On tlaixpan* para kopajli
30
’No xchijchiuakan sen tlaixpan* ika on kojtli* itoka acacia para ipan nenkitlatiskej kopajli.
2 Nenkichijchiuaskej cuadrado.
Kipiyas 45 centimetros ipan cada lado niman 90 centimetros ika uejkapan.
Niman tiktlalis ipan cada esquina ken itlaj ikuakuautsitsiuan yejuan kistiaskej para tlakpak niman san se ueyi tlachijchijtli yes iuan on tlaixpan*
3 Xkalauilikan tlapani oro yejuan más kuajli,
ipan nochi ilados,
niman ipan on ken itlaj ikuakuautsitsiuan.
No xchijchiuilikan sen itempankualnesyo de oro.
4 Niman no xchijchiuilikan naui anillos de oro,
niman xtlalilikan ome ipan cada inajnakastlan itsintlan on itempankualnesyo.
Ijkon xchiua para ijtik on anillos nenkalaktiskej on kojtin* ueueyakej yejuan para ika nenkechpanoskej.
5 Xchijchiuakan ome ueyak tlapalokojtin ika on kojtli* yejuan itoka acacia,
niman xkinmalauilikan oro.
6 Xtlali on tlaixpan* ijtik on Tlayekkan,
ixpan on yekcortina yejuan ika tlatsakutok kampa Más Tlayekkan.
Ne ipan on Más Tlayekkan,
onkaj on yekcaja yejuan kipiya on tlanauatiltin niman yejuan kipiya itentsaka kampa nemouan ninonamikis.
7 Mojmostla kualkan ijkuak Aarón kinkuektlalis on lámparas,
kitlatis ajuiyak kopajli ipan on tlaixpan*.
8 Niman mojmostla tlapoyajkan,
ijkuak Aarón kitlikuiltis on lámpara,
kitlatis kopajli nixpan nejua,
nemoTEKO.
Ijkon nochipa kichiuaskej itelpochuan niman iuejkakoneuan.
9 Ipan in tlaixpan*,
maka nenkitlatiskej yejuan xkuajli kopajli,
nion itlaj uentli tlatlak de yolkej,
nion uentli de harina,
nion maka tiktekas on uentli de vino.
10 In tlaixpan* onyas san para kitlatiskej yejuan kuajli kopajli para nejua nemoTEKO.
Pero san sejpa ipan se xipan Aarón kichiuas on uentli ipan in tlaixpan* ijkuak kitlalis ipan on ken itlaj ikuakuautsitsiuan achijtsin iyesyo on uentli para niktlapojpoluis on tlajtlakojli.
San sejpa ipan se xipan,
niman para nochipa,
ipan in tlaixpan* kichiuaskej uentli para niktlapojpoluis on tlajtlakojli.”
On tomin yejuan yakaj kitlaxtlauas para kimanauis inemilis
11 Kemaj toTEKO okijlij Moisés:
12 ’Ijkuak tikchiuas on poualistli para tikmatis keskimej israelitas nemij,
cada se nechtlaxtlauilis,
nejua nemoTEKO.
Noneki kitlaxtlauas para kimanauis inemilis.
Ijkon noneki para xakaj mikis ijkuak tikimpouas.
13 Cada tlakatl yejuan kijkuiloskej kitemakas makuijli gramos de plata tlatemachijtli ijkon kech on tiopixkej kitemachiuaj.
14 Nochimej on tlapoualtin yejuan ye kipiyaj 20 xipan para tlakpak,
ika onkaj kitemakaskej on tlaxtlauijli ikan tomin de plata para toTEKO.
15 Niman ijkuak cada tlakatl kitlaxtlauilis toTEKO para kimanauis inemilis,
yejuan rico xkitlaxtlauas más miyek,
niman yejuan mayanki xkitlaxtlauas más achijtsin.
16 Ijkon tej,
tikselis on tomin yejuan ika kitlaxtlauaskej on israelitas para kinmanauiyaj innemilis.
On tomin tiktemakas ipan itekiu on tabernáculo* kampa nejua ninemi.
Ika in,
nemoTEKO kimelnamikis on israelitas para kinmanauis.”
On ueyi ajpastli de bronce
(Ex 38.8)
17 ToTEKO okijlij Moisés:
18 ’Xchijchiuakan sen ueyi ajpastli iuan itsinkaxyo yejuan san se ueyi iuan salijtias ika on tepostli bronce para ipan nomajtekiuas.
