On tonajli ijkuak notlapojpoluiya intlajtlakoluan on israelitas
16
Sakin,
ToTEKO okinots Moisés ijkuak yomikaj on omemej itelpochuan Aarón ika sanoyej okinisiuijkej itech toTEKO niman okiuentlalijkej xkuajli kopajli.
2 Ijkin okijlij Moisés:
“Xkijli mokniu Aarón maka kalakis san kaman kinekis ipan on kalijtik kampa Más Tlayekkan,
yejuan onkaj ikuitlapan on yekcortina niman onkaj ixpan itentsaka on yekcaja.
Tla kichiuas,
mikis pampa ompa ninonextis ipan sen moxtli.
3 Achtoj,
Aarón kuajuikas sen becerro itech on tlaixpan* para nechmakas ken sen uentli ipampa itlajtlakol,
niman kuajuikas sen borrego para nechmakas ken sen uentli yejuan tlatlas.
Kemaj yejua uelis kalakis ne kampa Más Tlayekkan.
4 Pero achtoj naltis,
niman kemaj kitlalis on itsintlaken de lino tlatiochijtli.
Kemaj kitlalis itlaken yejuan más ueyak de lino yejuan tlatiochijtli.
Kemaj notlajkosalos ika iilpika,
niman kinomaniltis ikuatlaken pampa in tlakentin sanoyej tlatiochijtin.
5 ’Niman on israelitas kuajuikaskej ome chivo para uentli ipampa tlajtlakojli,
niman sen borrego para nechmakaskej ken sen uentli yejuan nochi tlatla.
6 Pero achtoj noneki para Aarón nechuentlalilis sen becerro ipampa itlajtlakol niman ipampa intlajtlakoluan ifamilia.
7 Kemaj kuajuikas ome chivo nixpan,
nejua nemoTEKO,
itech itsakuijlou on tabernáculo* kampa nejua ninemi.
8 Kemaj kichiuas suertes ika on ome chivo para kitas katlejua para nejua,
nemoTEKO,
niman katlejua yes para Azazela.
9 On chivo yejuan para nejua,
Aarón kiuentlalis ken sen uentli ipampa tlajtlakojli.
10 Pero on chivo yejuan nochiuas para Azazel,
kitemakas sanken* yoltikaj nixpan,
nemoTEKO,
para nikinkixtilis imintlajtlakoluan.
Kemaj konmakauas para yas itech Azazel uejka ipan on xalpatlajkan para kiktis tetlajtlakoluan ompa niman xokaman uajnokuepas oksejpa.
11 ’Aarón kiuentlalis on becerro ken sen uentli ipampa itlajtlakoluan niman intlajtlakoluan nochi ifamilia.
12 Kemaj kikuis sen popochkontli yejuan kitemiltis ika tlixochtli yejuan kixtis ipan on tlaixpan* yejuan onkaj nixpan nejua nemoTEKO.
Niman no kikuis ome mapichtli kopajli yejuan kuajli kuechtik niman yejuan ijnekuisti ajuiyak,
niman kiktis ne kampa Más Tlayekkan ikuitlapan on yekcortina.
13 Ompa kitlalis on kopajli ipan on tlixochtli nixpan nejua nemoTEKO,
niman ipokyo on kopajli kichiuas para xok nesis itentsaka on yekcaja.
Ijkon Aarón xmikis.
14 Kemaj kikuis achijtsin iyesyo on becerro niman ika imajpil kajuichis ixpan itsaka on yekcaja kampaka ikisayan tonaltsintli.
No ijki,
kajuichis ika imajpil chikomepa ixpan on yekcaja.
15 ’Kemaj kisas niman kimiktis on chivo ken sen uentli ipampa tlajtlakojli para intlajtlakoluan on israelitas.
Niman kiktis achijtsin iyesyo ne kalijtik kampa Más Tlayekkan.
Niman ika kajuichis ikuapan itsaka on yekcaja niman no kajuichis ixpan.
Sano ijki kichiuas ken okichiu ika iyesyo on becerro.
16 Ijkon kichipauas on Más Tlayekkan yejuan xok chipauak ipampa on xompayejyeualistli,
niman on tlajtlakojli yejuan okichijkej on israelitas.
No ijki,
kichipauas nochi on tabernáculo* yejuan onkaj itlajkotian incampamento on israelitas kampa yejuamej tlajtlakojtokej.
17 ’Xakaj uelis nemis ijtik on tabernáculo* chika Aarón konchipauas itlajtlakoluan,
niman intlajtlakoluan ifamilia,
niman imintlajtlakoluan nochimej on israelitas ne kampa Más Tlayekkan kampa nejua ninemi.
18 Kemaj kisas para yas konchipauas on tlaixpan* kampa kitlatiaj on uentli yejuan onkaj nixpan nejua nemoTEKO.
Kikuis achijtsin iyesyo on becerro niman achijtsin iyesyo on chivo,
niman kitlatlalilis ipan on naui ken itlaj ikuakuautsitsiuan on tlaixpan* niman iyeualkan.
