Kenijki nochipauas ixpan Dios sen siuamixijketl
12
ToTEKO okinots Moisés niman okijli:
2 “Ijkin xkinmijli on israelitas:
Ijkuak sen siuatl nokoneanas niman kitlakatilis sen tlakakonetl,
on siuatl xchipauak yes chikome tonajli,
sano ijki ken ijkuak yestemoua.
3 Ipan chikueyi tonajli,
on tlakakonetl,
kitlaliliskej ipan itlalnakayo on neskayotl itoka circuncisión*.
4 Pero inanaj on tlakakonetl sanken* nochipajtias okse 33 tonajli,
pampa oyestemok.
Xuelis kimatokas itlaj yejuan tlatiochijtli nion xuelis kalakis ipan tabernáculo* hasta ijkuak yokajxiltij on tonaltin.
5 Pero tla on siuatl kitlakatilis sen siuakonetl,
xchipauak yes ome semana,
sano ijki ken ijkuak yestemoua.
Niman yejua sanken* nochipajtias ika oyestemok okse 66 tonajli.
6 ’Tla otlakat sen tlakakonetl noso sen siuakonetl,
niman ijkuak on nantli yotlan nochipaua,
noneki kuikas itech on tiopixki ipan ikalakiyan on tabernáculo* kampa nejua ninemi,
sen borreguito yejuan se xijkayotl para kitemakas sen uentli yejuan nochi tlatla.
No kuikas sen kokotetsin noso sen pichontsin para kiuentlalis se uentli ipampa tlajtlakojli.
7 Niman on tiopixki kuikas on borreguito,
on pichontsin niman on kokotetsin nixpan nejua nemoTEKO para ijki nejua nikchipauas on yestemoualistli.”
In yejua on leyes yejuan noneki kichiuas sen siuatl ijkuak kitlakatilis sen tlakakonetl noso sen siuakonetl.
8 Niman tla on nantli xkajxilia itomin para kouas sen borreguito,
tla ijkon,
uelis nechmakas ome kokotetsitsimej.
Se de on ome kitemakas ken sen uentli yejuan nochi tlatla,
niman on okse kitemakas ken sen uentli ipampa tlajtlakojli.
Niman ijki,
on tiopixki ipampa kitlajtlanis on siuatl niman yejua nokauas chipauak nixpan nejua nemoTEKO.