Kenijki nochipauaskej yejuan kipiyaj lepra
14
ToTEKO okinots Moisés niman okijlij:
2 “In yejua tlanauatiltin para nochipauas sen kokoxki yejuan kipiya lepra:
On kokoxki kuikaskej itech tiopixki,
3 niman on tiopixki uajkisas de ijtik on campamento para kualijitilis on kokoxki.
Tla on tiopixki kitas ika yopajtik ilepra on kokoxki,
4 tlanauatis para on yejuan nochipauas,
ma kinuajuika ome tototsitsimej yejuan yoltokej niman chipajkej nixpan,
iuan kojtli* de cedro,
iuan tela yejuan chichiltik,
niman sen xojmatsintli de hisopo.
5 Kemaj on tiopixki tlanauatis ma kechtekikan on achtoj tototl ipan sen tlaltekomatl yejuan kipiyas atl de amejli.
6 Niman ipan on yesatl kipatsos on tototl yejuan yoltikaj iuan on kojtli* de cedro,
on tela chichiltik,
niman on xojmatsintli de hisopo.
7 Niman kemaj kajuichis chikomepa ikan yestli on kokoxki yejuan nochipauas de on kokolistli lepra.
Niman ijkon kiteneuas chipauak ixpan Dios.
Kemaj kimakauas on tototl para ma uiya ipan campo.
8 ’On kokoxki yejuan nochipauas noneki kimpakas itlakeuan,
niman kiximas itson,
niman kiximas nochi itsojmiyo,
niman naltis.
Ijkon nokauas chipauak ixpan Dios.
Kemaj uelis kalakis ipan on campamento,
maski sanken* nokauas chikome tonajli ikiauak ichan.
9 Kampa ika chikome tonajli nokuatexikalos,
notentsonximas,
niman nixmojximas,
niman kiximas nochi itsojmiyo ipan itlalnakayo.
Niman kemaj kimpakas itlakeuan niman naltis.
Ijkon nokauas chipauak ixpan Dios.
10 Ipan chikueyi tonajli,
kuajuikas ome borreguito niman sen borreguita yejuan xkanaj tlakokoltin ipan intlakayo niman yejuan se xijkayomej.
No kuajkis uentli de trigo noso cebada,
chikuasen kilo harina yejuan más kuajli niman yejuan tlanelojli iuan aceite,
niman se cuartojtipan aceite.
11 On tiopixki yejuan kichiuas on chipaualistli,
kuikas on kokoxki nixpan nejua nemoTEKO niman kiktis nochi on uentli itech ikalakiyan on tiopan.
12 Kemaj kuikas se de on ome borreguito para kiuentlalis iuan yeyi cuartojtipan aceite para on uentli ipampa on tlajtlakojli de culpa.
In uentli yejuan tlaolinijli,
ketsteuas tlakpak,
niman koolinis yolik.
13 Kemaj kechkoyonis on borreguito ne kampa tlayekkan,
kampa kinmiktiaj on yolkej para uentli ipampa tlajtlakojli niman on uentli yejuan nochi tlatla.
On uentli yejuan notemaka ipampa on tlajtlakojli de culpa,
kimakaj on tiopixki para kikua no ijki kenon uentli ipampa tlajtlakojli.
In uentli sanoyej yektli.
14 ’Kemaj on tiopixki kikuis achijtsin iyesyo on uentli yejuan notemaka ipampa itlajtlakol de culpa,
niman kitlatlalilis tlatsintlan ipan iyekmanakas on kokoxki yejuan nochipaua,
niman ipan iyekmajpiltomauak,
niman ipan iyekmaikxipiltomauak.
15 Kemaj kikuis achijtsin aceite,
niman kitekas ipan iopochmapalko.
16 Niman kemaj kipolaktis iyekmajpil ipan on aceite yejuan kipiya ipan iopochmapalko niman ika on imajpil kajuichis chikomepa ika on aceite nixpan nejua nemoTEKO.
17 Ika on aceite yejuan nokauas ipan ima,
on tiopixki kikuis achijtsin,
niman kitlatlalilis ipan iyekmanakaskuitlapan on kokoxki yejuan nochipaua,
niman ipan iyekmajpiltomauak,
niman ipan iyekmaikxipiltomauak ipan on yestli yejuan achtoj okitlalilij on uentli ipampa itlajtlakol de culpa.
18 Niman on seki aceite yejuan nokauas,
on tiopixki kitlatlalilis ipan itsontekon on kokoxki yejuan nochipaua.
