Iueyilis toTEKO
11
’Aman tej,
nochipa xtlajsojtlakan nemoTEKO Dios niman xtlakamatikan nochi itlanauatiluan,
ileyes niman itlamachtiluan.
2 Xmatikan ika aman nemechnotsa nemejuamej tajtatin.
Xnikinnotsa nemokoneuan yejuan xkaman okimatkej ken toTEKO Dios tecastigaroua,
nion okitakej iueyilis niman nochi tlen ueli kichiua ikan iueyi poder.
3 Nemejuamej nenkelnamikij on neskayomej niman on uejueyi milagros* yejuan toTEKO okichiuilij on rey niman nochi on país de Egipto.
4 Niman nenkelnamikij on tlen okinchiuilij on soldados de Egipto iuan incaballos,
incarretas de guerra,
niman kenijki okinamimiktij ipan on Mar Rojo ijkuak mechajtojtokayaj.
ToTEKO otlan okimpopoloj para yeyika.
5 No nenkelnamikij kenijki toTEKO omechcuidaroj ipan on xalpatlajkan hasta ijkuak onenmejkokej nikan,
6 niman on tlen okinchiuilij Datán niman Abiram,
ikoneuan Eliab,
yejuan iuejkakoneuan Rubén.
Otlapou on tlajli niman okintoloj iuan nochimej iminfamilias niman iminkaluan iuan nochi on tlen kipiyayaj.
Nochi in onochiu imixpan nochimej on israelitas.
7 Sano nemejuamej onenkitakej nochi on uejueyi tlajtlamach* yejuan okichiu toTEKO.
On israelitas kiseliskej tlatiochiualistli ipan on kuajli tlajli
8 ’Yejua ika,
xtlakamatikan nochi on tlanauatiltin yejuan aman yonemechmakak para ijkon nenkojtikej yeskej niman uelis nemoyaxkatiskej on tlajli,
9 niman para nenchantiskej miyek xipan ipan on kuajli tlajli yejuan toTEKO okimprometerouilij ika itokatsin nemoachtojtajuan para mechmakas nemejuamej yejuan neniuejkakoneuan.
Mechmakas on tlajli kampa sanoyej tlatlaki niman xitlaj* poliui.
10 On tlajli yejuan nenkimoyaxkatiskej,
xijki ken on tlajli de Egipto kampa nemejuamej onenkiskej.
Ompa nenkitôkayaj on xinachtli,
niman nenkatekiayaj ken onenkichikej kampa nemohuertas katkaj.
11 Pero on tlajli kampa nemajsiskej para nemoyaxkatiskej,
on sen tlajli kampa onkaj on tepemej niman ixtlauamej.
Niman on tlajli patsiuis ikan kiautli.
12 On sen tlajli yejuan toTEKO Dios cuidaroua desde ijkuak ipeuyan on xipan hasta itlamiyan.
13 ’Tla nemejuamej nenkintlakamatij in tlanauatiltin yejuan aman yonemechmakak,
niman nenkitlajsojtlaj* nemoTEKO Dios,
niman nenkipanouaj ika nochi nemoyojlo,
niman ika nochi nemoalma,
14 yejua kichiuas para kiauis ijkuak nonekis.
Mechmakas on tlakiskatlaj kiautli niman on atliuetskatlaj*,
para on tlajli mechmakas kuajli pixkalistli de trigo,
de aceite niman de vino.
15 No ijki,
kichiuas ma noskalti miyek sakatl para nemoyolkauan,
niman nemejuamej nenkipiyaskej miyek tlakuajli hasta kampa nemixuiskej.
16 Pero xpiyakan cuidado para maka mechkajkayauaskej niman nenkitlalkauiskej toTEKO.
Maka nenkinmauistiliskej oksekimej dioses,
niman maka nemotlakuantelketsaskej imixpan,
17 pampa tla ijkon nenkichiuaskej,
toTEKO sanoyej kualanis nemouan niman xmechajtitlanilis kiautli.
