Moisés okinmakak tekiuajyotl Aaron niman itelpochuan ken tiopixkej
8
ToTEKO okijlij Moisés:
2 “Aman xkinuika Aarón niman itelpochuan hasta kampa ikalakiyan on tabernáculo.
Niman xkikti intlaken on tiopixkej,
niman on aceite yejua ika tikintiochiuas,
on becerro yejuan nouentilis ken se uentli ipampa tlajtlakojli,
on ome borrego,
niman on chikiutli ikan pan yejuan xkipiya tlaxokolilistli*.
3 Niman xkinsentlali nochimej on israelitas kampa ikalakiyan on tabernáculo* kampa nejua ninemi.”
4 Moisés okichiu nochi ken toTEKO okinauatij,
niman nochimej on israelitas onosentlalijkej ipan ikalakiyan on tabernáculo* kampa nemi Dios.
5 Kemaj Moisés okinmijlij nochimej on israelitas:
“In yejua on tlen toTEKO otlanauatij ma nochiua.”
6 Kemaj Moisés okonminnots Aarón iuan itelpochuan niman okimpajpak ika atl.
7 Kemaj Moisés okitlakentij Aarón ikan itlaken yejuan más ueyak yejuan kipiya ikpanepanojli,
sen xijlanilpikatl,
itlaken yejuan ueyak,
niman itlakempani yejuan xkipiya imatlaken.
Kemaj okitlajkosaloj kuajli ika ixijlanilpika.
8 Kemaj Moisés okitlaliltij on iyelpampejpech yejuan kipiya ibolsa,
niman ompa ipan iyelpampejpech okitlalilij on Urim niman on Tumim.
9 Kemaj okitlalilij ikuatlaken ipan itsontekon.
Niman ipan on ikuatlaken kampa ixkuatipan,
okitlalilij on yekplaca tlachijchijtli ika oro.
On yekplaca yejua kiteititia ika Aarón onochiu sen tiopixki.
Moisés nochi okichiu ken toTEKO okinauatij.
10 Kemaj Moisés okuik on aceite yejuan tlatiochijtli,
niman okajuichi on tabernáculo,
niman nochi on tlajtlamach* yejuan onkaj ijtik on tabernáculo.
Ijkon okintiochiu.
11 Niman sa no ika on aceite okajuichij chikomepa on tlaixpan* kampa kitlatiaj on uentli,
nochi on tlen notekitiltia ipan on tabernáculo,
niman on ueyi teposajpastli iuan itsinkaxyo.
Ijkon okichiu para okintiochiu.
12 Kemaj Moisés okitekak on seki aceite ipan itsontekon Aarón,
para okimakak tekiuajyotl ken tiopixki.
13 Kemaj Moisés okichiu ma uajlakan itelpochuan Aarón,
niman okintlakentij ika on tlakentin yejuan más ueueyakej yejuan kipiya ikpanepanojli.
Okintlalilij iminilpika,
niman no okintlaliltij iminkuatojton.
Nochi okichiu ijkon ken toTEKO okinauatij.
14 Kemaj Moisés otlanauatij ma kuikilikan on becerro para on uentli ipampa tlajtlakojli,
niman Aarón iuan itelpochuan okitlalijkej inmauan ipan itsontekon on becerro.
15 Kemaj Moisés okechkoyonij on becerro,
niman ikan imajpiluan okikuik achijtsin yestli,
niman okalauilij ipan on ken itlaj ikuakuautsitsiuan yejuan onkaj ipan iesquinas on tlaixpan* para okitiochiu.
Niman no okajuichi on tlaixpan* para okiyektlalij.
Niman on yestli yejuan onokau,
okitoyau itsintlan on tlaixpan*.
Ijki onokau chipauak niman tlatiochijtli ixpan Dios.
16 Kemaj okikuik on chauak yejuan pepechijtikaj ipan on tlajtlamach* yejuan kipiya ijtik on yolki,
on chauak yejuan onkaj ipan iyeltapach,
niman on ome iriontsitsiuan iuan ichajka,
niman nochi okitlatij ipan on tlaixpan*.
17 Pero inakayo on becerro niman ikuetlaxyo*,
niman ikuetlaxkol iuan ixixalisyo,
okintlatito ikiauak on campamento.
Ijkon tej,
Moisés okichiu nochi ken okinauatij toTEKO.
18 Kemaj Moisés otlanauatij ma kuajuikakan se de on ome borrego para on uentli yejuan nochi tlatla.
Niman Aarón iuan itelpochuan okitlalijkej inmauan ipan itsontekon on borrego.
19 Kemaj Moisés okechkoyonij niman ikan on iyesyo okajuichi ipan nochi ilados on tlaixpan*.
20 Kemaj okitejtek on borrego niman on nakatl iuan itsontekon niman ichajka okitlatij.
21 Kemaj okipajpak ikan atl on tlajtlamach* yejuan kipiya ijtik on borrego niman imetskojyouan.
Niman kemaj okitlatij nochi ipan on tlaixpan* para sen uentli yejuan nochi tlatla.
