On kokolistli itoka lepra* temaua
13
ToTEKO okinots Moisés iuan Aarón,
niman okinmijlij:
2 “Ijkuak yakaj tatapachiuis ipan itlalnakayo,
noso kisas tlaxuistli,
noso panuetsis mancha istalejki yejuan uelis nayochpilos niman nesis ken lepra,
noneki kuikaskej itech on tiopixki Aarón noso itech semej itelpochuan.
3 On tiopixki kijitilis on kampa nayochpiloua.
Tla on itson noso itsojmiyo yoistayak niman youejkatlanyak,
tla ijkon,
kijtosneki on kokolistli yonochiu lepra.
Niman kemaj ijkuak on tiopixki kuajli yokijitilij ika melauak lepra,
kijtos ika on kokoxki xok chipauak ixpan Dios.
4 ’Tla on mancha petlanki istayas niman xuejkatlania,
nion itson noso itsojmiyo xistaleui,
on tiopixki kaltsakuas on kokoxki chikome tonajli.
5 Niman kemaj kampa ika chikome tonajli oksejpa kijitilis.
Tla kita ika on kampa nayochpiloua xueyikatia,
oksejpa kaltsakuas on kokoxki okse chikome tonajli.
6 Ijkuak tlamis on okse chikome tonajli,
on tiopixki oksejpa kijitilis.
Niman tla on kokolistli xok ueyikatia,
yej ye popolijtiu,
tla ijkon,
kijtos ika on kokoxki yochipau,
niman kijtosneki ika san otatapachijka.
Kemaj on kokoxki kipakas itlaken niman nokauas chipauak ixpan Dios.
7 ’Pero tla on kampa nayochpiloua sanken* ueyikatitiu sakin* ijkuak on tiopixki yokichipajkatenejka,
tla ijkon,
on kokoxki oksejpa uajlas itech on tiopixki.
8 Niman tla on tiopixki kitas ika on kampa nayochpilouaya youeyikatiak,
kijtos ika on kokoxki xchipauak ixpan Dios.
In kijtosneki on kokolistli yonochiu lepra.
9 ’Ijkuak yakaj kipiyas on kokolistli itoka lepra* noneki kuikaskej itech on tiopixki.
10 Niman on tiopixki kijitilis,
niman tla on kampa tatapachiui istaleui,
niman on itsojmiyo istaleui,
niman no yonesiko inakayo yejuan selik,
11 tla ijkon,
yejua kipiya on kokolistli itoka lepra.
On tiopixki kijtos ika xchipauak ixpan Dios,
niman xok noneki para oksejpa kitsakuas pampa yones ika kipiya lepra.
12 ’Tla on kokolistli lepra* xouij ueyikatia ipan nochi itlalnakayo on kokoxki desde ipan ikxiuan hasta ipan itsontekon,
hasta kampa on tiopixki kajxilis kitas,
13 tla ijkon,
on tiopixki oksejpa kijitilis.
Tla kitas ika on lepra* yokinokentij ipan nochi itlalnakayo,
kijtos ika on kokoxki chipauak.
Yejua chipauak pampa nochi itlalnakayo yoistayak niman kijtosneki ika in kokolistli xejua katka lepra,
yej okse kokolistli yejuan xtemojtij.
14 Pero tla okse tonajli oksejpa selia inakayo,
xok chipauak yes ixpan Dios.
15 Ijkuak on tiopixki kitas on inakayo selik,
kijtos ika xok chipauak.
On inakayo selik xok chipauak pampa yonochiu lepra.
16 ’Pero tla on inakayo selik pajtis niman kemaj oksejpa istaleui,
on kokoxki noneki kontas on tiopixki,
17 para kijitilis.
Niman tla on tiopixki kitas ika yoistaleu on kampa kipiyaya inakayo selik,
on tiopixki kijtos ika on kokoxki chipauak pampa melauak yonokau chipauak.
18 ’Tla yakaj kipiya tlaxuistli ipan itlalnakayo niman kemaj pajti,
19 pero sakin*,
kampa onkatka on tlaxuistli oksejpa peua posaui niman istaleui noso panuetsi sen mancha ixtaltik ika chilejki,
nonekis yas itech tiopixki para kijitilis.
20 Tla on tiopixki kitas ika kampa kipiya on kokolistli yej nesi más youejkatlanyak niman itson noso itsojmiyo yoistaleu,
on tiopixki kijtos ika xok chipauak ixpan Dios pampa on kokolistli yejua lepra* yejuan yoitsmolin kampa onkatka on tlaxuistli.
21 Pero tla on tiopixki kijitilis on kokoxki,
niman kitas ika itson noso itsojmiyo xistaleui,
niman ika on kampa onkatka on tlaxuistli xuejkatlantitiu,
yej ye popolijtiu,
tla ijkon,
on tiopixki kaltsakuas on kokoxki chikome tonajli.
