Castigo para on yejuan xtetlakamati
20
ToTEKO okijlij Moisés:
2 “Ijkin xkinmijli on israelitas:
San akinon yejuan chanti nemouan,
israelita noso yejuan xchanej,
tla kitemaka ikoneu ken sen uentli para on dios Moloc,
ika onkaj nemejuamej israelitas nenkitemojmotlaskej hasta kaman miki.
3 Nejua nikualanis itechkopa on tlakatl.
Niman nikixtis intech nokoneuan israelitas,
pampa ikoneu okimakak on dios Moloc.
Ijkon nikchiuas pampa okijtlakoj notabernáculo,
niman okijtlakoj noyekTokatsin.
4 Tla on israelitas chanejkej ipan on tlajli xitlaj* kichiuiliaj on yejuan kitemaka ikoneu itech Moloc,
5 nejua niktlajtlakolmakas on tlakatl iuan nochi ifamilia.
Nikinkixtis intech on nokoneuan israelitas imiuan nochimej on yejuan onijtlakojkej ika okimauistilijkej on idolo Moloc.
6 ’Niman tla yakaj nijtlakoua ika kintlakeua on yejuan kinnotsaj ajakamej noso tetlatejtemouiliaj,
tla ijkon,
nikualanis itechkopa on tlakatl,
niman nikixtis intech nokoneuan israelitas.
7 Xmochipauakan nixpan,
pampa nejua nemoDios niyektli.
8 Xkintlakamatikan no leyes niman xchiuakan nochi notlanauatiluan,
pampa nejua,
nemoTEKO,
nemechchipajkatlalia para nennoyaxkauan* yeskej.
9 ’Akin kuijuikaltis itajtaj noso inanaj,
ika onkaj nenkimiktiskej.
Pampa okuijuikaltij itajtaj noso inanaj,
yejua kipiyas tlajtlakojli niman sano yejua ipampa tla mikis.
10 ’Tla sen tlakatl notekas iuan isiuau okse tlakatl,
tla ijkon,
on tlakatl niman on siuatl ika onkaj nenkinmiktiskej.
11 ’Tla sen tlakatl notekas iuan isiuau itataj,
tla ijkon,
on tlakatl ixkoyejyeua itataj.
On tlakatl niman on siuatl,
nenkintlajtlakolmakaskej niman nenkinmiktiskej.
Yejuamej kipiyaskej tlajtlakojli niman sano yejuamej impampa tla mikiskej.
12 ’Tla se tlakatl notekas iuan isiuamon,
on omemej noneki nenkintlajtlakolmakaskej niman nenkinmiktiskej.
Yejuamej nijtlakoskej,
niman kipiyaskej tlajtlakojli niman sano yejuamej impampa tla mikiskej.
13 ’Tla sen tlakatl notekas iuan okse tlakatl ken iuan notekaskia sen siuatl,
tla ijkon,
on omemej ika onkaj nenkinmiktiskej pampa yejuamej okichijkej on tlen sanoyej tetlajyeloj*.
Yejuamej kipiyaskej tlajtlakojli niman sano yejuamej impampa tla mikiskej.
14 ’Tla sen tlakatl kinonamiktis sen ichpochtli niman no iuan nonamitis inanaj on ichpochtli,
tla ijkon,
kichiuaj on tlen sanoyej xkuajli.
On yeyimej ika onkaj nenkintlajtlakolmakaskej niman nenkintlatiskej yoltokej para ijkon xok onyas on kenon ueyi tlajtlakojli nemotech.
15 ’Tla sen tlakatl iuan notekas sen yolki ken iuan notekaskia sen siuatl,
tla ijkon,
on tlakatl niman on yolki nenkintlajtlakolmakaskej niman nenkinmiktiskej.
16 ’Niman tla sen siuatl iuan notekas sen yolki ken iuan notekaskia sen tlakatl,
tla ijkon,
on siuatl niman on yolki nenkintlajtlakolmakaskej niman nenkinmiktiskej.
Yejuamej kipiyaj tlajtlakojli,
niman sano yejuamej impampa tla mikiskej.
17 ’Tla sen telpochtli nonamiktis iuan ikniu,
noso itlakpaikniu,
tla ijkon,
on omemej kinkixtiskej,
pampa sanoyej tepinajtij niman xkuajli ika iuan onotekak ikniu.
Yejuan ijkon kichiua,
ika onkaj kiselis icastigo ika on itlajtlakol.
18 ’Tla sen tlakatl notekas iuan sen siuatl ijkuak yestemoua,
tla ijkon,
ika onkaj on omemej nenkinkixtiskej nemotech para xokaman nemiskej nemouan,
pampa on tlakatl okitak kampa ualeua iyesyo on siuatl,
niman on siuatl okitak iyesyo.
19 ’Maka iuan timotekas motiaj,
yejuan ikniu monanaj noso ikniu motataj,
pampa ken tikita.
Tla ijkon kichiuaskej,
on omemej kipiyaskej tlajtlakojli niman kiseliskej castigo.
20 ’Tla yakaj notekas iuan isiuau itioj,
ixkoyejyeuas itioj.
Tla ijkon kichiuaskej,
on omemej kipiyaskej tlajtlakojli niman kiseliskej castigo.
Xuelis kimpiyaskej inkoneuan hasta kaman mikiskej.
21 ’Tla yakaj tlakatl kikuilis isiuau ikniu,
tla ijkon,
kichiua itlaj yejuan sanoyej xchipauak nixpan,
pampa ixkoyejyeua ikniu,
niman xuelis kipiyaskej nion se inkoneu hasta ijki mikiskej.
22 ’Xtlakamatikan nochi noleyes niman notlanautiluan para maka mechajkixtiskej ipan on tlajli Canaán kampa nemechuikas para ipan nenchantiskej.
23 Maka nenkichiuaskej ken on tlakamej yejuan aman nemij ne ipan on tlajli kampa nikinkixtis nemixpan,
pampa yejuamej kichiuaj nochi in tlajtlakoltin.
Yejua ika,
sanoyej nikinchichiita.
24 Nejua onemechprometerouilij ika nemejuamej nemoyaxka* yes on tlajli yejuan aman inyaxka.
Nejua nemechmaktilis on tlajli kampa sanoyej tlatlaki niman xitlaj* poliui.
’Nejua nemoTEKO Dios yejuan omechxeloj de on oksekimej naciones.
25 Yejua ika,
nemejuamej no xkinmixmatikan on yolkej yejuan chipajkej niman on yejuan xchipajkej,
no ijki on totomej yejuan chipajkej niman on yejuan xchipajkej.
Maka xmijtlakokan impampa on yolkej,
on totomej,
niman on yolkej yejuan noteuilanaj ipan tlajli.
Nejua yonikinxeloj on yolkej yejuan xchipajkej niman xkuajli nenkinkuaskej.
26 Xmochipauakan nixpan,
pampa nejua nemoTEKO niyektli.
Onemechxeloj de on oksekimej naciones para nemochiuaskej noyaxkauan.
27 ’Nochi tlakatl noso siuatl yejuan kinnotsas ajacamej noso tetlatejtemouilis,
xkintemojmotlakan hasta kaman ma mikikan.
Yejuamej kipiyaskej tlajtlakojli niman sano yejuamej impampa tla mikiskej.”