On uentli yejuan kixtis tlajtlakojli
4
ToTEKO okijli Moisés:
2 “Xkinmijli on israelitas:
Tla yakaj tlajtlakoua,
maski xkimatiya ika on tlajtlakojli kijtlakoua sen itlanauatil toTEKO,
noso itlaj kichiuas tlen xkuajli,
ijkin nenkichiuaskej:
3 ’Tla on ueyi tlayekanki tiopixki yejua tlajtlakoua,
niman ika on itlajtlakol kintlajtlakolmaka on tlakamej,
on ueyi tlayekanki tiopixki nechuentlalilis nejua nemoTEKO sen becerro yejuan xkanaj tlakokojli* ipan itlakayo.
In yejua yes sen uentli ipampa tlajtlakojli yejuan okichiu.
4 Kuikas on becerro itech ikalakiyan on tabernáculo* kampa nejua ninemi.
Ompa kitlalis ima ipan itsontekon on yolki para itlajtlakoluan kipanoltis ipan on yolki niman kemaj kechkoyonis nixpan nejua nemoTEKO.
5 Kemaj on ueyi tlayekanki tiopixki kikuis achijtsin iyesyo on becerro,
niman kiktis ipan on tabernáculo* kampa nejua ninemi.
6 Ompa nixpan nejua nemoTEKO,
kipatsos imajpil ikan on yestli niman kajuichis chikomepa ixpan on yekcortina yejuan ika tsakutikaj on kampa Más Tlayekkan.
7 No kitlatlalilis achijtsin yestli ipan on ken itlaj ikuakuakatsitsiuan on tlaixpan*,
kampa kitlatiaj kopajli nixpan nejua nemoTEKO,
yejuan nokaua ijtik on tabernáculo* kampa nejua ninemi.
Niman on yestli yejuan nokauas,
kitoyauas itsintlan on tlaixpan* kampa kitlatiaj on uentli yejuan nochi tlatla yejuan onkaj ikalakiyan on tabernáculo* kampa nejua ninemi.
8 Kemaj kixtilis on becerro,
yejuan kiuentlaliaj ipampa on tlajtlakojli,
nochi chauak yejuan kentok ipan ikuetlaxkol.
9 No kixtilis on ome iriontsitsiuan,
niman ichajka yejuan kentok,
niman on ichajka yejuan kipiya ipan ilomos,
niman ichajka yejuan onkaj ipan iyeltapach,
yejuan kixtilis san sekan iuan on iriontsitsiuan.
10 Kijtosneki kichiuas sano ijki ken okichiu ika on becerro yejuan okitemakak para sen uentli de yoltlalilistli.
Niman nochi in kitlatis on tiopixki ipan on tlaixpan* ken sen uentli yejuan nochi tlatla.
11 Pero ikuetlaxyo* on becerro,
niman nochi inakayo,
itsontekon,
ikxiuan,
ikuetlaxkoluan niman ixixalis,
12 kijtosneki,
nochi on becerro yejuan nokaua,
konkauaskej kampa tlachipajkan,
uejka de on campamento kampa nenchantij.
Kiktiskej kampa konkauaj on tlikonextli de nochi uentli yejuan kitlatiaj ipan on tlaixpan*.
Niman ompa kitlaliskej kojtli* para kitlatiskej.
13 ’Tla nochimej on israelitas kichiuaj itlaj xkuajli,
maski nion semej xkimatiyaj ika on tlen okichijkej okijtlakojkej se itlanauatil toTEKO,
yejua ika nochimej kipiyaj tlajtlakojli,
14 Ijkuak kimatiskej ika yotlajtlakojkej,
noneki kiuentiskej ixpan on tabernáculo* sen becerro para sen uentli ipampa tlajtlakojli.
Kuikaskej ixpan on tabernáculo* kampa nejua ninemi,
15 niman on tlayekankej tlakamej yejuan kinyekanaj on israelitas,
kitlaliskej inmauan ipan itsontekon on becerro,
niman ompa kechkoyoniskej nixpan nejua nemoTEKO.
16 Kemaj on ueyi tlayekanki tiopixki,
kikuis achijtsin iyesyo on becerro niman kiktis ijtik on tabernáculo* kampa nejua ninemi.
17 Kemaj kipatsos imajpil ipan on yestli niman tlajuichis chikomepa nixpan nejua nemoTEKO imelajkan on yekcortina.
18 Kemaj kitlatlalilis achijtsin yestli on ken itlaj ikuakuautsitsiuan on tlaixpan* yejuan onkaj nixpan nejua nemoTEKO ne ijtik on tabernáculo* kampa nejua ninemi.
Niman nochi on yestli yejuan nokauas kitoyauas itsintlan on tlaixpan* kampa kitemakaj uentli yejuan tlatla.
On tlaixpan* nokaua nisiu itsakuijlou on tabernáculo.
