On uentli para yoltlalilistli
3
’Tla yakaj nechmakas nejua nemoTEKO sen uentli de yoltlalilistli,
uelis nechmakas sen okichuakax noso sen siuauakax.
On yolki xkanaj tlakokojli* yes ipan itlakayo.
2 On yejuan kitemakas on uentli,
kitlalis ima ipan itsontekon on yolki.
Kemaj kechkoyonis nisiu ikalakiyan on tabernáculo* kampa nejua ninemi.
Niman kemaj on tiopixkej kajuichiskej ika iyesyo on yolki ipan inajnakastlan on tlaixpan*.
3 ’Yejuan kuajuikas sen yolki ken uentli para yoltlalilistli noneki nechmakas nejua nemoTEKO on uentli yejuan nochi tlatla.
Nechmakas on chauak yejuan onkaj ipan on tlajtlamach* yejuan kipiya ijtik.
4 No kikuis niman kitemakas on ome iriontsitsiuan,
ichajka yejuan kentok,
niman on ichajka yejuan kipiya ipan ilomos,
niman ichajka yejuan onkaj ipan iyeltapach yejuan kixtilis san sekan iuan on iriontsitsiuan.
5 Itelpochuan Aarón kitlatiskej nochi in,
ipan on tlaixpan* iuan on yolki yejuan tlatlas ipan on kojtli* yejuan kauantikaj,
pampa in sen uentli yejuan ajuiyak yejuan nechyolpaktia nejua nemoTEKO.
6 ’Tla yakaj nechmakas nejua nemoTEKO sen borrego noso sen chivo ken uentli de yoltlalilistli,
noneki nechmakas sen okichtli noso sen siuayolki yejuan xkanaj tlakokojli* ipan itlakayo.
7 Tla nechmakas sen borreguito nejua nemoTEKO,
8 kitlalis ima ipan itsontekon on yolki,
kemaj kechkoyonis ixpan on tabernáculo* kampa nejua ninemi.
Kemaj on tiopixkej kajuichiskej on tlaixpan* ika on yestli ipan nochi ilados.
9 ’Yejuan kitemakas sen yolki para uentli de yoltlalilistli,
noneki kimakas toTEKO sen uentli yejuan nochi tlatla,
de ichajka,
nochi ikuitlapil yejuan kitekilis hasta kampa kipiya itepotskojyo,
niman nochi ichajka on ikuetlaxkol,
10 on ome iriontsitsiuan,
ichajka yejuan kentok,
niman on ichajka yejuan kipiya ipan ilomos,
niman ichajka iyeltapach yejuan kixtilis san seknek iuan iriontsitsiuan.
11 Niman kemaj on tiopixki kitlatis nochi in ipan on tlaixpan* ken sen uentli de tlakuajli yejuan nochi tlatla para nechtlakaitaskej nejua nemoTEKO.
12 ’Tla on yolki yejuan kitemaka yejua sen chivo,
ijkuak kuikas ixpan toTEKO,
13 kitlalis ima ipan itsontekon on yolki,
niman kemaj kechkoyonis ixpan on tabernáculo* kampa nejua ninemi.
Kemaj on tiopixkej kikuiskej iyesyo niman ika kajuichiskej ipan nochi ilados on tlaixpan*.
14 ’Yejuan kiuentia sen yolki uelis kikuis niman nechixpantilis ken uentli yejuan nochi tlatla para nechtlakaitas nejua nemoTEKO.
Nechixpantilis nochi ichajka yejuan onkaj ipan ikuetlaxkol on yolki,
15 on ome iriontsitsiuan,
niman ichajka yejuan kentok,
niman on ichajka yejuan kipiya ipan ilomos,
niman ichajka yejuan onkaj ipan iyeltapach yejuan kixtilis san seknek iuan iriontsitsiuan.
16 Kemaj on tiopixki kitlatis nochi ipan on tlaixpan* ken sen uentli de tlakuajli yejuan nochi tlatla.
In ijnekuistis ajuiyak.
Nochi on chauak noyaxka* yes nejua nemoTEKO.
17 ’In sen ley yejuan nochipa onyas para nemochimej* tatajtin niman nemouejkakoneuan san kanon kampa nennemiskej:
Maka nenkuaskej yestli,
nion chauak.”