Tlanauatiltin para on yejuan ueliskej kikuaskej tlajtlamach* yejuan tlatiochijtli
22
ToTEKO okijlij Moisés:
2 “Xkinmijli Aarón niman itelpochuan ma kimaluikan on tlajtlamach* uentli tlatiochijtli yejuan nechmakaj on israelitas,
para maka san kajauilmatiskej noyektokatsin.
Nejua nemoTEKO nikijtoua.
3 ’Xkinmijli on tiopixkej tla yakaj de nemouejkakoneuan yejuan xchipauak nixpan,
niman kinisiuiya on uentli tlatiochijtli yejuan nechmakaj on israelitas,
ika onkaj nenkixtiskej niman ijkon xokaman uelis nemis nixpan.
In tlanautijli yes para mokoneuan yejuan aman nemij,
niman no yejuan nemiskej sakin*.
Nejua nemoTEKO nikijtoua.
4 ’Nion se itelpoch noso iuejkakoneu* Aarón yejuan kipiya on kokolistli itoka lepra,
noso ixika kampa tlapiasoua,
xuelis kikuas on uentli yejuan tlatiochijtli.
Pero ijkuak yonochipau,
kemaj uelis kikuas.
’No ijki,
nokauas xchipauak yakaj tiopixki yejuan kimatokas itlaj yejuan okiteloj sen mikatsintli,
noso tla kimatokas yakaj yejuan kijneua ixinachyo,
5 noso kimatokas sen yolki yejuan noteuilana ipan tlajli,
noso kimatokas sen tlakatl yejuan xchipauak.
6 On tiopixki xchipauak yes nixpan nochi on tonajli hasta tlapoyajkan,
niman xuelis kikuas on tlakuajli tlatiochijtli hasta tla yonaltij.
7 Kemaj ijkuak tlapoyajkan nokauas chipauak.
Ijkuakon,
kemaj uelis kikuas on uentli yejuan tlatiochijtli pampa on yejua itlakual.
8 Sen tiopixki xuelis kikuas inakayo sen yolki yejuan san omik,
noso yejuan okimiktijkej sekimej yolkej,
pampa tla kikuas xok chipauak yes nixpan.
Nejua nemoTEKO nikijtoua.
9 Xkinmijli on tiopixkej ma kintlakamatikan nochi in tlanauatiltin niman ijki xkipiyaskej tlajtlakojli,
niman ijkon xmikiskej.
Nejua ninemoTEKO yejuan yonikinchipau.
10 ’Nochi tlakatl yejuan xtiopixki xuelis kikuas de on uentli yejuan tlatiochijtli.
Nion on yejuan tenotsketl ichan on tiopixki noso yejuan tlakeuajli,
xueliskej kikuaskej on tlin tlatiochijtli.
11 Pero tla on tiopixki kouas sen esclavo,
noso on esclavo tlakati ichan on tiopixki,
yejua kemaj uelis kikuas on uentli yejuan tlatiochijtli.
12 Tla ichpoch sen tiopixki nonamiktis iuan sen tlakatl yejuan xtiopixki,
tla ijkon,
xok uelis kikuas on uentli tlatiochijtli yejuan kiminmakaj on tiopixkej.
13 Pero tla kaualtis noso noxotonis iuan iueuentsin,
niman xkimpiya ikoneuan,
niman oksejpa nokuepas ichan itataj yejuan tiopixki,
tla ijkon,
on siuatl oksejpa uelis kikuas on tlakuajli ken ijkuak xe teuan nemiya.
Pero para nochi tlakatl yejuan xken kita sen tiopixki xuelis kikuas on tlakuajli.
14 ’Tla yakaj nopopolos niman kikuas on uentli yejuan tlatiochijtli,
tla ijkon,
noneki kuepilis on tiopixki ichkich kech okikuaj,
niman kimakas okse 20 por ciento más.
15 Pero on tiopixkej noneki xkinkauiliskej on israelitas ma kijtlakokan on uentli yejuan nechmakaj nejua nemoTEKO,
16 pampa tla yakaj xkitlakamatis in tlanauatijli,
kipiyas tlajtlakojli niman ika onkaj kiselis icastigo.
Nejua nemoTEKO akin yoniktiochiu nochi on uentli”.
