Okseki tlanauatiltin ika on uentli para notlaxtlauas on tlajtlakojli de culpa
7
’On uentli ipampa on tlajtlakojli de culpa sanoyej yektli.
Yejua ika,
noneki ijkin nenkichiuaskej.
2 On yolki yejuan kiuentiskej ipampa on tlajtlakojli de culpa,
noneki kechkoyoniskej ne kampa kinmiktiaj on yolkej yejuan para on uentli.
Niman ika iyesyo on yolki kajuichiskej ipan nochi ilados on tlaixpan*.
3 Kiuentiskej nochi ichajka on yolki yejuan kipiya ipan ikuitlapil niman yejuan pepechijtikaj ipan on tlajtlamach* yejuan kipiya ijtik on yolki,
4 on ichajka yejuan kentok iriontsitsiuan niman ichajka yejuan kipiya ipan ilomos,
niman ichajka yejuan onkaj ipan iyeltapach kixtiliskej san sekan iuan on iriontsitsiuan.
5 Kemaj on tiopixki kitlatis nochi ipan on tlaixpan*,
ken uentli yejuan nochi tlatla para nechmakaskej tlakaitalistli nejua nemoTEKO.
Yejua in uentli kichiuas ipampa on tlajtlakojli de culpa.
6 Nochimej on tiopixkej uelis kikuaskej on nakatl de on uentli,
pero noneki kikuaskej kampa tlayekkan pampa in sen uentli sanoyej tlatiochijtli.
7 ’San sen tlanauatijli onkaj para on nakatl yejuan nokaua de on uentli ipampa on tlajtlakojli de culpa,
niman no para on uentli ipampa on tlajtlakojli.
On nakatl inyaxka on tiopixkej yejuan kiuentlaliaj on uentli para kintlapojpoluis on tlakamej.
Yejuamej uelis kikuaskej.
8 No ijki,
on tiopixki uelis itech nokauas ikuetlaxyo* on yolki yejuan kitemakas on yolki ken sen uentli yejuan tlatla.
9 Niman no ijki nochi on uentli de trigo noso cebada yejuan tlaikxitijli ipan horno,
noso ipan tlaltekomatl,
noso ipan komajli,
iyaxka* yes on tiopixki yejuan tlauentlalis.
10 No ijki,
nochi on uentli de trigo noso cebada yejuan tlanelojli iuan aceite noso xiuan aceite,
inyaxka yes nochimej itelpochuan Aarón.
Nochimej ijichkich kiminmakaskej.
Ken ijki notemakas on uentli yejuan para yoltlalilistli
11 ’In yejua tlanauatijli ken nenkichiuaskej on uentli para yoltlalilistli yejuan yakaj nechmakas nejua nemoTEKO.
12 Tla on uentli notemaka para tlajsojkamachilistli,
no kitemakas pan yejuan kipiya aceite,
pero xkipiyas tlaxokolilistli*.
Niman kitemakas pan yejuan kajkanauak yejuan xkipiya tlaxokolilistli* pero ajuichyoj yes ikan aceite.
No ijki,
noneki kitemakas pan de memelatsitsimej yejuan tlachijchitli ikan harina yejuan más kuajli yejuan kimaxakualos iuan aceite.
13 Niman san sekan on uentli de yoltalilistli yejuan nouentlaliaj ipampa tlajsojkamachilistli,
kiuentlaliskej pan de memelatsitsimej yejuan kipiyas tlaxokolilistli*.
14 Cada se de on uentli yejuan notemaka,
on tiopixki kikuis achijtsin,
niman nechixpantilis nejua nemoTEKO ken ika nechtlaxtlauiliskiaj.
On uentli iyaxka* yes on tiopixki yejuan kajuichis on tlaixpan* ika yestli de on uentli yejuan de yoltlalilistli.
15 ’Inakayo on yolki yejuan okiuentlalijkej ken uentli de tlajsojkamachilistli niman yoltlalilistli,
ika onkaj kikuaskej sano ipan on tonajli ijkuak kiuentlaliaj.
Xitlaj uelis nokauas para uajmostla.
16 ’Tla saman yakaj kuajuikas sen yolki para uentli pampa okitlalij sen tlajtolmakalistli,
noso uentli san ika ipakilis,
ika onka kikuaskej sano ipan on tonajli ijkuak kiuentlaliaj,
pero yejuan nokauas uelis kikuaskej uajmostla.
17 Tla ipan yeyi tonajli sanken* onkaj on nakatl,
noneki kitlatiskej nochi.
18 Niman tla yakaj kikuas ipan yeyi tonajli on nakatl yejuan kisas de sen uentli para yoltlalilistli,
xnikselilis iuen,
niman on nakatl tetlajyeloj* yes para nejua.
