Tlanauatijli para maka kimpiyaskej iminídolos
13
’Tla nemotsajlan nonextia yakaj yejuan noteneuas tiotlajtojketl noso yejuan kijtos ika okiselij sen temiktli itech Dios,
niman kijtos ika okitak ipan temiktli itlaj nochiuas,
2 niman tla saman melauak onochiu on tlen omechijlij nochiuas,
niman kemaj mechijlis:
‘Aman tiauij ma tikintokakan on dioses yejuan nemejuamej xnenkinmixmatij,
niman ma tikinmauistilikan,’
3 tla ijkon,
maka xkakikan on tlen mechijlia.
Maka xkakikan pampa nemoTEKO Dios san mechtlatlata,
para ijkon kimatis tla nenkitlajsojtlaj* yejua,
ika nochi nemoyojlo niman ika nochi nemoalma.
4 Xneltokakan niman xtlakaitakan san nemoTEKO Dios.
Xtlakamatikan itlanauatiluan.
Xtlakamatikan on tlen mechijlia.
San yejua xtekipanokan niman nochipa itech xmouikakan.
5 Xmiktikan on tiotlajtojketl noso on temikketl yejuan mechijlia xkauakan nemoTEKO Dios yejuan omechmanauij kampa mechpiyayaj esclavos ipan on tlajli Egipto.
Xmiktikan pampa kinekiya mechxelos itech on ojtli yejuan toTEKO omechnauatij xtokakan.
Ijkon nenkixtiskej on tlen xkuajli nemotech.
6 ’Tla sano mokniu,
noso mochpoch,
noso motelpoch,
noso mosiuau yejuan tiktlajsojtla,
noso sen motlajsojkaikniu mitsichtakaijlia para xkinmauistili on oksekimej dioses yejuan tejua nion moachtojtajuan xonenkimixmatkej,
7 imindioses on tlakamej yejuan onokej nisiu,
noso uejka,
noso yejuan onokej ipan nochi tlaltikpaktli,
8 maka kaman xmokauilikan ma mechkajkayauakan,
nion maka xkakikan.
Nion maka xkiknelikan on tlakatl,
nion maka xmanauikan.
9 Yej xmiktikan.
Tejua achtoj tiktemojmotlas,
niman kemaj kej on oksekimej israelitas kitemojmotlaskej.
10 Xtemojmotlakan hasta kaman miki,
pampa kinekiya mechxelos itech nemoTEKO Dios yejuan omechkixtij ipan on tlajli Egipto kampa nenesclavos katkaj.
11 Ijki nochimej on israelitas kimatiskej niman nomojtiskej,
niman xok yakaj kinekis kichiuas on tlen sanoyej xkuajli.
12 ’Tla nenkakiskej ika ipan sen ueyikalpan yejuan nemoTEKO Dios yomechmakak para ompa nenchantiskej,
13 yopeu nemij tlakamej yejuan xkitlakamatij Dios,
niman kintlamachilispolouaj on chanejkej de nemoueyikalpan para ma kinmauistilikan dioses yejuan xnenkimixmatij,
14 tla ijkon,
noneki kuajli xtetlaltoltikan de on tlen nochiua.
Niman tla melauak nochiua on tlen kijtouaj,
niman on tlakamej kichiuaj on tlen toTEKO sanoyej kualania,
15 xkinmiktikan ikan espada nochimej on chanejkej de on ueyikalpan iuan nochi iminyolkauan,
niman xkinxoxotonilikan nochi on tlen ompa onkaj.
16 Nenkisentlaliskej nochi on tlajtlamach* yejuan patioj itlajkotian on plaza,
niman nenkitlatiskej on ueyikalpan ken sen uentli yejuan tlatla para nemoTEKO Dios.
Niman ijkon,
on kalpan nokauas xoxotonki para yeyika niman xokaman kiyenkuiliskej.
17 ’Maka nenkuiskej itlaj yejuan ye ika onkatka para tlatlas,
niman toTEKO xkaman kualanis nemouan.
Yej mechiknelis niman kichiuas para xmiyekiyakan ijkon ken okintlajtolmakaka ika itokatsin nemoachtojtajuan.
18 Ijkon nochiuas tla nenkitlakamatij itlanauatiluan nemoTEKO Dios yejuan aman nemechmaka,
niman tla nenkichiuaj on tlen melajki ixpan toTEKO.