On tiopixkej okipeualtijkej imintekiu
9
Ipan chikueyi tonajli,
Moisés okinots Aarón niman itelpochuan inmiuan on tlakamej uejueyixtokej intech on israelitas.
2 Niman okijlij Aarón:
“Xkuika sen becerro para uentli ipampa tlajtlakojli,
niman sen borrego para on uentli yejuan nochi tlatla.
In omemej yolkej yejuan xkanaj tlakokoltin ipan intlakayo,
xkinuika ixpan toTEKO.
3 On israelitas xkinmijli ma kuikakan sen chivo para kiuentiskej ipampa tlajtlakojli.
No ijki,
ma kuikakan sen becerro niman sen borreguito yejuan se xijkayomej,
niman yejuan xkanaj tlakokoltin impan intlakayo.
In yolkej yeskej para on uentli yejuan nochi tlatla.
4 Niman no ma kuikakan sen okichuakax niman sen borrego para kinmiktiskej ixpan toTEKO para sen uentli de yoltlalilistli.
No ijki,
ma kuajkikan sen uentli de trigo noso cebada yejuan tlanelojli iuan aceite,
pampa aman toTEKO mechajnotitis.”
5 On israelitas okiktikej on tlen Moisés okinnauatij ixpan on tabernáculo* kampa nemi Dios.
Niman nochimej on israelitas ononisiuijkej niman ijkayaj ixpan toTEKO.
6 Kemaj Moisés okinmijlij:
“In yejua on tlen toTEKO yotlanauatij.
Xchiuakan,
niman toTEKO mechnotitis ika sanoyej kualtsin iueyilis”.
7 Kemaj Moisés okijli Aarón:
“Xmonisiui ne tlaixpan*,
niman xmaktili toTEKO on uentli ipampa tlajtlakojli,
niman on yolki yejuan tiktemakas ken uentli yejuan nochi tlatla niman yejuan ika mitstlapojpoluiliskej motlajtlakoluan niman imintlajtlakoluan mofamiliasa.
Niman no xtlali iminuen on israelitas ken sen uentli para kintlapojpoluilia intlajtlakol ijkon ken toTEKO otlanauatij.”
8 Aarón okinisiuij on tlaixpan* niman okechkoyonij on becerro yejuan okiuentlalij para sen uentli ipampa itlajtlakoluan.
9 Kemaj itelpochuan okimakakej on yestli.
Niman Aarón okipatsoj imajpiluan ipan on yestli niman okinmalauilij ipan on ken itlaj ikuakuautsitsiuan on tlaixpan*.
Niman on yestli yejuan onokau,
okitotoyau itsintlan on tlaixpan*.
10 Kemaj okitlatij ipan on tlaixpan* on ichajka,
iriontsitsiuan,
niman ichajka iyeltapach on yolki yejuan okiuentlalij para sen uentli ipampa tlajtlakojli ijkon ken toTEKO okinauatij Moisés.
11 Pero inakayo on yolki niman ikuetlaxyo* okintlatij ikiauak on campamento.
12 Aarón no okechkoyonij on yolki yejuan okitemakak para uentli yejuan nochi tlatla.
Niman itelpochuan okimakakej on yestli,
niman okajuichij inajnakastlan on tlaixpan*.
13 Kemaj okiktilijkej itsontekon niman on nakatlatejtektli de on yolki yejuan okitemakakej para uentli yejuan tlatlas,
niman Aarón okintlatij ipan on tlaixpan*.
14 Kemaj okipajpak on tlajtlamach* yejuan kipiya ijtik on yolki,
niman imetskojyouan.
Kemaj okintlatij ipan on tlaixpan* iuan nochi on nakatl.
15 No ijki,
Aarón okiktik on uentli impampa on israelitas.
Okanato on chivo para kiuentlalis ipampa intlajtlakoluan on israelitas.
Kemaj okimiktij niman okiuentlalij ken sen uentli ipampa on tlajtlakojli ijkon ken okichijkej ika on achtoj uentli yejuan okiuentlalij.
16 Ijkuak okuajuikak on yolki yejuan notemaka ken uentli yejuan nochi tlatla,
okiuentlalij ken onkaj ipan on tlanauatijli.
17 Kemaj okuajkik on uentli de trigo.
Okikuik on harina se mapichtli niman okitlatij ipan on tlaixpan* iuan on uentli yejuan kitlatiaj ijkuak kualkan.
18 No ijki,
Aarón okechkoyonij on okichuakax niman on borrego yejuan kitemakayaj on israelitas ken uentli para yoltlalilistli.
Niman itelpochuan okimakakej on yestli,
niman kemaj yejua okajuichi ipan nochi ilados on tlaixpan*.
19 No ijki,
okimakakej ichajka on okichuakax,
niman ichajka on borrego.
Okimakakej on ikuitlapil,
on ichajka yejuan kipiya ipan on tlajtlamach* yejuan kipiya ijtik on yolki,
on iriontsitsiuan niman on ichajka yejuan onkaj ipan iyeltapach.
20 Nochi in okitlalijkej on chauak iuan inyelpannakayo on ome yolki san sekan.
Niman kemaj Aarón okitlatij nochi san sekan on chauak ipan on tlaixpan*.
21 Pero inyelpannakayo niman inyekmametskojyouan on yolkej,
Aarón okoolinij ixpan toTEKO ken sen uentli yejuan tlaoolinijli ijkon ken toTEKO okinauatij Moisés.
Iueyilis toTEKO ononextij imixpan on israelitas
22 Niman ijkuak Aarón otlan kitemaka on uentli ipampa tlajtlakojli,
niman on uentli yejuan nochi tlatla,
niman on uentli para yoltlalilistli ixpan toTEKO,
oketsteu imauan impan on israelitas niman okintiochiu.
Kemaj onejkuanij itech on tlaixpan*.
23 Kemaj Moisés niman Aarón okalakej ijtik on tabernáculo* kampa nemi Dios.
Niman ijkuak ouajkiskej,
okintiochijkej on israelitas.
Niman kemaj toTEKO onopantlannextij sanoyej kualtsin iueyilis imixpan nochimej on israelitas.
24 ToTEKO okuajtitlan tlitl niman okitlatij on yolki yejuan onkatka para tlatlas,
niman no okitlatij on chaualistli yejuan onkatka ipan on tlaixpan*.
Ijkuak on israelitas ijkon okitakej,
opakatsajtsikej,
onotlakuantelketskej niman onopachojkej hasta ipan tlajli.