San uelis kitemakaskej uentli ipan on tabernáculo
17
ToTEKO okijlij Moisés:
2 “Xkinmijli Aarón niman itelpochuan niman nochimej on israelitas:
‘ToTEKO mechmaka in tlanauatiltin.
3-4 ’Tla yakaj israelita kimiktia sen uakax noso,
sen borreguito,
noso sen chivo ken sen uentli para nejua nemoTEKO san kanon ijtik noso ikiauak on campamento,
niman yej xixpan on tabernáculo,
kipiyas tlajtlakojli pampa okixpoloj yestli.
On tlakatl noneki nenkixtiskej nemotech para xokaman uelis nemis nemouan.
5 In tlanauatijli kijtosneki ika on israelitas xokaman kinmiktiskej oksekan on yolkej para uentli.
Noneki ma kinuajuikakan ne kampa ikalakiyan on tabernáculo* kampa nejua ninemi,
para nechmakaskej nejua nemoTEKO.
Ma kimakatij on tiopixki niman ompa kimiktiskej on yolki ken sen uentli para nechyoltlaliskej nejua,
nemoTEKO.
6 On tiopixki tlajuichis ika on yestli ipan notlaixpan* yejuan onkaj nisiu itsakuijlou on tabernáculo* kampa nejua ninemi.
Niman on chaualistli kitlatis,
niman ijnekuistis ajuiyak,
niman nechyolpaktis nejua nemoTEKO.
7 On israelitas xokaman kinmakaskej uentli on xkuajkualtin ajakamej yejuan kinmauistiliayaj,
niman san impampa nijtlakouaj.
In sen ley yejuan nochipa onyas para nochimej on tatajtin niman iminuejkakoneuan.
8 ’No xkinmijli ika xakaj israelita noso xchanej yejuan nemi nemouan,
uelis kitlalis sen uentli yejuan tlatlas noso itlaj okse uentli,
9 tla xachtopa kuajki kampa ikalakiyan on tabernáculo* para nechmakas nejua nemoTEKO.
Tla yakaj ijkon kichiuas,
ika onkaj nenkixtiskej nemotech para xokaman uelis nemis nemouan.
ToTEKO okijtoj ika xuelis kuaskej yestli
10 ’Tla se israelita noso yakaj xchanej yejuan nemi nemouan kikuas yestli,
nejua sanoyej nikualanis itechkopa,
niman nikixtis para xokaman uelis nemis nemouan,
11 pampa inemilis on yolki onka ipan iyesyo yejuan kipiya ipan itlakayo.
Nejua nemechmaka on yestli para ika nentlajuichiskej ipan on tlaixpan*,
para toTEKO mitstlapojpoluilis motlajtlakoluan.
Ijki nochiuas pampa on yestli mitstlapojpolu-lis motlajtlakoluan.
12 ’Yejua ika tej,
nikinmilia on israelitas:
Maka yakaj nensemej nion se on yejuan xchanej yejuan nemij nemouan,
uelis kikuas yestli.
13 Tla yakaj israelita noso on yejuan xchanej semej ontlatemoua niman kimiktia itlaj yolki noso tototl yejuan chipauak para nenkuaskej,
noneki kitoyauaskej iyesyo niman kitlalpachoskej,
14 pampa iminnemilis nochi kech yolki nemi onkaj ipan inyesyo.
Yejua ika,
yonemechijli maka nenkuaskej yestli,
pampa ipan inyesyo nochi totomej niman yolkej kipiyaj iminnemilis.
Yejua ika,
san akinon yejuan kikuas yestli,
xkixtikan nemotech para xokaman nemis nemouan.
15 ’Tla yakaj israelita noso yejuan xchanej kikuas inakayo sen yolki yejuan san omik,
noso yejuan okimiktijkej sekimej tepeyolkej tekuanimej,
ika onkaj kipakas itlaken niman naltis.
Yejua nokauas xchipauak nochi on tonajli hasta tlapoyajkan,
niman kemaj nokauas chipauak nixpan.
16 Pero tla xkipakas itlaken,
nion xnaltis,
tla ijkon,
kipiyas tlajtlakojli.”