22 Tla on kokolistli yej más ueyikatitiu ipan itlalnakayo,
on tiopixki kijtos ika xok chipauak on kokoxki,
pampa in sen kokolistli itoka lepra* yejuan temaua.
23 Pero tla on mancha xueyikatia,
yej nokaua ken onkatka,
kitosneki ika san sen tilikichtli kampa onkatka on tlaxuistli,
niman on tiopixki kijtos ika on kokoxki chipauak ixpan Dios.
24 ’Ijkuak yakaj notlajtlatis niman ipan on kampa onotlajtlatij itsmolinis sen mancha istalejkij noso chilejki,
25 on tiopixki noneki kijitilis.
Niman tla itson noso itsojmiyo on kokoxki istaleui ipan on imancha,
niman on mancha uejkatlantitiu,
in yejua sen kokolistli itoka lepra* yejuan yoitsmolin kampa onotlajtlatij.
Yejua ika,
on tiopixki kijtos ika on yejuan onotlajtlatij xok chipauak ixpan Dios.
In yejua sen kokolistli itoka lepra* yejuan temaua.
26 Tla on tiopixki yokijitilij on kampa onotlajtlatij,
niman kita ika xistaleui itson noso itsojmiyo,
nion on mancha xuejkatlantitiu,
yej ye popolijtiu,
tla ijkon,
kaltsakuas chikome tonajli on yejuan onotlajtlatij.
27 Ijkuak yopanok chikome tonajli on tiopixki oksejpa kijitilis.
Niman tla kita ika on mancha youeyikatiak,
yejua kijtos ika xok chipauak ixpan Dios.
In yejua sen kokolistli itoka lepra.
28 Pero tla on mancha noteltlalia niman xok ueyikatitiu niman yoistaleu niman yej peua popolijtiu,
kijtosneki san posajtikatka on kampa onotlatij.
Ijkon tej,
on tiopixki kijtos ika chipauak ixpan Dios,
pampa kijtosneki san itilikichyo on kampa onotlatijka.
29 ’Ijkuak sen tlakatl noso sen siuatl kipiyas sen mancha ipan itsontekon noso ipan itenuajkax,
30 noneki on tiopixki kijitilis kampa kipiya on mancha.
Tla kampa kipiya on mancha uejkatlantitiu,
niman tla itson kosejtiu niman tsonkajkayastitiu,
tla ijkon,
on tiopixki kijtos ika on tlakatl noso on siuatl xok chipauak ixpan Dios.
In kijtosneki kipiya sen kokolistli itoka tiña yejuan nesi ken tsonajuatl ipan itsontekon noso ipan itenuajkax.
31 Pero ijkuak on tiopixki kijitilis kampa kipiya on tiña,
niman kitas ika xuejkatlantitiu niman xkipiya itson tlilijki,
on tiopixki kaltsakuas on tlakatl noso on siuatl chikome tonajli on yejuan kipiya on tiña.
32 Kampa ika chikome tonajli,
on tiopixki noneki kijitilis oksejpa on tiña.
Tla xok ueyikatitiu,
nion on itson xok kosejtiu,
nion xuejkatlantitiu on tiña,
33 tlaj ijkon,
on tiopixki tlanauatis para on kokoxki ma nokuatexikalo noso ma notentsonxima.
Pero xkiximas kampa kipiya on tiña.
Niman on tiopixki kaltsakuas okse chikome tonajli.
34 Tla yopanok on chikome tonajli,
on tiopixki oksejpa kijitilis kampa kipiya on tiña.
Tla on tiña xok ueyikatitiu nion xuejkatlantitiu,
on tiopixki kijtos ika nemi chipauak ixpan Dios.
Kemaj kipakas itlaken niman on kokoxki nokauas chipauak.
35 Pero tla saman,
on tiña sanken* ueyikatitiu ijkuak on tiopixki yokijtojka ika chipauak ixpan Dios,
36 on tiopixki noneki oksejpa kijitilis on tiña.
Tla on tiña youeyikatiak,
xok nonekis para on tiopixki kitejtemos on tsonmiyotl kosejki,
pampa on kokoxki yonochiu xchipauak ixpan Dios.
37 Pero tla on tiopixki kitas ika on tiña xok ueyikatia,
niman kitas ika yonoskaltij itson tlilijki,
tla ijkon,
on kokoxki yopajtik.
On tiopixki kijtos ika on tiña yopajtik niman on kokoxki nemi chipauak ixpan Dios.
38 ’Tla yakaj tlakatl noso yakaj siuatl kipiya manchas istalejki ipan itlalnakayo,
39 on tiopixki noneki kijitas.
