On israelitas uelis kimauistiliskej toTEKO san ipan on tabernáculo
12
’In yejua tlanauatiltin niman leyes,
yejuan nemejuamej ika onkaj nenkintlakamatiskej ipan nochi nemonemilis,
ipan on tlajli yejuan inTEKO niman inDios nemoachtojtajuan mechmakas para nemoyaxka* yes.
2 ’Ijkuak nenkimoyaxkatiskej on tlajli,
nochi tlami xkinxoxotonikan kampa on tlakamej kinmauistiliaj imindioses ipan tepemej,
ipan tepetsitsimej niman itsintlan uejueyi kojtin* majmajyeualtikej.
3 Xkintsineuakan nochi intlaixpanuan*,
xkintlajtlapanakan on temej yejuan kinmauistiliaj,
niman xkintlatikan on kojtin* yejuan kinmauistiliaj,
niman xkinxoxotonikan nochi iminixneskayouan imindioses.
Xkimpopolokan para maka sa kaman ma kimelnamikikan.
4 ’Maka nenkimauistiliskej nemoTEKO Dios ijkon ken on tlakamej kinmauistiliaj imindioses.
5 Yej toTEKO kitlapejpenis sen tlajli itech semej nemotribus kampa uelis nennemiskej ixpan,
niman ompa uelis nenkonmauistiliskej.
6 Ompa nenkinuikaskej yolkej yejuan nenkinmiktiskej niman nenkintlatiskej para nenkimakaskej tetlakaitalistli toTEKO.
Niman no ompa nenkiktiliskej nemodiezmo*,
on uentli yejuan nenkixtiaj impan nemoyojlo,
on uentli yejuan nenkiprometerouiliskej toTEKO,
on oksekij uentli yejuan san nenkinekiskej nenkimakaskej,
niman on uentli de inyenkuiyokoneuan nemouakaxuan niman nemoborregos.
7 Nentlakuaskej ompa ixpan nemoTEKO Dios.
Niman iuan nemofamilias nempakiskej ipampa on tlakyotl yejuan kisas itech nemotekiu pampa on yejua ika yomechtiochiu nemoTEKO.
8 ’Ompa xok ijki nenkichiuaskej ken aman tikchiuaj nikan kampa cada se kichiua tlen yejua kineki,
9 pampa hasta aman nemejuamej sanken* xenemajsij kampa nemoseuiskej ipan on tlajli yejuan nemoTEKO Dios mechmakas.
10 Pero ijkuak yonenkipanokej on río Jordán niman ye nenchantij ipan on tlajli yejuan toTEKO mechmaktilis,
xok nenkipiyaskej nemotlauelikniuan yejuan mechyejyeualojtiaskej,
niman xok nenmojkanemiskej.
11 Kemaj ne kampa nemoTEKO Dios kitlapejpenis kampa onyas itabernáculo kampa kitlakaitaskej itokatsin,
nenkiuentlaliliskej nochi yejuan yonemechijlij:
yolkej yejuan nenkinmiktiskej niman nenkintlatiskej para nenkimakaskej tetlakaitalistli toTEKO,
nemodiezmo*,
on uentli de tlaxtlauali,
on uentli yejuan onenkiprometerouilijkej toTEKO yejuan ikatlakajtli.
12 Niman ixpan nemoTEKO Dios neniluichiuaskej san sekan iuan nemokoneuan niman iuan nemotekitkauan,
niman no iminuan on levitas yejuan chantij nemotech pampa yejuamej xokiminmakakej nion sen tlajli para inyaxka yes.
13 ’Pero maka nenkinuentlaliskej yolkej yejuan nochi tlatlas para toTEKO san kanon nenkinekiskej.
14 San uelis nenkichiuaskej kampa nemoTEKO Dios kitlapejpenis kampa onyas itabernáculo itech semej nemotribus.
Ompa nenkichiuaskej nochi on tlen yonemechnauatij.
15 ’Pero uelis nenkinmiktiskej oksekimej yolkej,
niman nenkikuaskej iminnakayo ipan nemokalpanuan kaman nenkinekiskej,
san kech ika nemoTEKO Dios mechtiochiuas.
Uelis nenkikuaskej nemochimej* tla nenchipajkej noso xnenchipajkej ixpan toTEKO.
On nakatl nenkikuaskej,
ken nakatl yeskia de on yolki itoka gacela noso masatl.
16 Pero on yestli maka nenkikuaskej,
yej nenkitoyauaskej ipan tlajli ken atl yeskia.