In sen uentli yejuan kajuiyakaijnekuis toTEKO.
Ijkon tej,
Moisés okichiu nochi ken okinauatij toTEKO.
22 Kemaj Moisés otlanauatij ma kuajuikilikan on okse borrego yejuan kiuentlalis para okinmakak Aarón niman itelpochuan tekiuajyotl ken tiopixkej.
Niman yejuamej okitlalijkej inmauan ipan itsontekon on borrego.
23 Kemaj Moisés okechkoyonij on borrego,
niman okikuik achijtsin iyesyo niman okitlalilij tlatsintlan ipan iyekmanakas Aarón.
Niman no okitlalilij ipan iyektomajkamajpil,
niman ipan iyektomajkaikxipil.
24 Kemaj Moisés okinmijli itelpochuan Aarón ma uajnonisiuikan,
niman no okintlalilij on yestli tlatsintlan de inyekmanakasuan,
niman ipan iminyektomajkamajpiluan,
niman iminyektomajkaikxipiluan.
Niman on yestli yejuan onokau,
okitotoyau ipan inajnakastlan on tlaixpan*.
25 Kemaj Moisés okikuik on chauak,
niman ikuitlapil on borrego,
nochi ichajka yejuan kipiya ipan on tlajtlamach* yejuan kipiya ijtik on yolki,
nochi on chauak yejuan onkaj ipan iyeltapach,
on ome iriontsitsiuan iuan ichajka niman iyekmametskojyo.
26 Ipan on chikiutli kampa onkatka pan yejuan xkipiya tlaxokolilistli*,
on yejuan kitlaliaj ixpan toTEKO,
Moisés okixtij sen pan ken memelatsin yejuan xkipiya tlaxokolilistli*,
niman sen pan yejuan tlanelojli iuan aceite,
niman sen pan yejuan kanauak,
niman okintlalij iuan on chauak,
niman iyekmametskojyo on borrego.
27 Kemaj nochi in okitlalij ipan imauan Aarón niman itelpochuan para yejuamej ma koolinikan ixpan toTEKO para sen uentli yejuan tlaoolinijli.
28 Niman kemaj Moisés okiselij on uentli niman okitlatij ipan on tlaixpan* iuan on uentli yejuan nochi tlatla ken uentli yejuan kinmaka tekiuajyotl para tiopixkej yeskej.
In sen uentli tlatlak yejuan ajuiyak niman kiyolpaktia toTEKO.
29 Niman kemaj Moisés okikuik iyelpannakayo on borrego,
niman okoolinij ixpan toTEKO para sen uentli yejuan tlaoolinijli.
On uentli yejua kinmaka tekiuajyotl para tiopixkej yeskej.
In uentli yejua onokau itech Moisés.
Ijkon Moisés okichiu nochi ken okinauatij toTEKO.
30 Kemaj Moisés okikuik achijtsin aceite yejuan tlatiochijtli niman achijtsin yestli yejuan onkatka ipan on tlaixpan*,
niman okinmajuichij Aarón,
itelpochuan niman ipan intiopixkatlakeuan.
Ijkon okichiu para okinmakak Aarón niman itelpochuan tekiuajyotl para tiopixkej,
niman okintiochiu intiopixkatlakeuan.
31 Kemaj Moisés okinmijli Aarón niman itelpochuan:
“Xkikxitikan on nakatl ne ikalakiyan on tabernáculo* kampa nemi Dios.
Niman ompa xkuakan iuan on pan yejuan tlatiochijtli yejuan onkaj ipan on chikiutli.
Xchiuakan ken toTEKO onechnauatij ijkuak okijtoj:
‘Aarón niman itelpochuan ma kikuakan in nakatl.’
32 Niman on nakatl iuan on pan yejuan nokauas,
xtlatikan.
33 Niman chikome tonajli,
maka nenmejkuaniskej ne kampa ikalakiyan on tabernáculo* kampa nemi Dios,
pampa ichkich noneki on tonaltin para toTEKO mechmakas tekiuajyotl para nentiopixkej yeskej.
34 ToTEKO otlanauatij ijkin ma nochiua ken aman yonochiu,
para mechtlapojpoluilis nemotlajtlakoluan.
35 Yejua ika,
tej,
nemejuamej nemokauaskej chikome tonajli,
ikan tonajli niman ikan yeuajli,
ne kampa ikalakiyan on tabernáculo* kampa nemi Dios.
Xchiuakan tlinon yokijtoj toTEKO,
niman ijki xnenmikiskej,
pampa ijki yonechnauatij.”
36 Niman Aarón iuan itelpochuan okichijkej nochi on tlen toTEKO okinnauatij itechkopa Moisés.