Ijkon kichiuas on tiopixki,
para Dios uelis kipajtis on kokoxki.
19 Kemaj on tiopixki kiuentlalis on uentli ipampa on tlajtlakojli,
niman ijkon uelis chipauis on kokoxki yejuan xchipauak.
Sakin,
kiuentlalis sen uentli yejuan tlatlas.
20 San sekan kiuentlalis iuan on uentli de trigo noso cebada ipan on tlaixpan*.
Ijkon tej,
on tiopixki uelis kichiuas para Dios kitlapojpoluilis itlajtlakoluan on kokoxki,
niman ijkon nokauas chipauak ixpan Dios.
21 ’Tla on kokoxki yejuan kualo ikan lepra* sanoyej mayanki niman xkajxilia kouas ome borreguito,
uelis kitemakas san sentetl para se uentli ipampa itlajtlakol de culpa.
In uentli kenin,
ketsteuaj tlakpak niman kooliniaj yolik nixpan nejua nemoTEKO para kitlapojpoluiskej itlajtlakol.
Niman para on uentli de trigo noso cebada,
kuajkis ome litro uan tlajko harina yejuan tlanelojli iuan aceite,
niman no kuajkis okse yeyi cuartojtipan aceite.
22 Niman kinuajuikas ome kokotetsitsimej,
noso ome pichontsitsimej,
san ken yejua kajxilis,
on se para uentli ipampa tlajtlakojli niman on okse para on uentli yejuan tlatlas.
23 Kampa ika chikueyi tonajli,
on kokoxki kiktis nochi in itech on tiopixki,
para nochipauas.
Kimaktilis on tiopixki nixpan nejua nemoTEKO kampa ikalakiyan on tabernáculo* kampa nejua ninemi.
24 On tiopixki kuikas on borreguito para uentli ipampa on tlajtlakojli de culpa iuan on yeyi cuartojtipan aceite niman nechixpantilis nejua nemoTEKO ken sen uentli yejuan tlaoolinijli.
25 Kechkoyonis on borreguito yejuan para on uentli ipampa on tlajtlakojli de culpa.
Niman kemaj on tiopoxki kikuis achijtsin iyesyo on borreguito,
kitlatlalilis ipan iyekmanakaskuitlapan,
niman ipan iyekmajpiltomauak niman ipan iyekmaikxipiltomauak on kokoxki yejuan nochipaua.
26 Kemaj kinotekilis achijtsin on aceite ipan iopochmapalko,
27 niman ika iyekmajpil kajuichis chikomepa nixpan nejua nemoTEKO ika on seki aceite yejuan kipiya ipan iopochmapalko.
28 No kitlatlalilis on kokoxki yejuan nochipaua achijtsin aceite de iopochmapalko ipan ipeuyan iyekmanakas,
niman ipan iyekmajpiltomauak niman iyekikxipiltomauak.
Kitlatlalilis sa no ompa kampa achtoj okitlalilijka iyesyo on uentli ipampa on tlajtlakojli de culpa.
29 Niman on seki aceite yejuan onokau ipan iopochmapalko on tiopixki,
kitlalilis ipan itsontenkon on tlakatl yejuan nochipaua nixpan nejua nemoTEKO,
para ijkon niktlapojpoluis itlajtlakol.
30 Kemaj on tiopixki kinuentlalis on kokotetsin noso on pichontsin,
san tlen ouel okitemakak para nochipauas.
31 Se kiuentlalis para uentli ipampa on tlajtlakojli,
niman on okse kiuentlalis ken uentli yejuan tlatla teuan on uentli yejuan de trigo noso cebada.
Ijkon on tiopixki uelis kichiuas para nejua nemoTEKO niktlapojpoluis itlajtlakouan on kokoxki.”
32 In yejua leyes para on kokoxkej yejuan kipiyaj lepra,
niman xkajxiliaj kitemakaj sen uentli yejuan ajsitikaj* para inchipaualis.
Kenijki kinchipauaskej on kaltin kampa onkaj manchas de lepra
33 Kemaj Dios okinots Moisés iuan Aarón,
niman okinmijlij:
34 “Ijkuak nemejuamej ye nennemiskej ipan on tlajli Canaán yejuan nemechmaka para nemoyaxka* yes,
niman tla nejua niktlalis sen kokolistli itoka lepra* ipan sen kajli,
35 iteko on kajli kontas on tiopixki,
niman kijlis:
Nochan yononextij sen mancha yejuan nesi ken yejua lepra.
