Uentli para on tlachtekilistin niman tlaixpachouilistin
6
ToTEKO okijli Moisés:
2 “Ijkuak yakaj tlajtlakos nixpan nejua nemoTEKO,
ikan tlachtekilistli,
pampa kitlaixpachouilia on yejuan iuan tekiti,
noso kichtekilia itomin yejuan okimakaka para ma kejeuili,
noso tla tekuijkuilia itlaj para tetlachtekilia,
3 noso tla xkinekis kijtos ika okinopejpenij itlaj yejuan yakaj okipoloj,
noso kichiua sen tlajtolmakalistli ixpan Dios niman xkichiua,
noso san katlejua kenin tlajtlakoltin,
4 on tlakatl kipiyas tlajtlakojli yejua ika on.
Tla ijkon,
ika onkaj kuepas on tlen okichtek,
noso san okitekuilij,
noso okixpachuilij on yejuan iuan tekiti,
noso on yejuan okinopejpenij.
5 Ika onkaj kuepas san tlinon yejuan ika onotlajtolmakaka ika itokatsin Dios niman xokichiu.
Kikuepilis nochi iteko,
niman no kimakas iteko okse 20 por ciento ichkich ipan sa no on tonajli ijkuak kitemakas on uentli ipampa itlajtlakol de culpa.
6 Kuajuikilis sen borrego on tiopixki para uentli notech nejua nemoTEKO.
On borrego kixtis itech iyolkauan,
niman yejuan xkanaj tlakokojli* ipan itlakayo.
Ijkon kichiuas para kiuentis ipampa itlajtlakol de culpa.
Niman tejua,
Moisés,
tikijtos kech yes on borrego.
7 Niman ika on tlen kichiuas on tiopixki,
nejua nemoTEKO niktlapojpoluilis on tlakatl san tlinon yejuan xkuajli okichiu.
Ijki tej,
kitlapojpoluiliskej.”
Kenijki notemakas on uentli yejuan nochi tlatla
8 ToTEKO okijli Moisés:
9 “Xkijli Aarón niman itelpochuan in tlanauatiltin para kenijki kichiuaskej on uentli yejuan noneki tlatlas.
On yolki yejuan kiuentiaj,
noneki onyas nochi yejuajli ipan on tlixochtli yejuan onkaj tlaixpan* para nochi tlatla.
10 Niman on tiopixki notlakentis.
Kitlalis itlaken niman itsintlaken de lino.
Kemaj kixtis itlikonexyo on yolki yejuan okitlatijkej niman kitlalis inakastlan on tlaixpan*.
11 Kemaj notlapatilis niman kiktis on tlikonextli kampa tlachipajkan,
ikiauak on campamento.
12 “Nochipa tlikuitias on tlitl yejuan onkaj ipan on tlaixpan*.
Niman mojmostla kualkan on tiopixki kitlalis kojtli* ipan on tlaixpan* niman ipan on tlitl kitlalis on yolki para on uentli tlatlas.
No ijki,
ompa kitlatis on chauak de on uentli para yoltlalilistli.
13 On tlitl yejuan onkaj ipan on tlaixpan*,
maka kaman kauiliskej seuis,
yej nochipa ma tlikuitia.
Kenijki notemakas uentli de trigo noso cebada
14 ’In yejua tlanauatiltin para on uentin de trigo niman cebada.
On tiopixkej noneki kiuentlaliskej nixpan nejua nemoTEKO ne ixpan ika on notlaixpan*.
15 Semej yejuamej kikuis se mapichtli harina yejuan kisa itech on trigo noso cebada,
yejuan kiuentlalis iuan aceite niman nochi on kopajli yejuan iuan notemaka on uentli de harina.
Niman kitlatis ipan on tlaixpan* ken sen uentli yejuan nochi tlatla,
niman yejuan ajuiyak nixpan nejua nemoTEKO.
In se mapichtli harina kijtosneki nochi kiuentlalia on harina.
16 Niman on harina yejuan nokauas de on uentli,
kikuaskej Aarón niman itelpochuan,
pero maka kitlaliliskej tlaxokolilistli*.