On tlakatl yejuan okikuaj on nakatl,
kipiyas tlajtlakojli.
19 ’Tla itlaj yejuan xchipauak ixpan toTEKO kitelos on nakatl,
tla ijkon,
xok yakaj uelis kikuas.
Noneki kitlatiskej nochi.
“Nochimej yejuan chipajkej nixpan nejua nemoTEKO,
uelis kikuaskej on nakatl.
20 ’Pero tla yakaj yejuan xchipauak nixpan nejua nemoTEKO kikuas inakayo on yolki yejuan para yoltlalilistli yejuan noyaxka* nejua nemoTEKO,
xkixtikan nemotsajlan.
21 ’Tla yakaj kimatokas on tlen xchipauak yejuan kisa ipan itlalnakayo sen tlakatl,
noso kisa itech sen yolki yejuan xchipauak,
noso san tlinon yejuan sanoyej tetlajyeloj*,
niman kemaj kikuas nakatl de on uentli para on yoltlalilistli yejuan noyaxka* nejua nemoTEKO,
xkixtikan nemotsajlan.”
Xkuajli kikuaskej yestli nion chauak
22 ToTEKO okijlij Moisés:
23 “Xkimijli on israelitas in tlanauatiltin:
Xakaj uelis kikuas nion achijtsin ichajka uakax,
noso de borrego noso de chivo.
24 Iminchajka on yolkej yejuan san inselti mikij noso yejuan kinmiktia itlaj tepeyolki tekuani,
uelis nenkitekitiltiskej itlaj okse ika,
pero maka nenkikuaskej.
25 ’San akinon yejuan kikuas ichajka sen yolki yejuan nechmakaj nejua nemoTEKO para sen uentli yejuan nochi tlatla,
xkixtikan nemotsajlan.
26 ’San kanon kampa nemochantiskej,
maka kaman nenkuaskej iyesyo on totomej nion de oksekimej sesentlamantikej yolkej.
27 Tla yakaj kikua yestli,
xkixtikan nemotsajlan.”
On tlen noneki kikuaskej on tiopixkej
28 ToTEKO okijli Moisés:
29 “Xkinmijli on israelitas in tlanauatiltin:
‘Ijkuak yakaj kinekis nechmakas nejua nemoTEKO,
sen uentli de yoltlalilistli,
noneki sano yejua kuajkis nixpan nejua nemoTEKO.
30 Sano ika yejua imauan kuakis nixpan nejua nemoTEKO,
on uentli yejuan tlatlas.
On ielpanakayo iuan ichajka nixpan koolinis para sen uentli yejuan tlaoolinijli.
31 On tiopixki kitlatis on chauak ipan on tlaixpan*,
pero iyelpannakayo on yolki inyaxka yes Aarón niman itelpochuan.
32 Inyekmametskojyouan on yolkej yejuan kinuentiskej para yoltlalilistli,
kimakaskej on tiopixki ken itlaxtlauil.
33 Yejua on iyekmametskojyo iyaxka* yes on tiopixki yejuan kiuentlalis iyesyo niman ichajka on yolki para yoltlalilistli.
34 Itech on uentli de yoltlalilistli yejuan nechmakaj on israelitas para sen uentli yejuan ikatlakajtli yoniknotilanilij on iyelpannakayo yejuan kooliniaj niman imetskojyo.
Yejua on yonikinyaxkatij ken tlaxtlauijli para Aarón iuan itelpochuan.
Para nochipa iminuejkakoneuan kiseliskej ken intlaxtlauil.”
35 On tonajli ijkuak Aarón,
niman itelpochuan onochijkej notiopixkauan,
onikinmaxkatij on parte de nochi uentli yejuan seki tlatla niman yejuan nechmakaj nejua nemoTEKO para nechtlakaitaj.
36 Nejua nemoTEKO onitlanauatij para on israelitas ma kinmakakan on tiopixkej on partes yejuan kintokaroua kiseliskej ijkuak onikintiochiu para onochijkej notiopixkauan.
Nochi onokau ken tlanauatijli yejuan nochipa onyas para nochimej tatajtin niman iminuejkakoneuan.
37 In yejua tlanauatiltin para kenijki kitemakaskej ken in uentin:
nochi uentli yejuan tlatlas,
on uentli de trigo noso cebada,
on uentli ipampa tlajtlakojli,
on uentli ipampa on tlajtlakojli de culpa,
on uentli para kinteyaxkatiaj on tlakamej para itiopixkauan Dios,
niman on uentli de yoltlalilistli.
38 ToTEKO okimakak Moisés in tlanauatiltin ipan on tepetl Sinaí ijkuak on israelitas sanken* nemiyaj ipan on xalpatlajkan.
Ompa toTEKO okinmijlij para ma kimakakan iminuen.