Kenijki nouikaskej on israelitas ixpan Dios
19
ToTEKO okijlij Moisés:
2 “Ijkin xkinmijli on israelitas:
Xmochipauakan nixpan,
pampa nejua nemoDios niyektli.
3 Cada se de nemejuamej ma kitlakaita inanaj niman itataj.
’Niman no xtlakaitakan on noyaxkauan tonaltin sábados.
Nejua nemoTEKO Dios nikijtoua.
4 Maka intech xmouikakan on ídolos niman maka xkinchijchiuakan dioses de tepostli.
Nejua nemoTEKO Dios nikijtoua.
5 ’Ijkuak nennechmakaskej sen uentli para yoltlalilistli nejua nemoTEKO,
xnechmakakan ken nejua nikneki para uelis nemechselilis.
6 On yolki yejuan nennechmakaskej uelis nenkuaskej on tonajli ijkuak nenechmakaskej noso uajmostla.
Pero tla seki nokauas on nakatl hasta ipan yeyi tonajli,
xtlatikan.
7 On nakatl xok kuajli para yakaj kikuas ipan yeyi tonajli,
pampa tetlajyeloj* niman nejua xok nikselis.
8 Niman tla yakaj kikuas,
kipiyas tlajtlakojli,
niman ika onkaj nenkixtiskej nemotech para xokaman nemis nemouan,
pampa okijtlakoj on tlen noyaxka* nejua nemoTEKO.
9 ’Ijkuak ajsis on tonaltin para nempixkaskej ipan nemotlal,
maka xpixkakan hasta tlajtlatenko,
nion maka xmotijtixuikan yejuan onokau.
10 Niman no maka kuajli xtejtemokan uvas ipan nemouvasyoj,
nion maka xpejpenakan yejuan xixini.
Xkinkauilikan yejuan mayankej niman on yejuan xchanejkej.
Nejua nemoTEKO niman nemoDios.
11 ’Maka xtlachtekikan.
’Maka xistlakatikan.
’Maka xtlakajkayauakan.
12 ’Maka xmotlajtolmakakan ika noyektokatsin ijkuak nenkijtouaj nenkichiuaskej itlaj niman nenkimatij ika xnenkichiuaskej,
noso ijkuak nenkijtouaj xonenkichijkej itlaj maski melauak onenkichikej.
Tla ijkon nenkichiuaskej,
nenkijtlakoskej noyektokatsin.
Nejua nemoTEKO nikijtoua.
13 ’Maka yakaj xchiuilikan itlaj ikan tlauejli,
nion maka xkuijkuilikan itlaj tlen iyaxka.
‘Maka xteltilikan itlaxtlauil sen nemotekitkau para nenkimakaskej hasta uajmostla.
14 ’Maka xkuijuikaltikan yakaj yejuan tsatsa.
Nion maka xtlalilikan itlaj iyakapan on yejuan xtlacha para najantikisas kampa nejnemi.
Xteititikan ika nenkitlakamatij nemoTEKO Dios ipampa nemotlakaitalis.
Nejua nemoTEKO nikijtoua.
15 ’Ijkuak titekiuajkisas,
kuajli xchiua motekiu melajki ken mitstocaroua.
Maka tikchikoitas yejuan mayanki,
nion maka tikmakajsis on yejuan ueyixtikaj.
Tla nonekis,
titetlajtlakolmakas noso titemanauis,
xchiua ken kitocaroua.
16 ’Maka yakaj xtlajtolketsteuilikan.
“Maka teuan xmati para yakaj ma kimiktikan.
Nejua nemoTEKO nikijtoua.
17 ’Maka xkipiya tlauejli ipan moyojlo itechkopa yakaj okse.
“Xkajua ijkuak kichiua on tlen xkuajli,
para tejua maka teuan tikpiyas tlajtlakojli yejuan yejua kichiua.
18 ’Maka xtekuepilti on tlen xkuajli mitschiuiliaj,
nion maka xtepiyali tlauejli ipan moyojlo.
Yej xtlajsojtla* san akinon ken tejua timotlajsojtla.
Nejua nemoTEKO nikijtoua.
19 ’Xkintlakamatikan noleyes.
’Maka xkintlaxinacholtikan nemoyolkauan iuan oksekimej yolkej yejuan xsano yejua intlakatilis.
’Ipan nemotlatok maka xtôkakan okseki tlajtlamach* xinachtli.