17 ’Xuelis nenkikuaskej ipan nemokalpan nemodiezmo* de trigo,
de nemovino,
noso de nemoaceite.
Nion xuelis nenkikuaskej inyenkuiyokoneuan nemovacas,
nion inyenkuiyokoneuan nemoborregas,
nion on uentli yejuan onenkiprometerouilijkej yejuan ikatlakajtli para nenkimakaskej toTEKO,
nion on uentli yejuan san nenkinekiskej nenkimakaskej.
18 Nochi on uentli san uelis nenkikuaskej ixpan nemoTEKO Dios,
ne ipan on tlajli kampa yejua kitlapejpenis.
Ompa itech nemoTEKO Dios nenkikuaskej san sekan iuan nemokoneuan,
nemotekitkauan niman on levitas yejuan chantiskej nemouan.
Ijkon san sekan uelis nempakiskej ipampa on tlen nenkiseliskej ipan nemotekiu.
19 Ijkuak nenchantiskej ipan on tlajli,
maka kaman nenkelkauaskej nenkiminmakaskej tlen nenkipiyaj on levitas yejuan nemouan chantiskej.
20 ’Ijkuak nemoTEKO Dios yokueyikatilij nemotlal ijkon ken omechprometerouilij,
tla nemejuamej nenkuasnekiskej nakatl,
uelis nenkikuaskej san kamanon.
21 Tla uejka nenchantij de on tlajli kampa toTEKO Dios okitlapejpeni kampa onyas itabernáculo,
uelis nenkinmiktiskej nemouakaxuan,
niman nemoborregos yejuan toTEKO yomechmakak,
niman uelis nenkikuaskej nochi tlen nenkinekiskej ompa kampa nemejuamej nenchantiskej ijkon ken yonemechnauatij.
22 Xkuakan no ijki ken nenkikuaskiaj on nakatl de on yolki gacela noso masamej.
Nemochimej nemejuamej uelis nenkikuaskej,
tla nennemij chipajkej noso xchipajkej ixpan toTEKO.
23 Pero maka nenkikuaskej on yestli,
pampa ipan on yestli onkaj nemilistli.
Ijkon tej,
xkuajli nenkikuaskej on nemilistli iuan on nakatl.
24 Maka nenkikuaskej on yestli,
yej xtoyauakan ipan tlajli ken atl.
25 Maka xkuakan para kuajli nennemiskej nemejuamej niman nemokoneuan.
Kuajli nennemiskej pampa nenkichiuaj on tlen melajki ixpan toTEKO.
26 On tlajtlamach* yejuan yonenkiyaxkatijkej toTEKO para uentli,
niman nochi on uentli yejuan onenkiprometerojkej,
nenkimakaskej ne ipan on tlajli kampa toTEKO kitlapejpenis.
27 Niman ompa ipan itlaixpan* nemoTEKO Dios nenkimakaskej on uentli yejuan nochi tlatla.
Nenkimakaskej ome uentli,
on nakatl niman iminyesyo on yolkej.
Iminyesyo nenkitotoyauaskej tlapani ipan itlaixpan* nemoTEKO Dios,
pero on nakatl uelis nenkikuaskej.
28 ’Xkakikan niman xtlakamatikan nochi on tlen yonemechnauatij,
para ijki nemejuamej niman nemokoneuan kuajli nennemiskej nochipa,
pampa nenkichiuaj on tlen kuajli,
niman yejuan melajki ixpan nemoTEKO Dios.
Maka kaman xkinmauistilikan on ídolos
29 ’Ijkuak nemoTEKO Dios yotlan kinxoxotonia on naciones yejuan nemejuamej nenkiseliskej,
niman ijkuak ompa ye nenchantij,
30 xpiyakan cuidado maka no ijki nenkichiuaskej ken yejuamej.
Maka ijkin xtetlajtoltikan de imindioses:
“¿Ken ijki kintekipanouayaj imindioses on naciones para nejua no ijki nikintekipanos?”
31 Maka xmauistilikan nemoTEKO Dios ijkon ken yejuamej kinmauistiliaj imindioses pampa yejuamej kichiuaj miyek tlajtlamach* yejuan toTEKO sanoyej kitlauelmati.
Yejuamej hasta kintlatiaj inkoneuan ken uentin para imindioses.
32 ’Xtlakamatikan nochipa in tlanauatiltin yejuan yonemechnauatij.
Maka seki nenkixtiliskej,
nion maka seki nenkitlaliliskej in tlanauatiltin.