Niman xtelketsakan itlajkotian on tabernáculo* kampa nejua ninemi niman on tlaixpan*.
Kemaj xtemiltikan ikan atl.
19 Ompa kixtiskej atl Aarón niman itelpochuan para nomajtekiskej niman nokxipajpakaskej.
20 Niman nochipa ijkuak kalakiskej ipan on tabernáculo* kampa nejua ninemi noso ijkuak uajlaskej itech on tlaixpan* para nechuentlaliliskej uentli yejuan nochi tlatla,
21 ika onkaj nomajtekiskej niman nokxipajpakaskej para maka mikiskej.
In tlanauatijli nochipa onyas para Aarón,
itelpochuan niman iuejkakoneuan.”
On aceite yejuan tlatiochijtli para toTEKO
(Ex 37.29)
22 ToTEKO okijlij Moisés:
23 “Xsentlali ajuiyalistli yejuan más kuajli:
Kanaj chikuasen kilo de mirra,
kanaj yeyi kilo canela,
niman kanaj yeyi kilo cálamo yejuan ajuiyak,
24 kanaj chikuasen kilo casia nochi tlatemachijtli ijkon kech on tiopixkej kitemachiuaj niman naui litro aceite yejuan itoka oliva.
25 Nochi ika in tlajtlamach*,
xchijchiua on aceite tlatiochijtli ijkon ken sen tlakatl yejuan sanoyej kuajli kichijchiua on ajuiyalistli.
In yejua yes on aceite yejuan tlatiochijtli.
26 Ikan on aceite,
xmatlalo on tabernáculo* kampa nejua ninemi niman on yekcaja yejuan kipiya on pacto*.
27 No xmatlalo on mesa niman nochi on tlajtlamach* yejuan iuan kitekitiltiaj,
niman xmatlalo on lámpara niman nochi on tlen iuan kitekitiltiaj,
niman no xmatlalo on tlaixpan* kampa kitlatiaj kopajli.
28 Xmatlalo on tlaixpan* kampa kitlatiskej uentli niman nochi on tlajtlamach* yejuan iuan kitekitiltiaj.
No ijki,
xmatlalo on ueyi ajpastli de bronce iuan itsinkaxyo.
29 Ijkon xtiochiua on tlajtlamach* niman nokauaskej sanoyej tlatiochijtin.
San tlinon yejuan kintelos nokauas tlatiochijtli.
30 ’No ijki,
ika in aceite xkinkuatêki Aarón niman itelpochuan para tinechinmaxkatis niman para nochiuaskej notiopixkauan.
31 Niman ijkin xkinmijli on israelitas:
‘In aceite yejua tlatiochijtli,
niman nenkitekitiltiskej nochipa para nejua.
32 Maka san akinon nenkuatêkiskej ikan aceite.
Niman maka yakaj kichijchiuas okse aceite kenin,
pampa in aceite tlatiochijtli,
niman noneki ijki nenkitaskej tlatiochijtli.
33 Tla yakaj okse tlakatl kichijchiuas ken in aceite,
noso tla ika kuatêkis ikan aceite san akinon yejuan xtiopixki,
ika onkaj nenkixtiskej de intech on israelitas para nochipa.’”
On copajli
(Ex 37.29)
34 ToTEKO okijli Moisés:
“Xkinnejnelo in keski ajuiyalistin nochi ijichkich:
okotsotl,
ámbar,
gálbano niman on kopajli ajuiyak.
35 Niman ika in xchijchiua sen kopajli yejuan chipauak niman yektli.
Sanoyej kuajli xkinnejnelo ken kichiua sen tlakatl yejuan kichijchiua ajuiyalistli.
36 Xkuechtili kuajli achijtsin in tlanelojli,
niman xtlali ixpan on yekcaja yejuan kipiya on pacto* ipan on tabernáculo* kampa nejua ninemi niman kampa nemechnamikis.
Niman para nemejuamej,
in kopajli sanoyej tlatiochijtli yes.
37 Xakaj kichijchiuas kopalpopochtli yejuan san para yejua,
niman no ijki tlachijchijtli ken in,
pampa in kopajli tlatiochijtli por nejua,
nemoTEKO.
Niman para nemejuamej yes sanoyej tlatiochijtli.
38 Tla yakaj kichijchiuas kopajli ken in san para kijnekuistilis ichan,
ika onkaj nenkixtiskej de intech on israelitas para nochipa.”