36 ’On tiopixki ijkuak xekalaki ipan on kajli tlanauatis ma kitlakijkixtilikan on kajli,
para maka kipanoltilis on kokolistli nochi on tlajtlamach*.
Kemaj on tiopixki onkalakis para kuajli konijitas on mancha.
37 ’Kemaj ijkuak on tiopixki yokixtlaloj on mancha,
niman kita ika ipan on tepankajli on mancha tilauak,
xoxoktik,
chilejkitik niman ye kalaktiu ipan on tepantli,
38 on tiopixki kisas ipan on kajli niman tlanauatis ma kitsakuakan chikome tonajli.
39 Kampa ika chikome tonajli on tiopixki oksejpa konijitilis on mancha.
Tla on mancha youeyikatiak ipan itepan on kajli,
40 tlanauatis ma kixtilikan on temej yejuan kipiyaj on mancha,
niman kominxiniskej kampa tlamach konxiniaj yejuan xchipauak uejka de on ueyikalpan.
41 Niman no tlanauatis para ma kuauanakan on tepantli ijtik on kajli,
niman on tlalteutli yejuan kisas ma kixinitij kampa tlamach konxiniaj yejuan xchipauak uejka de on ueyikalpan.
42 Niman kemaj kominkuiskej oksekimej temej para kintlaliskej kampa okinkixtijkej on sekimej.
Kemaj konkuiskej tlalajmojli para ika kijixmanaskej on kajli.
43 ’Tla on mancha oksejpa uajnesi ipan on kajli ijkuak yokinkixtilijkaj on temej,
niman ijkuak yokuauankaj on tepantli niman yokijixmankaj,
44 on tiopixki oksejpa onkalakis para kijitas.
Tla on mancha oksejpa ones niman oueyikatiak ijtik on kajli,
kijtosneki ika on temojtij kokolistli lepra* onkaj ipan on kajli.
Yejua ika on kajli xok chipauak.
45 Tla ijkon tej,
on kajli kixoxotoniskej niman nochi on tlajtlamach* temej,
kojtin* niman tlajli,
ma kixinitij kampa tlamach konxiniaj yejuan xchipauak uejka de on ueyikalpan.
46 San akinon yejuan kalakis ipan on kajli ijkuak on tiopixki yotlanauatijka para ma tsakutia,
kiteneuaskej ika xok chipauak nochi tonajli hasta tlapoyajkan.
47 San akinon yejuan tlakuas noso kochis ipan on kajli,
nonekis kimpakas itlakeuan para chipauis.
48 ’Pero tla on tiopixki oksejpa kontas on kajli,
niman kitas ika on mancha xok ueyikatia desde ijkuak okijixmankaj,
kijtos ika on kajli chipauak pampa on mancha yopopoliu.
49 Para on tiopixki kichipauas on kajli,
kikuis ome tototsitsimej,
kojtli* de cedro,
tela yejuan chichiltik,
niman sen xojmatsintli de hisopo.
50 Kemaj kimiktis se de on ome tototsintli ipan sen tlaltekomatl yejuan kipiyas atl de amejli.
51 Niman kemaj kikuis on kojtli* cedro,
on xojmatsintli de hisopo,
on tela chichiltik,
niman on tototsintli yejuan yoltikaj,
niman kimpatsos ika on yesatl de on tototl yejuan okimiktijkej,
niman kajuichis chikomepa on kajli.
52 Ijkon kichipauas on kajli ika iyesyo on tototsintli,
niman ika on atl de amejli,
niman ika on tototsintli yoltikaj,
niman ika on kojtli* de cedro,
niman ika on xojmatsintli hisopo,
niman ika on tela chichiltik.
53 Niman sankin kimakauas neka kaltenko on tototsintli yejuan yoltikaj,
niman ijkon kixtis on kokolistli ipan on kajli niman nokauas chipauak.”
54 In yejua leyes para nochi on sesekneka kokolistli itoka lepra* noso tiña,
55 ipan on tlakentin niman kaltin,
56 de on kampa se tatapachiui,
de on kampa kipiyas sen tsotsotl yejuan nayochpiloua,
niman de on sesentlamantikej manchas.
57 Ika in tlanauatiltin uelis se kimatis on tlen chipauak noso on tlen xchipauak ixpan toTEKO.
Nikan tlami on leyes para on kokolistli lepra.