Tlanauatiltin itechkopa on kokolistin xchipajkej yejuan sekimej tlakamej kimajsi
15
ToTEKO okinots Moisés iuan Aarón,
niman okinmijlij:
2 “Ijkin xkimijlikan on israelitas:
Ijkuak yakaj tlakatl temalkisa kampa tlapiasoua,
in kichiuas para on tlakatl xok chipauak yes nixpan.
3 On xchipaualistli ipan on tlakatl nochiua ijkuak on kampa tlapiasoua ixika,
maski ueli tlapiasoua noso ka.
Yejua ika,
on ley kijtoua ika on tlakatl xchipauak.
4 ’San kanon kampa notekas noso notlalis on tlakatl yejuan ixika,
ompa nokauas xchipauak.
5 ’San akinon yejuan kimatokas on kampa kochi on tlakatl,
ika onkaj kipakas itlaken niman naltis.
Niman on tlakatl nokauas xchipauak nochi on tonajli hasta tlapoyajkan.
6 ’San akinon yejuan notlalis ipan itlaj on kampa onotlalij on tlakatl yejuan kualo,
ika onkaj kimpakas itlakeuan niman naltis.
Niman on tlakatl nokauas xchipauak nochi on tonajli hasta tlapoyajkan.
7 ’San akinon yejuan kimatokas itlalnakayo on tlakatl yejuan ixika ika onkaj kimpakas itlakeuan niman naltis.
On tlakatl nokauas xchipauak nochi on tonajli hasta tlapoyajkan.
8 ’Tla on tlakatl yejuan ixika kichijchas okse tlakatl yejuan xkualo,
on tlakatl yejuan xkualo ika onkaj kimpakas itlakeuan niman naltis.
On tlakatl nokauas xchipauak nochi on tonajli hasta tlapoyajkan.
9 ’San katlejua silla yejuan ika kinsillajtiaj on yolkej,
tla on tlakatl yejuan ixika ipan onotlalij,
nokauas xchipauak nixpan.
10 ’San akinon yejuan kimatokas itlaj on kampa onotlalijka on tlakatl yejuan ixika,
xchipauak yes nochi on tonajli hasta tlapoyajkan.
’No ijki,
san akinon yejuan kiktis itlaj yejuan ipan onotlalijka,
ika onkaj kimpakas itlakeuan niman naltis.
Yejua nokauas xchipauak nochi on tonajli hasta tlapoyajkan.
11 ’Tla on tlakatl yejuan ixika kimatoka yakaj ijkuak xnomajtekia,
on yejuan okimatokakej ika onkaj kimpakas itlakeuan niman naltis.
On tlakatl nokauas xchipauak nochi on tonajli hasta tlapoyajkan.
12 ’Tla sen tlakatl yejuan ixika kimatokas sen tlaltekomatl,
ika onkaj kitlajtlapanaskej on tlaltekomatl.
Niman tla kimatokas itlaj yejuan tlachijchijtli ikan kojtli,
ika onkaj kipajpakaskej.
13 ’Tla on tlakatl yopajtik ika ixikaya,
noneki kichas chikome tonajli para peuas nochipauas.
Kemaj kimpakas itlakeuan,
niman naltis ikan atl de ameyajli,
niman kemaj nokauas chipauak.
14 Kampa ika chikueyi tonajli kuajuikas ome kokotetsitsimej noso ome pichontsitsimej,
itech ikalakiyan on tabernáculo* kampa nejua ninemi.
Ompa kimaktilis on tiopixki nixpan nejua nemoTEKO.
15 On tiopixki se kiuentlalis para sen uentli ipampa on tlajtlakojli,
niman okse kiuentlalis para on uentli yejuan tlatla.
Niman ijkon uelis nochipauas nixpan nejua nemoTEKO on tlakatl yejuan ixikaya.
16 ’Ijkuak yakaj tlakatl kijneuas ixinachyo,
noneki kuajli nopajpakas ipan nochi itlalnakayo,
niman on tlakatl nokauas xchipauak nochi on tonajli hasta tlapoyajkan.
