On uentli yejuan noneki para tlajtlakojli
5
’Tla yakaj kitestigojtlaliaj para ma kijto on tlen okitak,
noso okak tlen onochiu niman xkineki kijtos,
tla ijkon,
yejua kipiyas tlajtlakojli,
niman ika onkaj kitlaxtlauas.
2 ’Tla yakaj kimatoka itlaj yejuan xchipauak nixpan,
kenon itlaj yolki yejuan yomik,
uelis tepeyolki noso kalpanyolki,
noso yejuan noteuilana niman xchipauak ixpan Dios,
on tlakatl xok chipauak yes nixpan,
niman kipiyas tlajtlakojli maski xkimatiya tla otlajtlakoj.
3 ’Tla yakaj kimatoka san tlinon yejuan kisa ipan itlalnakayo sen tlakatl yejuan xchipauak nixpan,
kipiyas tlajtlakojli maski xkimatiya tla otlajtlakoj.
4 ’Tla yakaj notlajtolmaka ika itokatsin Dios,
ika kichiuas itlaj kuajli noso xkuajli,
niman xachtoj kuajli kinemilia,
ijkuak kimatis ika xkuajli okichiu,
kipiyas tlajtlakojli.
5 ’Ijkuak yakaj panesis ika okichiu se de in tlajtlakoltin,
noneki noyolkuitis ipampa on tlen okichiu,
6 niman nechajuikilis nejua nemoTEKO sen borreguita noso sen chivita yejuan kixtis itech iyolkauan.
Kemaj kitemakas ken se uentli ipampa tlajtlakojli.
Niman ikan in uentli,
on tiopixki uelis kichiuas para on tlakatl ma kitlapojpoluilikan itlajtlakol.
7 ’Pero tla xkajxilia itomin para kouas sen borreguito,
tla ijkon,
uelis nechmakas nejua nemoTEKO ome kokotetsitsimej noso ome pichontsitsimej para uentli ipampa on tlajtlakojli yejuan okichiu.
Se kitemakas para uentli ipampa on tlajtlakojli,
niman okse kitemakas para sen uentli yejuan nochi tlatla.
8 Noneki kinuikilis on tiopixki,
niman yejua kiuentlalis on achtoj tototsintli para sen uentli ipampa on tlajtlakojli.
Kemaj kechmatilos pero xkotonilis itsontekon.
9 Kemaj kajuichis inakastlan on tlaixpan* ika achijtsin yestli yejuan kisa itech on uentli ipampa tlajtlakojli.
Niman on yestli yejuan nokauas kipatskas itsintlan on tlaixpan* pampa in sen uentli ipampa on tlajtlakojli.
10 Niman on ika ome tototsintli,
kiuentlalis para sen uentli yejuan tlatlas ijkon ken ye tlajkuilolnestikaj.
Niman ika on tlen kichiuas on tiopixki,
on tlakatl kitlapojpoluiliskej itlajtlakol.
Ijki tej,
kitlapojpoluiliskej itlajtlakol.
11 ’Tla xkipiya tomin nion para kouas ome kokotetsitsimej noso ome pichontsitsimej,
noneki kuajkis ome kilo de harina yejuan más kuajli,
para sen uentli ipampa tlajtlakojli.
Pero maka kitlalilis aceite nion kopajli,
pampa in sen uentli ipampa on tlajtlakojli.
12 Noneki kiktilis on tiopixki,
niman yejua kikuis se mapichtli on harina niman kitlatis ipan on tlaixpan* iuan on okseki uentli yejuan kitlatiaj para nechmakaskej tlakaitalistli nejua nemoTEKO.
In se mapichtli harina kijtosneki nochi kiuentlalia on harina.
In yes sen uentli ipampa tlajtlakojli.
13 Ika on tlen kichiuas on tiopixki,
on tlakatl kitlapojpoluiliskej san katlejua itlajtlakol yejuan okichijka.
Ijki tej,
itlajtlakol kitlapojpoluiliskej.
Niman on yejuan nokauas on uentli de harina,
yes para imintlakual on tiopixkej,
ijkon ken intech nokaua nochi on uentli yejuan de harina.”
On uentli para notlaxtlauas on tlajtlakojli de culpa
14 ToTEKO okijli Moisés:
15 “Tla yakaj otlajtlakoj pampa xonechajxitilij on uentli yejuan noneki nikselis nejua nemoTEKO,
maski xkimatiya ika xkuajli tlen okichiu,
noneki kixtis itech iborregos sen borrego yejuan xkanaj tlakokojli* ipan itlakayo.
Yejua kitlaxtlauas kech ika patioj yeskia sen borrego ikan tomin de plata,
ijkon kech kitlajtlanij ipan on tabernáculo.
Yejua in tlaxtlauijli kichiuas ipampa itlajtlakol de culpa.
16 On tlakatl ika onkaj kajxitis on tlen xokajxitijka de on uentli.
Niman no kimakas on tiopixki okse 20 por ciento más.
Kemaj ika on tomin iuan on borrego yejuan kiuentlalia ipampa on tlajtlakojli de culpa,
on tiopixki kichiuas para on tlakatl ma kitlapojpoluilikan itlajtlakol.
Ijki tej,
itlajtlakol kitlapojpoluiliskej.
17 ’Tla yakaj tlajtlakoua,
maski xkinmatiya ika on tlajtlakojli kijtlakoua se itlanauatil toTEKO,
ika onkaj kitlaxtlauas
18 Yejua kixtis itech iborregos,
sen borrego yejuan xkanaj tlakokojli* ipan itlakayo para sen uentli ipampa itlajtlakol de culpa,
niman tejua Moisés,
tikijtos kech yes on borrego.
Kemaj on tlakatl kuikas itech on tiopixki,
niman yejua kiuentlalis ipampa itlajtlakol de culpa,
para ijki on tlakatl kitlapojpoluiliskej on tlen xkuajli okichiu,
yejuan okichiu maski xkimatiya.
Ijki tej,
kitlapojpoluiliskej on tlen xkuajli okichiu.
19 Yejua in tlaxtlauijli kichiuas ipampa itlajtlakol de culpa pampa on tlakatl otlajtlakoj ika on tlen xkuajli okichiu nixpan nejua nemoTEKO.”