’Maka xtlalikan tlakentli* yejuan tlachijchijtli ikan sesentlamantikej telas.
20 ’Tla yakaj tlakatl notekas iuan sen esclava yejuan yokijtlanka ok se tlakatl,
pero sanken* teyaxka* itech iteko niman yejua ika xe nemi tlamakauajli,
tla ijkon,
on omemej noneki kincastigaroskej.
Pero on omemej xkinmiktiskej pampa on ichpochtli sanken* esclava katka.
21 On tlakatl ika onkaj kuajuikas nixpan nejua nemoTEKO,
sen borrego itech ikalakiyan on tabernáculo* kampa nejua ninemi.
On borrego kitemakas para sen uentli ipampa itlajtlakol de culpa.
22 On tiopixki kitlajtlanilis toTEKO ma kitlapopoluili itlajtlakol on tlakatl nixpan nejua nemoTEKO ika on borrego yejuan nochiuas sen uentli ipampa itlajtlakol de culpa,
niman ijkon niktlajpojpoluis.
23 ’Ijkuak nemejuamej nenkalakiskej ipan on tlajli de Canaán niman nenkintôkaskej seseknekamej kojtlakijlomej,
maka nenkitekiskej nion se itlakyo ipan on achtoj yeyi xipan.
24 Ipan on ika naui xipan,
nochi on tlakyotl nennechyaxkatiskej ika sen ueyi iluitl para nenechititiskej nemotetlajsojkamachilis.
25 Niman kampa ika makuijli xipan,
kemaj ye nenueliskej nenkuaskej on tlakyotl,
niman ijki on kojtli* más miyek kitlakitis itlakayo.
Nejua nemoTEKO Dios nikijtoua.
26 ’Maka xkuakan itlaj yejuan sanken* kipiya yestli.
’Maka xtetlatejtemouilikan,
nion maka xchiuakan kanika para nenkimatiskej tlinon nochiuas sakin*.
27 ’Maka xmoyeualtekilikan nemotson,
nion maka xkuayakatekikan nemotentson,
28 nion maka xtetekikan nemotlalnakayo ijkuak nemajmanaj ipampa yakaj yejuan yomik.
’Maka xmotlalilikan tatuajesa ipan nemotlalnakayo.
Nejua nemoTEKO nikijtoua.
29 ’Maka tiktemakas mochpoch para ma auilnemi pampa tlamo tikijtlakos.
Tla ijkon tikauilis ma kichiua,
tikinmijtlakos on tlakamej ipan on país.
30 ’Nochipa xkintlakamati notlanamatiluan de on tonaltin sabádos.
Nejua nemoTEKO Dios nemechnauatia.
31 ’Maka xkintlakeuakan on yejuan kinnotsaj ajakamej nion yejuan tetlatejtemouiliaj.
Maka xmijtlakokan nixpan impampa on yejuan ijkon kichiuaj.
Tla ijkon nenkichiuaskej,
mechijtlakoskej.
Nejua nemoTEKO Dios nemechnauatia.
32 ’Xmotelketsa niman xteititi tetlakaitalistli ixpan sen ueuentsin noso lamajtsin.
Xteititi tetlakaitalistli itech moDios.
Nejua nemoTEKO Dios nikijtoua.
33 ’Ijkuak yakaj xchanej uajlas ipan nemopaís para nokauas nemouan,
maka nenkichiuiliskej itlaj tlen xkuajli.
34 Xkitakan ken okse israelita yeskia.
Xtlajsojtlakan ken nemotlajsojtlaj,
pampa nemejuamej no nennemiyaj ken xchanejkej ipan on país de Egipto.
Nejua nemoTEKO Dios nikijtoua.
35 ’Maka xtlaixpachokan.
Ijkuak nenkitemachiuaj itlaj yejuan ueyak,
noso nenkitemachiuaj itlaj yejuan yetik,
noso yejuan miyek,
nochi kuajli xtemachiuakan.
36 Xtekitiltikan on tlatemachiualtin niman on pesas yejuan kuajli kajxitia tlen kitemachiua.
Nejua nemoTEKO Dios yejuan onemechkixtij ipan on país Egipto.
37 ‘Yejua ika,
xtlakamatikan nochi noleyes niman notlanauatiluan.
Xchiuakan nochi on tlen nemechnauatia.
Nejua nemoTEKO Dios nikijtoua.”