Tla kitas ika on manchas san itekiu istalejki,
kijtosneki san tlapani ones.
Tla ijkon,
on tlakatl noso on siuatl nemi chipauak ixpan Dios.
40 ’Tla yakaj tsonxini niman kuatetsotsoliui,
nemi chipauak ixpan Dios.
41 Tla yakaj xini itson ixkuatipan niman ixkuatetsotsoliui,
no chipauak ixpan Dios.
42 Pero tla peua tatapachiui niman nokaua istalejki niman chilejki ipan on kampa yoxin itson ikuitlapan noso ixpan,
tla ijkon,
ompa yepejtikaj on kokolistli itoka lepra.
43 Tla ijkon,
on tiopixki noneki kuajli kijitas.
Niman tla on nayochpiloualistli kampa xkipiya itson istaleui noso chichileui,
ijkon ken nesi chichileui on kokolistli lepra* ipan tetlalnakayo,
44 tla ijkon,
on tlakatl noso on siuatl yokajsik lepra* niman xok chipauak.
On tiopixki kijtos ika xok chipauak ixpan Dios pampa yokajsik lepra* ipan itsontekon.
45 ’On yejuan kipiyas on kokolistli lepra* ika onkaj kitlalis itlakensosol,
nokuatepajsolos niman nixtlapachos hasta nisiu ixtololouan.
Niman ijkin tsajtsitinemis:
¡Nejua xnichipauak!
¡Nejua xnichipauak!
46 Chika kipiyas on kokolistli,
kitaskej xchipauak.
Nonekis chantis iselti ikiauak on campamento.
47 ’Tla ipan sen tlakentli* yejuan de lana* noso de lino nesis sen mancha yejuan tlajtlacha ken lepra,
48 noso ipan on tlakentli* yejuan tlamachijchijtli de lino,
de lana,
ipan kuetlaxtli,
noso san tlinon yejuan tlachijchijtli ikan kuetlaxtli,
49 niman tla on mancha on tlakentin nesi xoxoktik noso chilejkitik,
tla ijkon,
yejua lepra,
niman noneki kititiskej on tiopixki.
50 On tiopixki kuajli kijitas tlinon kipiya on mancha niman onkuaj kitlalis on tlakentli* manchajyoj chikome tonajli.
51 Kampa ka chikome tonajli kijitas on mancha tla youeyikatiak ipan on tlakentli*,
ipan on tlakentli* tlamachijchijtli,
ipan on kuetlaxtli noso ipan on tlachijchijtli ikan kuetlaxtli.
Tla ijkon nochiua,
kijtosneki on mancha yejua lepra* yejuan temojtij niman on tlajtlamach* xchipajkej yeskej ixpan Dios.
52 Tla ijkon tej,
nochi on tlajtlamach* yejuan kipiyas on mancha,
noneki nochi kitlatiskej pampa on yejua lepra* yejuan temojtij.
53 Pero tla on tiopixki kitas ika on mancha xpanoua ipan itlaken,
itlaj tela noso itlaj kuetlaxtli,
54 tlanauatis para ma kipajpakakan on tlen kipiya on mancha,
niman onkuaj ma kitlalikan okse chikome tonajli.
55 ’Sankin ijkuak yokipajpakkej kampa onkaj on mancha,
on tiopixki kuajli kijitas.
Tla kita ika on mancha xpopoloui,
tla ijkon,
on mancha xchipauak ixpan Dios niman on tlen manchajyoj noneki kitlatijskej maski tla on mancha xueyikatitiaya,
on tej kijtosneki palantiu ijtik niman tlapani.
56 Pero tla on tiopixki kitas on mancha ijkuak yokipajpakkej ika ye popolijtiu,
noneki kitekilis kampa manchado on tlakentli*,
noso on kuetlaxtli;
noso itlaj okse más.
57 Pero tla oksepa itsmolini on kokolistli niman ueyikatia ipan on tlakentli* noso ipan on okseki tlajtlamach* tlachijchijtli ikan kuetlaxtli,
ika onkaj kitlatiskej on tlen kokolisyoj.
58 Pero tla ipan on tlakentli* noso ipan on tlakentli* tlamachijchijtli noso ipan on yejuan tlachijchijtli ikan kuetlaxtli yejuan yokipajpakkej niman kuajli yochipau de on kokolistli,
noneki oksejpa kipajpakaskej,
niman on tlen kokolisyoj katka chipauak yes ixpan Dios.”
59 In yejua leyes para kixtiskej on manchas de lepra* yejuan kajsi on tlakentin de lana,
de lino,
on tlamachijchijtli tlakentli*,
noso itlaj yejuan tlachichijtli ikan kuetlaxtli,
para uelis kinteneuaskej chipajkej noso xchipajkej ixpan Dios.