nochi on tlen noteuilana,
30 ken tlalkonetl,
on yolkej intoka cocodrilos,
aketspalimej,
techijchikomej,
tepaximej niman tlalkokonej.
31 ’De nochi on miyek yolki yejuan noteuilanaj ipan tlajli,
xmatikan ika xchipajkej ixpan Dios.
Tla yakaj kitelos inmikatlakayo semej in yolkej,
nokauas xchipauak ixpan Dios nochi on tonajli hasta tlapoyajkan.
32 ’Tla imikatlakayo sen yolki uetsi ipan itlaj,
on tlin ipan ouets xok chipauak yes ixpan Dios.
Uelis itlaj tlachijchijtli de kojtli,
noso sen tlakentli*,
noso itlaj tlachijchijtli de kuetlaxtli,
noso sen costal,
noso san tlinon yejuan yakaj ika tekiti.
Nonekis nenkapolaktiskej niman xok chipauak yes nochi on tonajli hasta tlapoyajkan.
Sakin,
nokauas chipauak ixpan Dios.
33 ’Niman tla on yolki yejuan yomik onuetsis ipan sen akontli tlachijchijtli ika tlalajmojli,
nochi on tlen onkaj ijtik xok chipauak yes,
niman on kontli nenkitlajtlapanaskej.
34 Tla on atl yejuan onkaj ipan on akontli toyaui ipan san katlejua tlakuajli,
on tlakuajli xok chipauak yes.
Niman san tlinon yejuan nooni tla onkaj ijtik on akontli,
no xchipauak yes ixpan Dios.
35 San tlinon yejuan ipan uetsis semej on yolkej yejuan yomikkej,
xok chipauak yes.
Tla uetsis ipan sen horno noso ipan sen tliko,
noneki nenkixoxotoniskej.
Xmatikan ika xchipauak niman nochipa ijki noneki nenkitaskej ken xchipauak ixpan Dios.
36 ’Niman tla yej on yolki onuetsis ipan sen amejli noso ipan sen atlaltekontli*,
on atl sanken* chipauak yes ixpan Dios.
Pero yejuan kitelos on yolki yejuan yomik,
xok chipauak yes ixpan Dios.
37 ’Niman tla on yolki yejuan yomik uetsis ipan itlaj xinachtli yejuan kajtikatkaj para kitôkaskej,
on xinachtli sanken* chipauak yes ixpan Dios.
38 Pero tla on xinachtli yokipatsojkej,
niman tla on yolki yejuan yomik uetsis ipan,
xok chipauak yes ixpan Dios.
39 ’Tla sen yolki yejuan nenkajtikatkaj para nenkuaskej,
pero on yolki miki,
maka nenkiteloskej.
Tla yakaj kitelos,
nokauas xchipauak ixpan Dios nochi on tonajli hasta tlapoyajkan.
40 Tla yakaj kikuas inakayo noso kiktis on yolki,
noneki kipakas itlaken,
niman nokauas xchipauak nochi on tonajli hasta tlapoyajkan.
41 ’Maka nenkuaskej nion sen yolki yejuan noteuilana ipan tlajli,
pampa on yolki tetlajyeloj*.
42 ’Nochi kech yolki yejuan noteuilana ipan tlajli ika iyelpan,
noso tla nejnemi ika naui ikxi,
noso ika miyek ikxiuan,
maka nenkuaskej,
pampa on yolkej tetlajyelojkej.
43 Ijkon tej,
maka xmijtlakokan ixpan Dios ika on yolkej yejuan noteuilanaj,
44 pampa nejua ninemoTEKO Dios.
Nemejuamej noneki nenchipajkanemiskej nixpan,
pampa nejua nemoDios niyektli.
45 Nejua nemoTEKO,
yejuan onemechkixtij Egipto para ninochiuas nemoDios.
Aman tej,
xchipajkanemikan nixpan,
pampa nejua nemoDios niyektli.”
46 In yejuamej leyes,
para nenkimatiskej de on yolkej,
on totomej,
niman nochimej yejuan nemij ipan atl,
niman nochimej yejuan noteuilanaj ipan tlajli.
47 In leyes mechpaleuis para nenkimatiskej katlejua yolki yejuan chipauak niman yejuan xchipauak nixpan.
Niman no mechpaleuis para nenkimatiskej katlejua yolki uelis nenkuaskej niman katlejua xuelis nenkuaskej.