17 ’Niman san katlejua tlakentli* noso kuetlaxtli yejuan ipan chipinis on xinachyotl,
noneki kipajpakaskej,
niman nokauas xchipauak nochi on tonajli hasta tlapoyajkan.
18 ’Ijkuak sen tlakatl notekas iuan sen siuatl,
on omemej ika onkaj nopajpakaskej ikan atl.
Yejuamej nokauaskej xchipajkej nochi on tonajli hasta tlapoyajkan.
19 ’Ijkuak ajsis on tonajli ika on siuatl yestemos,
yejua nokauas xchipauak chikome tonajli.
“San akinon yejuan kimatokas,
nokauas xchipauak nochi on tonajli hasta tlapoyajkan.
20 ’San tlinon yejuan ipan notekas on siuatl ijkuak yestemoua,
on nokauas xchipauak,
niman san tlinon on tlen ipan notlalis nokauas xchipauak.
21 ’San akinon yejuan kimatokas on kampa on siuatl onotekak ika onkaj kimpakas itlakeuan niman naltis.
Yejua nokauas xchipauak nochi on tonajli hasta tlapoyajkan.
22 ’San akinon yejuan kimatokas on tlen on siuatl ipan onotlalij,
ika onkaj kimpakas itlakeuan niman naltis niman nokauas xchipauak nochi on tonajli hasta tlapoyajkan.
23 Tla yakaj kimatoka on tlen onkatka kampa onotekaka noso onotlalijka on siuatl,
nokauas xchipauak nochi on tonajli hasta tlapoyajkan.
24 ’Tla yakaj tlakatl noteka iuan sen siuatl ijkuak yestemoua,
on tlakatl nokauas xchipauak chikome tonajli.
No ijki,
san katlejua tlapechtli kampa on tlakatl onotekak xchipauak yes.
25 ’Tla sen siuatl ixika ijkuak xe ajsiya kamanon yestemos,
niman on ixikalistli kiuejkaua miyek tonaltin,
noso on siuatl yestemoua niman xnoteltia ken kitocaroua,
on siuatl nokauas xchipauak chika ijkon kipiya on ixikalistli.
Yejua xchipauak yes ijki ken tla kipiyaskia on yestemoualistli.
26 ’San kanon kampa on siuatl kochis niman san tlinon ipan notlalis chika kipiya ixikalistli,
nokauas xchipauak,
no ijki ken ijkuak kipiyaskia on yestemoualistli yejuan ken ye kipiyani.
27 “San akinon yejuan kimatokas in tlajtlamach*,
nokauas xchipauak nixpan niman ika onkaj kimpakas itlakeuan niman naltis,
pero nokauas xchipauak nochi on tonajli hasta tlapoyajkan.
28 ’Ijkuak on ixikalistli noteltis,
kichas chikome tonajli,
niman kemaj nokauas chipauak nixpan.
29 Kampa ika chikueyi tonajli kuajuikas ome kokotetsitsimej noso ome pichontsitsimej,
niman kinmaktilis on tiopixki ne ikalakiyan on tabernáculo* kampa nejua ninemi.
30 On tiopixki kiuentlalis se para uentli ipampa tlajtlakotin,
niman okse kiuentlalis para uentli yejuan nochi tlatla.
Niman ijkon on tiopixki kichiuas para on siuatl kiselis tetlapojpoluilistli niman chipaualistli nixpan nejua nemoTEKO pampa ixikaya.
31 Ijkon tej,
nenkinkixtiliskej on israelitas on tlen xchipauak para maka mikiskej tla yaskej xchipajkej ipan on tabernáculo* kampa nejua ninemi iminuan.”
32 In yejua on tlanauatiltin para on tlakamej yejuan ixikaj niman on yejuan kijneuaj inxinachyo,
niman ijkon nochiuaj xchipajkej.
33 Niman in tlanauatiltin no para on siuamej ijkuak yestemouaj,
niman para on tlakamej noso on siuamej yejuan ixikaj san kamanon,
niman para sen tlakatl yejuan noteka iuan sen siuatl ijkuak yestemouaj.