Katlejua yolkej kitemakaskej para uentli
17 ToTEKO okijlij Moisés:
18 “Xnotsa Aarón niman itelpochuan iuan nochimej on israelitas niman ijkin xkinmijli:
Ijkuak yakaj israelita noso yejuan xchanej kinekis nechmakas nejua nemoTEKO sen uentli yejuan tlatlas yejuan okiprometeroj ikatlakajtli ika kichiuas para nejua,
noso san pampa kipiya paktli yejua ika kineki nechmakas on uentli,
19 noneki kuajuikas sen yolki yejuan okichtli yejuan xkanaj tlakokojli* ipan itlakayo para uelis nikselilis.
Uelis kuajuikas sen uakax,
sen borrego noso sen chivo.
20 Pero maka kuajuikas sen yolki yejuan tlakokojli* ipan itlakayo,
pampa nejua xnikselilis.
21 ’Tla yakaj kinekis nechmakas,
nejua nemoTEKO,
sen uentli para nechyoltlalis pampa ijki onotlatolmakak nixpan ikatlakajtli,
noso san pampa kipiya paktli nechmakas sen uentli,
tla ijkon,
nechmakas sen uakax,
noso sen borrego,
yejuan xkanaj tlakokojli* ipan itlakayo para uelis nikselis.
22 Maka xnechmakakan nejua,
nemoTEKO,
yolkej yejuan xtlachaj,
noso tlakokoltin,
noso metskojyopostekkej,
noso mapostekkej,
noso kipiyaj tsotsomej yejuan temalkisaj,
noso sauayojkej,
noso kipiyaj itlaj okse kokolistin.
Kenin yolkej maka kaman xnechmakakan para sen uentli yejuan tlatlas,
niman yejuan kiuentlaliaj ipan notlaixpan* nejua nemoTEKO.
23 Pero tla nenkipiyaj sen okichuakax,
noso sen borreguito yejuan kipiya ikxiuan chijchikotikej,
tla ijkon,
kemaj uelis nennechmakaskej ken sen uentli yejuan san nenkixtiaj ipan nemoyojlo.
Pero in kenin yolki xuelis nennechmakaskej para sen uentli yejua ika nenkitlaxtlauaskej itlaj tlajtolmakalistli nixpan.
24 Ijkuak nemajsiskej ipan nemotlal,
nenkintlakamatiskej in tlanauatiltin.
Xuelis nennechmakaskej nejua nemoTEKO sen yolki yejuan tlakokojli* ipan ixiteuan,
noso okintekilijkej,
noso okixiteuitekkej.
25 No maka nenkinkauiliskej on yejuan xchanejkej ma kinuajuikakan kenin yolkej para uentli ken tlakuajli para nejua nemoDios,
pampa on yolkej yejuan tlakokoltin ipan intlakayo nejua xnikinselis.”
Kenijki kinmiktiskej on yolkej yejuan para uentli
26 ToTEKO okijlij Moisés:
27 “Ijkuak tlakatis sen becerro,
sen borreguito,
noso sen chivito,
noneki nokauas iuan inanaj chikome tonajli.
Pero ijkuak kipiyas chikueyi tonajli,
ye uelis nenkitekitiltiskej para sen uentli yejuan nenkitlatiskej para nejua nemoTEKO.
28 Sa no ipan on tonajli maka nenkimiktiskej sen vaca niman ikoneu,
noso sen borrega niman ikoneu.
29 Ijkuak nenechmakaskej sen uentli para tlajsojkamatilistli,
nennechmakaskej ken nejua nikneki para uelis nemechselilis.
30 Noneki nenkikuaskej sa no ipan on tonajli ijkuak nennechmakaskej.
Xuelis nenkauaskej achijtsin para uajmostla.
Nejua nemoTEKO nemechijlia.
31 ’Xkintlakamatikan notlanauatiluan.
Xchiuakan nochi yejuan nemechnauatia.
Nejua nemoTEKO nemechijlia.
32 Maka xkijtlakokan noyektokatsin.
Noneki nochimej on israelitas kimatiskej ika niyektli.
Nejua ninemoTEKO akin nemechtiochiua,
33 niman onemechkixtij Egipto para ninochiua nemoDios.
Nejua nemoTEKO nemechijlia.”