Xkinyaxkati toTEKO on tiopixkej
29
’Ijkin tikchiuas para tikinteyaxkatis Aarón niman ikoneuan para notiopixkauan yeskej.
Xtlapejpeni sen becerro niman ome borrego yejuan xkanaj tlakokoltin ipan intlakayo.
2 Niman ikan harina de trigo yejuan más kuajli niman tlamaxakualojli iuan aceite,
xchijchiuakan seki panes yejuan yejyeualtikej,
seki panes ken memelatsitsimej yejuan xkipiya tlaxokolilistli*,
niman panes yejuan kajkanauak,
yejuan xkipiya tlaxokolilistli* niman yejuan kajuichiskej ikan aceite.
3 Niman xtlali nochi pan ipan sen chikiutli,
para tinechuentlalilis ipan on tabernáculo.
Niman on becerro iuan on borregos no tikinuikas.
4 Niman kemaj xkinuika Aarón iuan ikoneuan ixpan on tabernáculo* kampa ninemi,
niman ompa ma naltikan.
5 ’Kemaj tikintlaliltis Aarón on itiopixkatlakeuan.
Achtoj tiktlaliltis itlaken yejuan más ueyak,
kemaj xtlalilti on yejuan xmas ueyak.
Kemaj xtlalilti itlakempani,
niman kemaj xtlalili iyelpampejpech niman xtlajkosalo ika ilpika.
6 Niman kemaj xtlalilti ipan itsontekon on kuatlakentli*.
Niman ipan on kuatlakentli* xtlalili on placa de oro yejuan kijtoua:
“ITLATIOCHIJKAU TOTEKO”.
7 Kemaj xkui on aceite yejuan tlatiochijtli,
niman xteka ipan itsontekon Aarón,
niman xkaalauili para nochiuas ueyi tiopixki.
8 Niman kemaj xkinuajuika itelpochuan niman xkintlakenti ika on tlakentin ueueyakej.
9 Kemaj xkinxijlansalo niman xkintlalili iminkuatlaken,
niman yejuamej kiseliskej on tekitl ikan nochi tekiuajyotl,
niman nochiuaskej notiopixkauan.
Ijkin tikinmakas tekiuajyotl Aarón iuan itelpochuan,
niman iminuejkakoneuan notiopixkauan yeskej para nochipa.
10 ’Xkuika on becerro ixpan on tabernáculo* kampa ninemi.
Kemaj Aarón iuan itelpochuan ma kitlalikan iminmauan ipan itsontekon on becerro.
11 Niman kemaj xmikti on becerro nixpan nejua,
nemoTEKO,
ipan ikalakiyan on tabernáculo* kampa nejua ninemi.
12 Xkui achijtsin iyesyo on becerro,
niman xtlalili ika momajpil ipan on ken itlaj ikuakuautsitsiuan on tlaixpan* kampa kitlatiskej uentli.
Niman on yestli yejuan nokauas,
xtotoyaua itsintlan on tlaixpan*.
13 Xkixtili nochi on chaualistli yejuan onkaj ipan ikuetlaxkol niman yejuan onkaj ipan iyeltapach,
niman no xkixtili on ome irriontsitsiuan iuan nochi ichajka.
Kemaj xtlati ipan on tlaixpan*.
14 Pero inakayo on becerro,
iuan ikuetlaxyo* niman ixixalis,
tikiktis uejka de on campamento,
niman ompa xtlatiti.
Yejua in sen uentli para tlajtlakojli.
15 ’Kemaj xkuika se de on ome borrego,
niman xkijli Aarón iuan itelpochuan ma kitlalikan iminmauan ipan itsontekon.
16 Kemaj xmikti on borrego,
niman ika iyesyo xkajuichi ipan nochi ilados on tlaixpan*.
17 Niman xtejteki nochi inakayo on borrego.
Niman xpajpaka ikuetlaxkol niman imetskojyouan.
