On tiopixkatlakentin
28
’Xkinnotsa para ma uajlakan mokniu Aarón niman itelpochuan Nadab,
Abiú,
Eleazar niman Itamar,
pampa onikintlapejpenij intsajlan nochimej on israelitas para ma nochiuakan tiopixkej yejuan nechtekipanoskej.
2 Xchijchiuili mokniu Aarón itiopixkatlaken yejuan kintlalis para nechtekipanos.
On tiopixkatlakentin sanoyej kualtsitsimej yeskej para ijkon yejua kitlakaitaskej.
3 Xkiminnauati on tlajtsonkej yejuan yonikinmakak tlamachilistli para ueli kichijchiuaj kualtsitsimej tlakentin,
ma kichijchiuakan itlaken para ijkon uelis nechtekipanos ken notiopixkau.
4 ’In yejua tlakentin yejuan kichijchiuiliskej Aarón para kitlalis:
iyelpanpejpech,
itlakempani yejuan xkipiya imatlaken,
itlaken yejuan ueyak,
itlaken yejuan más ueyak yejuan kipiyas ikpanepanojli,
ikuatlaken,
niman ixijlanilpika.
Ma kinchijchiuilikan yejua in tiopixkatlakentin para mokniu Aarón,
niman no ma kinchijchiuilikan intiopixkatlekeuan itelpochuan,
para uelis nechtekipanoskej ken notiopixkauan.
5 Niman on tlamachijchijkej yejuan kichijchiuaskej on tiopixkatlakentin,
kitekitiltiskej ikpatl de oro niman tela yejuan morada,
azul,
niman chichiltik niman lino yejuan más kuajli.”
On itlakempani para on ueyi tiopixki
6 ’On tlamachijchijkej kijtsomaskej on itlakempani ikan ikpatl de oro,
niman tela de lino yejuan tlamalintli niman tlapajloj azul,
morado niman chichiltik.
Niman noneki kichijchiuaskej on yejuan melauak kualtsin ikpanepanojloj.
7 Niman on tlakempani kipiyas ome imekayotsitsiuan ikechpan yejuan ika kisaloskej para kixnamiktiskej iuan on yejuan yau ikuitlapan.
8 Kichijchiuiliskej se ixijlan ilpika yejuan kikpanepanoskej,
niman salijtias iuan on tlakempani.
Yejuamej kichijchiuaskej ikan ikpatl de oro,
lino yejuan más kuajli niman yejuan tlapajlojkej azul,
morado niman chichiltik.
9 ’Niman kemaj xkui ome tetl yejuan itoka ónice,
niman ipan xkijkuiloa imintoka on majtlaktli uan omemej itelpochuan Jacob.
10 Ipan sen tetl xkijkuilo chikuasen imintoka itelpochuan Jacob niman okse chikuasen imintoka xkijkuilo ipan on okse tetl.
Niman xkijkuilo imintoka desde yejuan yekatstiu hasta yejuan más teik.
11 On tlajmachyojketl kintlalis on tokayomej ipan on tetsitsimej.
Noneki kijkuilos ken kichiuiliaj sen sello.
Niman on tetsitsimej kintepitskuas ika tepostli de oro.
12 On ome tetl xtlali ipan imekayouan on tlakempani,
para Aarón nochipa kiktis imintoka itelpochuan Israel nixpan ken se tlalnamikilistli.
Ijki Aarón kiktis ikechpan imintoka yejuamej nixpan nejua nemoTEKO,
para nikinmelnamikis.
13 On ome tepostli yejuan ika tiktepitskuas on ome tetl tikchijchiuas de oro.
14 Niman xchijchiuakan ome cadenitas de oro tlamalintli,
niman xtlalili iyeualkan on kampa kinuika on temej ikan tepostli de oro.