Kemaj on tlajli xok mechmakas itlakyo,
niman saniman nenmikiskej ipan on kuajli tlajli yejuan toTEKO mechmakas.
Xkinmachtikan nemokoneuan
18 ’Aman tej,
xkejeuakan in tlanauatiltin ipan nemoyojlo niman ipan nemotlamachilis.
Xsalokan ipan nemoma niman nenmixkuatipan on kuetlaxtli,
yejuan kimpiya in tlanauatiltin.
19 Xkinmachtikan nemokoneuan in tlanauatiltin.
Xkintlajtlajtouilikan ipan nemochan,
ipan ojtli ijkuak nennejnemij,
ijkuak ye nenkochiskej,
niman ijkuak nenmokuiteuaskej.
20 Xkijkuilokan ipan on kojtin* yejuan ipan salijtikaj nemotsakuijlou,
niman ipan intsakuijlouan nemokaluan,
21 para ijki nemejuamej niman nemokoneuan nenchantiskej sanoyej uejkauis ipan on kuajli tlajli yejuan toTEKO okintlajtolmakak ika itokatsin nemoachtojtajuan,
ijkon ken youejkau onkaj cielo ipan in tlaltikpaktli.
22 ’Tla nenkintlakamatij nochi in tlanauatiltin yejuan aman nemechnauatia,
niman tla nenkitlajsojtlaj* nemoTEKO Dios niman nenkitokaj iojui,
23 toTEKO kintotokas nemoyakapan nochimej on tlakamej.
Niman nemejuamej nenkimoyaxkatiskej intlal on naciones yejuan más uejueyimej niman más kojtikej xken nemejuamej.
24 Nochi tlajli yejuan nenkicholoskej nemoyaxka* yes.
Nemotlal uajpeuas desde ne xalpatlajkan kampaka sur,
niman ajsis ipan on tlajli Líbano kampaka norte,
niman desde on río Éufrates kampaka ikisayan tonaltsintli niman ajsis hasta on ueyi Mar Mediterraneo kampaka ikalakiyan tonaltsintli.
25 Xakaj uelis mechixnamikis,
pampa toTEKO Dios kichiuas para ma nomojtikan,
niman para ma mechmakajsikan nochimej on tlakamej nochiuiyan kampaka nempanoskej,
ijkon ken yejua okiprometeroj.
26 ’Aman ipan in tonajli xtlapejpenikan tlinon nenkinekiskej,
tlatiochiualistli noso tlauelijli.
27 Nenkiseliskej tlatiochiualistli tla nenkitlakamatiskej nochi itlanauatiluan nemoTEKO Dios yejuan aman yonemechnauatij.
28 Pero nenkiseliskej tlauelijli,
tla nenkinmauistiliaj on dioses yejuan xnenkimixmatij,
tla xnenkitlakamatij itlanauatiluan nemoTEKO Dios,
niman tla nenkitlalkauiyaj on ojtli yejuan aman yonemechijlij.
29 ’Ijkuak nemoTEKO Dios yomechkalaktij ipan on tlajli yejuan nemoyaxkatiskej,
on tlatiochiualistin nentekakistiliskej ipan on tepetl Gerizim niman on tlaueliltin nentekakistiliskej ipan on tepetl Ebal.
30 In tepemej onokej okse lado de on río Jordán kampaka ikalakiyan tonaltsintli,
ipan imintlal on cananeos yejuan chantij ipan on ixtlauatl ixpan on kalpan Gilgal,
yejuan nokaua itech on auakojyoj kampa itoka More.
31 Nemejuamej ye nisiu para nenkipanoskej on río Jordán niman nenkimoyaxkatiskej on kuajli tlajli yejuan nemoTEKO Dios mechmaktilis.
Ijkuak yonenkalakkej niman ye ompa nenchantij,
32 xtlakamatikan nochi in leyes niman tlamachtiltin yejuan aman yonemechmakak.