Niman kemaj san sekan xtlali iuan itsontekon niman on seki yejuan tlatejtektli.
18 Kemaj xkuentlali nochi on borrego ipan on tlaixpan*.
In yejua sen uentli yejuan tlatlak para nechmaka tlakaitalistli nejua nemoTEKO,
niman on ajuiyalistli nechpaktis.
19 ’Kemaj xkuajuika on okse borrego,
niman Aarón iuan itelpochuan ma kitlalikan iminmauan ipan itsontekon
20 Kemaj xmikti,
niman xkui achijtsin iyesyo niman xtlalili Aarón niman itelpochuan tlatsintlan ipan inyekmanakas,
niman inyekmajpiltomauak,
niman inyekmaikxipiltomauak.
Niman kemaj on okseki yestli ika tikajuichis ipan nochi ilados on tlaixpan*.
21 Niman xkui achijtsin on yestli yejuan onokau ipan on tlaixpan* niman on aceite yejuan tlatiochijtli,
niman ika xkajuichi Aarón niman itlaken,
niman no xkinmajuichi itelpochuan niman intlaken.
Niman ijkon Aarón niman itelpochuan niman intlaken noteyaxkatiskej para nejua,
nemoTEKO.
22 ’Sakin,
xkixtili ichajka on borrego yejuan kipiya ipan ikuitlapil,
ipan ikuetlaxkol,
niman ipan iyeltapach.
Niman xkixtili on ome irriontsitsiuan iuan nochi ichajka.
Niman no xkixtili on iyekmametskojyo,
pampa ika in uentli de in borrego kinteyaxkatiaj on tiopixkej.
23 Ipan on chikiutli kampa onkaj pan yejuan xkipiya tlaxokolilistli*,
yejuan onkaj nixpan,
nejua nemoTEKO,
xkui sen pan yejuan yeualtik,
sen pan ken memelatsin yejuan kipiya aceite,
niman sen pan yejuan kanauak.
24 Nochi on sesekneka pan,
niman ichajka on borrego,
xkintlali imak Aarón niman itelpochuan.
Niman yejuamej tlakpakkooliniskej nixpan ken se uentli nixpan,
nejua nemoTEKO.
25 Kemaj xkinmejkuanili iminmak nochi on yejuan okoolinijkej nixpan,
niman xtlali ipan on tlaixpan* iuan on uentli yejuan tlatlas yejuan nikajuiyakaijnekuis nejua nemoTEKO.
In se uentli yejuan nochi tlatla para nechmaka tetlakaitalistli nejua nemoTEKO.
26 ’Ijkuak ijkon tikchiuas,
xkui tlajkotipan iyelpannakayo on ika ome borrego yejuan ika noteyaxkatia Aarón para peuas itekiu,
niman tlakpak xkoolini nixpan,
nejua nemoTEKO.
Niman on tlajkotipan tikuas tejua Moisés.
27 Pero on okse tlajkotipan iyelpannakayo on borrego yejuan yokoolinijkaj nixpan,
niman imetskojyo yejuan yoketstejkaj tlakpak,
on para kikuaskej Aarón niman ikoneuan,
pampa on yejua partes de on borreguito yejuan ika kinteyaxkatiaj para tiopixkej.
28 Yejua in nochiuas se tlanauatijli para nochipa.
Ijkuak on israelitas kitemakaj sen uentli para kipiyaskej yolseuilistli noso para kimakaskej tlaxtlauijli toTEKO,
iyelpannakayo niman imetskojyouan on uentli inyaxka yes Aarón niman iuejkakoneuana.
29 ’Cada iuejkakoneu* Aarón yejuan notlalis ken ueyi tiopixki kitekitiltis itiopixkatlakeuan Aarón ijkuak kiteyaxkatiskej para tiopixki.