On yelpampejpechyotl para on ueyi tiopixki
15 ’Sen tlakatl yejuan ueli kichijchiua kualtsin miyek tlajtlamach* ma kichijchiua iyelpampejpechyo on tlayekanki tiopixki yejuan kitekitiltis para kimatis on tlen nikneki para nenkichiuaskej.
No ijki,
ma kichijchiua ken okichijchiu on tlakempani.
Ma kijtsoma on iyelpampejpechyo ikan ikpatl de oro,
niman tela yejuan morada,
azul,
niman chichiltik,
niman no ikan lino yejuan tlamalintli.
Niman noneki kichijchiuas ikpanepanojli ijkon ken okichijchiu on tlakempani.
16 Noneki tlajkokuelpachtik yes para nochiuas sen bolsa yejuan cuadrado.
Ika ueyaka niman ika ipatlajka on bolsa nochiuas de 22 centímetros.
17 Niman ixpan nenkimpepechoskej naui tlatekpantli de on tetsitsimej yejuan kualtsitsimej.
Ipan on achtoj tlatekpantli xpepechokan sen tetsintli yejuan itoka rubí,
se itoka topacio,
niman se itoka esmeralda.
18 Ipan ika ome tlatekpantli,
xpepechokan sen turquesa,
sen zafiro,
niman sen diamante.
19 Ipan on ika yeyi tlatekpantli xpepechokan sen jacinto,
sen ágata,
niman sen amatista.
20 Niman ipan on ika naui tlatekpantli xpepechokan sen berilo,
sen ónice,
niman sen jaspe.
Nochi in tetsitsimej kintepitskuaskej ikan tepostli de oro.
21 On tetsitsimej majtlaktli uan ome yes pampa no ichkich itelpochuan Israel.
Niman ipan on cada tetsintli yejuan ken itlaj sello,
on tlajmachyojketl kijkuilos cada se itoka de on majtlaktli uan ome itelpochuan Israel.
22 ’Xchijchiuakan cadenitas tlamalintli ken mekatsitsimej de nochi oro para on yelpampejpechyotl.
23 No xchijchiuakan ome anillos de oro,
niman xkimpepechokan ipan on yelpampejpechyotl tlakpak ipan iesquinas.
24 On ome cadenitas tlamalintli ken mekatsitsimej de oro panoskej ijtik on ome anillos yejuan onkaj iesquinas on yelpampejpechyotl.
25 Kemaj xtlalikan ikuayak on ome cadenitas de oro tlamalintli ipan on ome tepostli yejuan kintepiskuajtiu on temej yejuan onokaj ipan imekayouan itlakempani.
26 Kemaj xchijchiuakan okse ome anillos de oro niman xkimpepechokan ipan on yelpampejpechyotl tlatsintlan ipan iesquinas kampa ijtikopa on itlakempani.
27 Xchijchiuakan okse ome anillos de oro,
niman xkintlalikan tlatsintlan ipan on ome imekayouan itlakempani san achijtsin más tlakpak de ixijlan ilpika.
28 On anillos yejuan onkaj ipan on yelpampejpechyotl kinsaloskej iuan on anillos yejuan onkaj ipan on tlakempani.
Kinsaloskej ika se mekatl azul para ijkon on yelpampejpechyotl nokauas tlakpaktsin de ixijlan ilpika niman xuelis kexanis niman xchapanis.
29 Niman ijki ijkuak Aarón kalakis ipan iTlayekkan on tabernáculo,
kiktis iyelpan imintoka on majtlaktli uan ome itelpochuan Israel ipan iyelpampejpech.
Ijkon toTEKO nochipa kimelnamikis ijkuak Aarón nemis ixpan.
On Urim niman Tumim para on ueyi tiopixki
30 ’Ijtik on iyelpampejpech,
xtlali on Urim niman on Tumim.
Ijkon tej,
ijkuak Aarón yas ixpan toTEKO,
nochipa kiktis iyelpan.
Ijkuakon,
uelis kintekitiltis on Urim niman on Tumim para kimatis on tlen Dios kineki nochiuas para on israelitas.
