Tlanauatiltin para kenijki nouikaskej on tiopixkej
21
ToTEKO okijlij Moisés:
“Xkinmijli on tiopixkej yejuan ikoneuan Aarón,
maka kimatokaskej imikatlalnakayo yakaj ichanejkau,
pampa on kinmijtlakos nixpan.
2 Pero kemaj,
uelis kimatokaskej sen mikatsintli yejuan ken kitaj nisiu,
kenon sen nantli noso tajtli,
noso inkoneu yejuan tlakatl,
noso siuatl,
inmikniu yejuan tlakatl,
3 noso sen ikniu siuatl yejuan sanken* nemi intech pampa xe nonamiktia.
Impampa yejuamej,
kemaj uelis kimatokaskej niman nochiua xchipauak.
4 Pero xuelis kimatokas niman nijtlakos ipampa imikatlalnakayo yakaj yejuan ken kita isiuau.
5 ’On tiopixkej xuelis nokuatexikaloskej,
nion xuelis notentsonximaskej,
nion notetekiskej ipan imintlalnakayo ijkuak yakaj miki para kiteititiskej ika najmanaj.
6 Yej ma nochipauakan nixpan nejua iminDios,
niman maka kijtlakoskej noyekTokatsin,
pampa yejuamej nechmakaj on uentli yejuan nochi tlatla niman on tlakuajli yejuan noyaxka.
Yejua ika,
noneki on tiopixkej ma yeknemikan.
7 ’No xuelis nonamiktis iuan sen siuatl yejuan nonamaka para auilnemi,
nion siuatl yejuan san kichiualtiaj teuan ma noteka,
noso yejuan onoxotonij iuan iueuentsin,
pampa on tiopixkej tlatiochijtin notech nejua,
iminDios.
8 On tlakamej ma kintlakaitakan on tiopixkej.
Yejuamej yektlakamej* pampa yejuamej nechmakaj on uentli de tlakuajli yejuan tlatla.
Nejua nemoTEKO niyektli,
niman nejua nemechchipaua nixpan.
9 ’Tla ichpoch sen tiopixki nonamaka para auilnemi,
yejua kipijpinajtia niman ixkoyejyeua itataj.
Ika onkaj nenkitlatiskej yoltikaj.
10 ’On ueyi tlayekanki tiopixki yejuan okikuatêkijkej ika on aceite,
niman ijkon okitiochijkej para uelis kitlalis on tiopixkatlakentli* yejuan tlatiochijtli.
Ijkuak kipiyas sen ajmantli,
xuelis para nokuatepajsolos,
nion kitsayanas itlaken ken kichiuaj sekimej ijkuak najmanaj.
11 Niman no xuelis kalakis kampa nemi sen mikatsintli pampa yejua ika nijtlakos maski tla de inanaj noso de itataj.
12 Niman xuelis kisas de ipan on tabernáculo* para yas kampa mikapan,
pampa kijtlakos on tabernáculo* pampa yejua okikuatêkijkej ika on aceite yejuan tlatiochijtli.
Nejua nemoTEKO nikijtoua.
13 ’On ueyi tlayekanki tiopixki ika onkaj nonamiktis iuan sen ichpochtli yejuan xekaman noteka iuan yakaj tlakatl.
14 Xuelis nonamiktis iuan sen siuatl yejuan kaualtsintli,
noso yejuan onoxotonij iuan iueuentsin,
noso yejuan yakaj tlakatl san okichiualtij iuan onotekak,
noso yejuan nonamaka para auilnemi.
Ika onkaj nonamiktis iuan se yejuan ichpochtli yejuan xkaman onotekak iuan sen tlakatl,
niman yejuan no ken teita intech on Levitas,
15 para maka kinmijtlakos iuejkakoneuan.
Nejua nemoTEKO yejuan nikchipaua on ueyi tlayekanki tiopixki.”
Sen tlakatl yejuan xuelis tiopixki yes
16 ToTEKO okijli Moisés:
17 “Xkijli Aarón in tlanauatijli:
Aman niman para nochipa,
nion sen mouejkakoneu yejuan kipiyas itlaj tlakokojli* ipan itlalnakayo xuelis nechnisiuis para nechmakas on uentli de pan nejua,
nemoDios.
18 Nion sen tlakatl yejuan kipiya itlaj tlakokojli* ipan itlalnakayo xuelis kichiuas notekiu.
Tla xtlacha,
koxo,
tilikichtik* ipan iyak,
noso ipan inakas,
19 ikxi nekuiltik,
noso makopiltik,
20 noso tlakapantepotsotsin,
noso tla tetsokotsin,
noso ixtenextik,
noso sauati,
noso tsotsoti,
noso eunuco*,
xuelis kichiuas notekiu.
21 Nion se iuejkakoneu* on tiopixki Aarón,
xuelis nechmakas sen uentli ipan tlitl tla xajsitikaj* ipan itlalnakayo.
Nion xuelis nechmakas on pan yejuan noyaxka* nejua nemoDios.
22 Pero yejua uelis kikuas on pan yejuan kisa itech on uentli,
on tlakuajli yejuan tlatiochijtli,
noso yejuan más tlatiochijtli.
23 Pero xuelis onkalakis kampa pilkak on yekcortina nion xuelis yas ne tlaixpan* kampa kintlatiaj on yolkej pampa xajsitikaj ipan itlalnakayo.
Melauak xuelis kichiuas notekiu para maka kijtlakos notlayekkan.
Nejua,
nemoTEKO,
yejuan nikinyektlalia on tlajtlamach*.”
24 Nochi in tlanauatiltin Moisés okinmijlij Aarón,
itelpochuan niman nochimej on israelitas.