Kikuaskej kampa tlayekkan ipan ikiauak on tabernáculo* kampa nejua ninemi.
17 Maka kikxitiskej ikan tlaxokolilistli*.
In harina nikinmaka,
ken yejuamej kintocaroua kiseliskej de on uentli yejuan seki tlatla.
In uentli nochiuas sanoyej tlatiochijtli ken on uentli ipampa on tlajtlakojli,
niman ken on uentli ipampa on tlajtlakojli de culpa.
18 Aarón iuan nochimej iuejkakoneuan yejuan tlakamej,
nochipa uelis kikuaskej se parte de on uentli yejuan seki kitlatiaj,
on yejuan kimakaj toTEKO.
Pero san tlinon noso san akinon yejuan xtiopixki,
tla kitelos on uentli tlajyouis pampa on uentli sanoyej tlatiochijtli.”
Uentli yejuan kitemakaskej on tiopixkej
19 ToTEKO no okijli Moisés:
20 “In yejua uentli yejuan Aarón iuan ikoneuan,
niman iuejkakoneuan nechajkuiliskej nejua nemoTEKO ipan on tonajli ijkuak kinteyaxkatiskej para notiopixkauan yeskej.
Kuentlaliskej ome kilo harina yejuan más kuajli ken se uentli yejuan kisa itech trigo noso cebada.
Ijkuak kualkan kuentlaliskej tlajkotipan niman okse tlajkotipan ijkuak tlapoyajkan.
Ijkin kichiuaskej mojmostla.
Nion se tonajli xkikauaskej.
21 On uentli kikxitiskej ipan sen komajli,
niman kuajli tlanelojli yes iuan aceite.
Kemaj ijkuak yoiksik,
kuajkiskej tlatejtektli on uentli para ijnekuistis ajuiyak nixpan nejua nemoTEKO.
22 Niman cada iuejkakoneu* Aarón ijkon kichijchiuas on uentli ijkuak kalakis ipan on tekitl de ueyi tlayekanki tiopixki.
Noneki nochi kitlatiskej ken se uentli para nejua nemoTEKO.
23 Nochi uentli yejuan kuajkiskej on tiopixkej ika onkaj nochi tlatlas.
Xakaj uelis kikuas.”
Kenijki notemakas uentli ipampa tlajtlakojli
24 ToTEKO okijli Moisés:
25 “Xkimijli Aarón niman itelpochuan in tlanauatiltin para on uentli ipampa on tlajtlakojli.
On yolki yejuan nenkitemakaskej ken uentli ipampa on tlajtlakojli noneki nenkechkoyoniskej nixpan nejua nemoTEKO,
ne kampa kinmiktiaj on yolkej yejuan kintlatiaj.
In uentli sanoyej tlatiochijtli.
26 On tiopixki yejuan kitemakas on uentli ipampa tlajtlakojli uelis kikuas.
Pero noneki kikuas kampa tlayekkan,
ompa ipan ikiauak on tabernáculo* kampa nejua ninemi.
27 San tlinon noso san akinon yejuan xtiopixki tla kitelos inakayo on yolki tlajyouis pampa on nakatl tlatiochijtli.
Niman tla itlaken ipan otsijtsikuin iyesyo on yolki,
noneki kipakaskej kampa tlayekkan.
28 On kontli yejuan tlachijchijtli ika tlajli yejuan ika oiksik on nakatl noneki kitlapanaskej.
Pero tla on nakatl oiksik ipan on teposkontli de bronce,
noneki kipajpakaskej ikan atl niman kitejchikiskej kuajli.
29 ’On uentli yejuan notemaka ipampa tlajtlakojli,
san uelis kikuaskej on tiopixkej pampa in sen uentli yejuan sanoyej yektli.
30 Pero on tiopixkej xuelis kikuaskej inakayo on yolki yejuan kuentlaliaj ken sen uentli ipampa on tlajtlakojli,
tla kiktiskej iyesyo ipan on tabernáculo* kampa nejua ninemi para kitlapojpoluiskej on tlajtlakojli ipan on tlayekkan.
On kenon uentli noneki kitlatiskej.