19 No kixtilis on becerro nochi ichajka,
niman kitlatis ipan on tlaixpan*.
20 Ijkon kichiuas on tiopixki ika in becerro ken okichiu ika on achtoj becerro yejuan notemaka ipampa tlajtlakojli.
Niman ijki kichiuas on tiopixki para kixtis nochi tlajtlakojli yejuan okichijkej on israelitas,
niman nejua nikintlapojpoluis.
21 Kemaj on tiopixki kiktis itlakayo on becerro uejka de on campamento kampa chantij on israelitas.
Ompa kitlatis ken okichijkej iuan on achtoj becerro.
In yejua nochiuas sen uentli ipampa intlajtlakoluan nochimej on israelitas.
22 ’Tla sen tlayekanketl kichiuas itlaj xkuajli yejuan kijtlakos itlanauatil toTEKO,
maski xkimatiya ika okichiu tlajtlakojli,
yejua kipiyas tlajtlakojli.
23 Ijkuak yejua kimatis ika otlajtlakoj,
ika onkaj kuikas sen chivo para sen uentli yejuan xkanaj tlakokojli* ipan itlakayo.
24 Kitlalis ima ipan itsontekon on chivo,
niman kechkoyonis nixpan nejua nemoTEKO kampa kinmiktiaj on yolkej yejuan para uentli yejuan tlatla.
In yes sen uentli ipampa tlajtlakojli.
25 Kemaj on tiopixki kikuis ika imajpil achijtsin iyesyo on chivo para uentli ipampa tlajtlakojli.
Kemaj kitlalilis on tlaixpan* ipan on ken itlaj ikuakuautsitsiuan kampa kitlatiaj on uentli.
Niman nochi on yestli yejuan nokauas kitoyauas itsintlan on tlaixpan*.
26 Niman nochi ichajka on chivo noneki kitlatiskej ipan on tlaixpan* ijkon ken nochiua ika ichajka on uentli de yoltlalilistli.
Niman ika on tlen kichiuas on tiopixki,
on tlayekanketl kitlapojpoluiskej itlajtlakol.
27 ’Tla yakaj yejuan xtiopixki kichiua sen tlajtlakojli,
maski xkimatiya tla tlajtlakojli,
niman kichiuas itlaj yejuan nejua nemoTEKO niknauatia maka ma kichiua,
yejua kipiyas tlajtlakojli.
28 Ijkuak yejua kimatis ika okichiu on tlajtlakojli,
noneki kitemakas sen chiva yejuan xkanaj tlakokojli* ipan itlakayo.
Ijki nochiuas sen uentli ipampa on tlajtlakojli yejuan okichiu.
29 Kitlalis ima ipan itsontekon on yolki yejuan nochiuas sen uentli ipampa tlajtlakojli.
Kemaj kechkoyonis kampa kinmiktiaj on yolkej para uentli yejuan nochi tlatla.
30 Niman on tiopixki,
kikuis ika imajpil achijtsin iyesyo on yolki niman kitlatlalilis ipan on ken itlaj ikuakuautsitsiuan on tlaixpan* kampa kitlatiaj on uentli.
Niman on yestli yejuan nokauas,
kitoyauas itsintlan on tlaixpan*.
31 ’No ijki,
noneki kixtilis nochi ichajka on yolki,
sa no ijki kichiuas ken kichiuaj ika on uentli de yoltlalilistli.
Kemaj on tiopixki kitlatis on chauak ipan on tlaixpan*.
Ijki nochiuas sen uentli yejuan ajuiyak niman nechyolpaktis nejua nemoTEKO.
Niman ika on tlen kichiuas on tiopixki,
on tlakatl kitlapojpoluiliskej itlajtlakol.
32 ’Tla on tlakatl kuajuikas sen borreguito para sen uentli ipampa tlajtlakojli,
kuajuikas sen borreguita yejuan xkanaj tlakokojli* ipan itlakayo.
33 Kitlalis ima ipan itsontekon on yolki yejuan nochiuas sen uentli ipampa on itlajtlakol.
Kemaj kechkoyonis kampa kinmiktiaj on yolkej para uentli yejuan nochi tlatla.
34 Kemaj on tiopixki,
kikuis ika imajpil achijtsin iyesyo on yolki para sen uentli ipampa tlajtlakojli,
niman kitlatlalilis ipan on ken itlaj ikuakuautsitsiuan on tlaixpan* kampa kitlatiaj on uentli.
Niman on yestli yejuan nokauas,
kitoyauas itsintlan on tlaixpan*.
35 Kemaj kixtilis nochi ichajka on borreguita no ijki ken kichiuiliaj on borreguito yejuan kikuentlaliaj para yoltlalilistli.
Kemaj on tiopixki kitlatis on chauak ipan on tlaixpan* para itlakaitalis toTEKO.
Niman ika on tlen kichiuas on tiopixki,
on tlakatl kitlapojpoluiliskej itlajtlakol.