30 Niman ijkuak iuejkakoneu* Aarón kiselis itekiu,
noneki kitlalis in yektlakentli* chikome tonajli,
niman kemaj,
uelis peuas tekitis ipan iTlayekkan on tabernáculo* kampa nejua ninemi.
31 “Xkui inakayo on borrego yejuan tiktetekis para kinteyaxkatiskej Aarón niman itelpochuan,
niman xkikxiti kampa tlayekkan.
32 Aarón niman itelpochuan kikuaskej inakayo on borrego iuan on pan yejuan onkaj ipan on chikiutli ne kampa ikalakiyan on tabernáculo* kampa nejua ninemi.
33 Aarón iuan itelpochuan,
san yejuamej uelis kikuaskej in uentli yejuan okitemakakej para kinkixtilis intlajtlakoluan,
ijkuak onoteyaxkatijkej ken tiopixkej.
Xakaj okse uelis kikuas,
yej san yejuamej,
pampa on nakatl niman on pan tlatiochijtin.
34 Niman tla nokauas itlaj pan noso itlaj nakatl para uajmostla,
maka yakaj kikuas,
yej xtlati pampa on tlatiochijtin.
35 ’Chikome tonajli tikchiuas nochi in yejuan nimitsnauatia para Aarón niman itelpochuan kiseliskej tekiuajyotl para tekitiskej ken tiopixkej.
36 Mojmostla xmikti sen becerro niman xkuentlali para nikintlapojpoluilis intlajtlakoluan Aarón niman itelpochuan.
Niman xchipaua on tlaixpan* kampa otikuentlalij on becerro ikan okse uentli ipampa on tlajtlakojli yejuan onkatka ipan.
Kemaj xchaua on tlaixpan* ikan aceite niman ijkon nokauas chipauak nixpan.
37 Chikome tonajli titlauentlalis para tikixtis tlajtlakojli,
niman ijki tikchipauas on tlaixpan*.
Ijkon nokauas sanoyej tlatiochijtli,
niman nochi on tlen kitelos on tlaixpan* nokauas tlatiochijtli.
On uentli tlatlak yejuan noneki mojmostla
38 ’Mojmostla xkuentlali ipan on tlaixpan* ome borreguito yejuan se xijkayomej.
39 Sen borreguito xkuentlali kualkan niman on okse ijkuak ye tlapoyajtikaj.
40 On achtoj borreguito iuan tikuentlalis kanaj ome kilo de harina yejuan más kuajli yejuan tlanelojli iuan se litro de aceite de oliva.
Niman no tiktekas ken uentli ipan on tlaixpan* se litro vino.
41 Niman on okse borreguito yejuan tikuentlalis ijkuak ye tlapoyajtikaj,
no ijki tikuentlalis ken on okse uentli yejuan otikuentlalij kualkan.
Tikuentlalis san no ichkich on harina,
aceite de oliva niman vino,
ijkon ken otikchiu kualkan.
Iminajuiyalis in uentin tlatlak nechpaktis nejua nemoTEKO.
42 On israelitas niman nochimej iminuejkakoneuan nochipa nechmakaskej in uentli yejuan nochi tlatla.
Nechmakaskej nixpan nejua nemoTEKO ne kampa ikalakiyan on tabernáculo* kampa nejua ninemi.
Ompa nikiminnamikis on israelitas niman ompa nimitsnotsas.
43 Ompa nikinnotitis on israelitas niman tlayekkan yes ika noueyilis.
44 Niktiochijkatlalis para nejua on tabernáculo* kampa nejua ninemi niman on tlaixpan*.
Niman no nikintiochijkatlalis Aarón niman itelpochuan para notiopixkauan.
45 Nejua ninemis imintsajlan on israelitas,
niman nejua niiminDios yes.
46 Ijki yejuamej kimatiskej ika nejua niinTEKO Dios yejuan onikinkixtij Egipto para ninokauas niman ninemis iminuan.
Melauak,
nejua niinTEKO Dios.