Xakaj notekas iuan san akinon
18
ToTEKO okijli Moisés:
2 “Ijkin xkimijli on israelitas:
Nejua nemoTEKO Dios nikijtoua.
3 Maka nemouikaskej ken kichiuaj on tlakamej yejuan chantij Egipto kampa achtoj onenchantikej.
Maka nemouikaskej ken kichiuaj on tlakamej yejuan chantij ipan on tlajli Canaán kampa nemechuikas.
Nion maka nenkintlakamatiskej iminleyes.
4 Ika onkaj nenkitlakamatiskej nochi yejuan nejua noleyes,
niman nenkitlakamatiskej nochi tlen kijtoua notlanauatiluan,
pampa nejua nemoTEKO Dios nikijtoua.
5 Xkintlakamatikan nochi noleyes niman nochi yejuan kijtouaj notlanauatiluan.
On yejuan kintlakamatis kipiyas nemilistli.
Nejua nemoTEKO nikijtoua.
6 ’Xakaj tlakatl uelis iuan notekas sen siuatl yejuan ken kita.
Nejua nemoTEKO nikijtoua.
7 Maka yakaj iuan notekas inanaj.
Tla ijkon kichiuas,
kipijpinajtis itataj,
pampa yejua inanaj niman xkuajli para iuan notekas.
8 Maka yakaj iuan notekas itlakpanan,
pampa tla ijkon kichiuas,
kipijpinatis itataj.
9 ’Maka yakaj notekas iuan ikniu siuatl,
noso itlakpaikniu,
yejuan ichpoch itataj,
noso ichpoch inanaj,
maski otlakat ichan noso oksekan.
10 ’Maka yakaj notekas iuan ixuiu,
yejuan ichpoch itelpoch,
noso ikoneu ichpoch.
Tla yakaj ijkon kichiuas,
xok yakaj kitlakaitas.
11 Maka yakaj notekas iuan itlakpaikniu yejuan ikoneu itlakpanan,
pampa yejua ikoneu itataj,
niman nochiua ikniu.
12-13 Maka yakaj notekas iuan itiaj yejuan ikniu itataj,
noso ikniu inanaj.
14 Maka yakaj notekas iuan isiuau itioj.
Tla yakaj ijkon kichiuas kipijpinajtis itioj pampa on siuatl itiaj.
15 Maka yakaj notekas iuan isiuamon,
pampa yejua isiuau itelpoch.
Maka notekas iuan yejua.
16 Maka yakaj notekas iuan icuñada,
pampa tla ijkon kichiuas,
kipijpinajtis ikniu.
17 ’Maka yakaj notekas iuan sen siuatl niman ichpoch on siuatl,
nion ixuiu yejuan ikoneu itelpoch noso ikoneu ichpoch.
Maka yakaj ijkon kichiuas pampa yejuamej san se yestli kipiyaj,
niman ijkon kichiuas on tlen sanoyej nechkualania.
18 ’Maka yakaj tlakatl nonamiktis iuan icuñada,
nion maka iuan notekas ijkuak sanken* nemi isiuau para maka notlauelitaskej on iknijtin siuamej.
19 ’Maka yakaj notekas iuan sen siuatl ijkuak yestemoua pampa yejua xchipauak nixpan.
20 ’Maka yakaj notekas iuan isiuau okse tlakatl para maka nijtlakos nixpan.
21 ’Maka yakaj kitemakas nion se ikoneu ken sen uentli itech on ídolo Moloc,
pampa tla ijkon kichiuas,
kijtlakos noYektokatsin.
Nejua nemoTEKO nikijtoua.
22 ’Maka yakaj notekas iuan sen tlakatl ken notekaskia iuan sen siuatl,
pampa on sanoyej niktlajyelita.
23 ’Maka yakaj tlakatl notekas iuan sen yolki ken notekaskia iuan sen siuatl,
para maka yejua ika nijtlakos.
Nion on siuatl xuelis notekas iuan sen yolki,
pampa on sanoyej niktlajyelita
24 ’Maka xmijtlakokan ika in tlajtlamach* yejuan yonemechijli.
Ijkon on tlajtlakoltlakamej yejuan nemij ipan on tlajli kampa nemechuikas kichiuaj miyek in tlajtlakoltin niman ijkon nijtlakouaj.
Yejua ika,
nikinkixtis nemixpan.
25 Niman impaís no kijtlakouaj nixpan ipampa on miyek tlajtlakojli,
niman yejua ika nochi on tlakamej yejuan nemij ompa nikincastigaros niman nikinkixtis.
26 Pero nemejuamej yejuan nenisraelitas niman on yejuan xchanejkej yejuan nemij nemouan xchiuakan notlanauatiluan.
Niman maka xchiuakan nion se de on tlajtlakojli yejuan kichiuaj on yejuan chantij ipan on tlajli,
27 pampa nochi in tlajtlakoltin yejuan sanoyej xkuajli okichijkej on tlakamej yejuan onenkej ipan on tlajli kampa nemechuikas.
Niman on tlajli onokau ijtlakauki nixpan.
28 Maka nenkichiuaskej on tlajtlamach* yejuan xkuajli para xnemechkixtis ken onikinkixtij on tlakamej yejuan ompa chantiyaj achtoj de nemejuamej.
29 San akinon yejuan kichiuas itlaj de yejua in tlen xkuajli,
xkixtikan nemotech para xokaman uelis nemis nemouan.
30 Yejua ika,
xkintlakamatikan notlanauatiluan yejuan nemechmaka.
Maka xchiuakan on uejueyi tlajtlakoltin yejuan kichiuaj on tlakamej yejuan nemij ne kampa nemechuikas.
Maka xmijtlakokan ika on tlajtlakoltin.
Nejua nemoTEKO Dios nikijtoua.”