On okseki tiopixkatlekentin para on ueyi tiopixki
31 ’On tlakentli* yejuan on ueyi tiopixki kitlalis tlatsintlan de on itlakempani,
xchijchiuakan ikan tela azul.
32 On tlakempani noneki koyoniskej itlajkotian kampa kalakis itsontekon on tiopixki.
Niman kitenmalinaskej ken kitenmalinaj ikechtlan sen chaleco yejuan de kuetlaxtli para maka tsayanis.
33 Tlatsintlan ipan itenko on itlaken ueyak,
ma kitlalilikan ika ikpanepanojli para kixneskayotiskej on tlakyotl itoka granadas ikan tela morada,
azul,
niman chichiltik ipan nochi iyeualkan.
Niman intsajtsajlan on granadas ma kimpipilouilikan campanitas de oro.
34 Kijtosneki kipilouiliskej se campanita de oro,
niman kemaj se granada,
kemaj okse campanita de oro niman kemaj okse granada,
niman ijki kintlalilijtiaskej ipan nochi itenko.
35 Ijkuak Aarón kalakis ipan iTlayekkan on tabernáculo* para tlauentlalis,
noneki nochipa kitlalis in tlakentli* yejuan ueyak.
Niman on campanitas tsitsiliniskej ijkuak Aarón onkalakis nixpan kampa Tlayekkan niman ijkuak uajkisas.
Ijkon nochiuas para xmikis.
On teposplaca de oro para on ueyi tiopixki
36 ’No xchijchiuakan sen placa yejuan nochi oro,
niman ipan xkijkuilojkan ken sen sello yejuan kijtos:
“ ITLATIOCHIJKAU TOTEKO”.
37 Ma kisalokan on placa ika sen mekatsintli azul ixpan ikuatlaken para maka uetsis.
38 Ijki onyas nochipa ixkuatipan Aarón.
Niman Aarón kiselis nochi intlajtlakol on israelitas ipan on tlajtlamach* xkuajli yejuan kichiuaskej ijkuak kitemakaskej uentli ixpan Dios.
Ika onkaj nochipa kiktis on placa ixkuatipan para toTEKO uelis kiselis inuen on israelitas.
39 ’Xchijchiuilikan itlaken Aarón yejuan más ueyak ikan ikpanepanojli,
niman ikan tela de lino yejuan más kuajli.
No ijki,
xchijchiuilikan ikuatlaken ikan lino.
Niman on xijlanilpikatl xchijchiuilikan ikan ikpanepanojli yejuan kualtsin tlajmachyoj*.
40 Para itelpochuan Aarón,
xkinchijchiuilikan imintiopixkatlaken yejuan ueueyakej niman kualtsin tlajtsontin ikan inkualnesyo.
No xkinchijchiuilikan iminxijlan ilpika niman ikuatlaken para nesiskej kualtsin niman nochi tlakatl kintlakaitas ipampa on ueyi tekitl yejuan kichiuaskej nixpan.
41 ’Ijki tiktlakentis mokniu Aarón niman itelpochuan.
Niman kemaj xkinkuatêki ikan aceite para tikinmakas tekiuajyotl.
Niman tinechinyaxkatis para notiopixkauan yeskej.
42 Niman no xkinchijchiuilikan intsintlaken ikan tela de lino para ma kitlalikan tlatsintlan de on seki imintlaken.
Ma kintlapacho de inxijlan hasta ipan iminmetskojyo.
43 Aarón niman itelpochuan ijkon ma notlakentikan ijkuak kalakiskej ijtik on tabernáculo* kampa nejua ninemis para tlauentlaliskej,
noso ijkuak uajlaskej itech on tlaixpan* ipan on kalijtik kampa Tlayekkan.
Ijkon noneki kichiuaskej,
pampa tla xijkon notlakentiskej mikiskej.
In tlanauatijli yes para Aarón iuan itelpochuan niman iuejkakoneuan.