19 Niman ika imajpil kikuis on yestli,
niman kajuichis on tlaixpan* chikomepa para kinchipauas on israelitas,
niman ijkon nokauas chipauak on tlaixpan*.
20 ’Ijkuak Aarón yotlan kichipaua on Más Tlayekkan,
niman on okse iparte de on tabernáculo* kampa nejua ninemi niman on tlaixpan*,
tlanauatis ma kuajuikakan on chivo yejuan yoltikaj.
21 Niman kemaj kitlalis imauan ipan itsontekon on chivo yejuan yoltikaj,
niman kijtos nochi on ixipanteitalis,
nochi imintlajtlakoluan niman nochi iminxopeyejyeualis on israelitas.
Ijkin kintlalis nochi on tetlajtlakoluan ipan itsontekon on chivo.
Niman kemaj sen tlakatl yejuan yejua kitlapejpenis,
kuikas on yolki niman konmakauas uejka ipan on xalpatlajkan.
22 Ijkuak on chivo ompoliuis ipan on xalpatlajkan,
kiktis nochi tetlajtlakoluan ipan on tlaltin kampa xakaj chanti.
23 ’Kemaj Aarón kalakis ijtik on tabernáculo* kampa nejua ninemi,
niman kixtis itlaken yejuan tlachijchijtli ikan lino on yejuan okitlalij ijkuak okalak ipan on Más Tlayekkan.
Ompa kauas itlaken.
24 Sano ompa ijtik on tabernáculo,
naltis.
Kemaj oksejpa kitlalis itlaken yejuan xitiopixkatlaken.
Kemaj nechmakas on uentli yejuan nochi tlatla para yejua,
niman no okse uentli yejuan tlatla,
yejuan para on israelitas.
Ijkon itlajtlakol notlapojpoluilis niman intlajtlakol on israelitas.
25 Kitlatis ipan on tlaixpan* ichajka on yolki ken sen uentli ipampa tlajtlakojli.
26 Niman on tlakatl yejuan okitlapejpenijkej para okuikak on chivo niman okimakauato ipan on xalpatlajkan itech Azazel,
noneki kipakas itlaken niman naltis.
Kemaj,
uelis kalakis ipan on campamento.
27 ’On becerro iuan on chivo yejuan yokinuentlalijkej ipampa tlajtlakojli,
niman iminyesyo yejuan Aarón okiktik ne kampa Más Tlayekkan para intlajtlakoluan on tlakamej notlapojpoluiliskej,
noneki kiktiskej ikiauak on campamento.
Ompa nonekis kintlatiskej iminkuetlaxyo*,
iminnakayo,
iminxixalis,
niman nochi on tlen kisas imijtik.
28 On akin kitlatis on tlajtlamach*,
noneki kipakas itlaken,
niman naltis.
Kemaj uelis kalakis ipan on campamento.
29 ’Nemejuamej nochipa nenkichiuaskej in tlanauatijli:
Ipan on tonajli majtlaktli de ipan on chikome metstli,
nemejuamej niman on tlakamej yejuan xchanejkej yejuan nemij nemouan nenkichiuaskej sen nesauajli niman xnenkichiuaskej itlaj tekitl.
30 Ijkon nenkichiuaskej pampa ipan on tonajli ijkuak kitlapojpoluiyaj on tlajtlakojli,
mechtlapojpoluiliskej nemotlajtlakoluan.
Ijkon tej,
nemokauaskej chipajkej de nochi nemotlajtlakoluan ixpan toTEKO.
31 On tonajli ikatlakajtli yes ijkuak nemochimej* nemoseuiskej niman nemosauaskej.
In yejua sen tlanauatijli yejuan nenkitlakaitaskej para nochipa.
32 On tiopixki yejuan okuatêkijkej ikan aceite para okiselij tekiuajyotl niman okiteyaxkatijkej ken ueyi tlayekanki tiopixki para okipatlak itataj,
kixtis on tlajtlakojli.
Niman noneki kitlalis itiopixkatlaken yejuan tlachijchijtli ikan lino,
33 niman kixtis tlajtlakojli ne kampa Más Tlayekkan.
No ijki,
kichipauas nochi on tabernáculo* niman on tlaixpan*.
Niman no kixtis intlajtlakoluan on tiopixkej niman imintlajtlakoluan nochimej on israelitas.
34 ’In tlanauatijli noneki nenkitlakamatiskej para nochipa:
San sejpa ipan se xipan noneki nenkitlaliskej on uentli yejuan ika niktlapojpoluis nochi imintlajtlakoluan on israelitas.”
Niman Aarón okichiu nochi in tlanauatiltin yejuan toTEKO okimakak Moisés.