Nadab niman Abiú otlajtlakojkej
10
Nadab niman Abiú,
itelpochuan Aarón,
cada se okikuik ipopochkon,
niman ipan okitlalijkej tlixochtli iuan xkuajli kopajli.
Kemaj okitlatijkej ixpan toTEKO,
pero yejuamej okitlatijkej sen popochtli* yejuan Dios xokinnauatij.
2 Yejua ika,
toTEKO okuajtitlan tlitl,
niman okintlatij.
Ijkon omikkej ixpan toTEKO.
3 Kemaj Moisés okijlij Aarón
—In yejua kinekiya techijlis toTEKO ijkuak okijtoj:
“Nochimej on yejuan uajlauij notech nikintitis ika sanoyej niyektli.”
Niman ijkon nochimej on israelitas nikintitis noueyilis.
Niman Aarón xonauat.
4 Kemaj Moisés okonots Misael niman Elzafán,
itelpochuan Uziel,
yejuan itioj Aarón,
niman okinmijlij
—Xuajlakan.
Xkinkixtikan ijtik in tabernáculo* iminmikatlalnakayo nemoprimos,
niman xkinkauatij ikiauak on campamento.
5 Yejuamej ouajlakej niman okinuikakej,
sanken* ika imintiopixkatlaken yejuan más ueyak,
niman okinkauatoj ikiauak on campamento ijkon ken Moisés okinnauatij.
Kenijki nouikaskej on tiopixkej
6 Kemaj Moisés okinmijlij Aarón niman itelpochuan yejuan imintoka katka Eleazar niman Itamar
—Maka xmokuatepajsolokan,
nion maka xtsayanakan nemotlaken para nesis ika nenmajmanaj impampa on telpokamej tiopixkej yejuan omikkej ikuak toTEKO okuajtitlan on tlitl.
Tlamo,
no nenmikiskej niman Dios sanoyej kualanis intech nochimej on israelitas.
Pero on israelitas,
kemaj nochimej ueliskej najmanaskej ipampa on tlitl yejuan toTEKO okuajtitlan.
7 Niman no maka nenmejkuaniskej ne kampa ikalakiyan on tabernáculo* kampa nemi Dios para xnenmikiskej,
pampa nemejuamej nentlatiochijtin ikan iaceite toTEKO yejuan tlatiochijtli.
Niman okichijkej nochi ken okinnauatij Moisés.
8 No ijki,
toTEKO okinots Aarón niman okijlij:
9 “Ijkuak tejua noso motelpochuan nenkalakiskej ipan on tabernáculo* kampa nejua ninemi,
maka nenkoniskej vino noso san tlinon yejuan tetlauantia para maka nenmikiskej.
In sen ley yejuan nochipa onyas para nochimej on tatajtin niman iminuejkakoneuan,
10 para ijki nemejuamej nenkixmatiskej tlinon tlatiochijtli niman tlinon xtlatiochijtli,
tlinon chipauak niman tlinon xchipauak nixpan nejua nemoTEKO.
11 Niman nemejuamej ika onkaj nenkinmachistiskej on israelitas,
nochi in leyes yejuan nejua nemoTEKO nemechmaka itechkopa Moisés.”
12 Kemaj Moisés okimilij Aarón niman Eleazar iuan Itamar on omemej itelpochuan Aarón yejuan xomikkej:
—Xkuikan on trigo niman cebada yejuan onokau de on uentli yejuan tlatla ixpan toTEKO,
niman ika on trigo niman cebada xchijchiuakan pan yejuan xkipiya tlaxokolilistli*.
Kemaj xkuakan nisiu on tlaixpan*,
pampa in uentli sanoyej tlatiochijtli.
13 Tejua niman motelpochuan xkuakan kampa tlayekkan,
pampa on uentli yejuan kintlatiaj ixpan toTEKO nemoyaxka*.
Ijkon toTEKO onechnauatij ma nemechijli.
14 Niman iyelpannakayo on yolki yejuan nenkooliniaj ixpan toTEKO niman on imetskojyo yejuan no nemoyaxka* yes,
noneki nenkuaskej kampa tlayekkan.
Tejua,
motelpochuan niman mochpochuan nenkikuaskej,
pampa on yejua nemoyaxka* yejuan kisa itech on uentli para yoltlalilistli de on israelitas.
15 Imetskojyo on yolki yejuan ika nenkitlaxtlauiliaj Dios,
niman iyelpannakayo yejuan kooliniaj,
kiktiskej ixpan toTEKO pampa kinuentlaliskej ken on uentli yejuan tlaoolinijli san sekan iuan on chauak yejuan kiuentlaliaj para tlatla.
Yejua in parte nochipa moyaxka* yes iuan mokoneuan ijkon ken toTEKO yotlanauatij.
16 Kemaj Moisés otetlajtoltij kanon nemi on chivo yejuan okitemakakej para uentli ipampa tlajtlakojli.
Niman ijkuak okimat ika yokitlatijkej,
sanoyej okualan itechkopa Eleazar niman Itamar,
on omemej itelpochuan Aarón yejuan xomikkej.
Niman okintlajtoltij:
17 —¿Tline* xonenkuajkej on uentli yejuan notemaka ipampa tlajtlakojli ne tlatiochikan nisiu on tabernáculo?
On uentli sanoyej yektli,
niman toTEKO omechmakak para nenkinkixtiliskej imintlajtlakol on israelitas,
niman ijki toTEKO kintlapojpoluilis imintlajtlakoluan.
18 Pampa xonenkiktikej on iyesyo ijtik on tabernáculo,
nonekiya nenkuaskiaj on uentli kampa tlayekkan ijkon ken nejua onemechnauatij.
19 Niman Aarón okinankilij:
—Xkita,
aman yejuamej yokitemakakej iminuen para imintlajtlakol niman iminuen yejuan otlatlak ixpan toTEKO.
Niman ijkon ken nopan yonochiu ika inmikilis notelpochuan,
tla ijkon tej,
tla aman nejua nikuaskia on uentli ipampa tlajtlakojli,
¿tiknemilia kipaktiskia toTEKO?
20 Niman ijkuak Moisés ijkin okak,
onoyoltlalij.