Moisés oksejpa okiselij on pacto*
10
Kemaj toTEKO onechijlij:
“Xteki ome tepatlachtli yejuan no ijkij ken on achtoj katkaj,
niman no xchijchiua sen yekcaja de kojtli.
Kemaj xuajtlejko ipan in tepetl.
2 Nejua nikijkuilos ipan on tepatlachtli on tlajtoltin yejuan yonikijkuilojka ipan on achtojmej tepatlachtin,
yejuan tejua otikintlajtlapan.
Niman tikinmeuas ipan on yekcaja.”
3 ’Kemaj onikchijchiu sen yekcaja de on kojtli* itoka acacia,
niman oniktek on ome tepatlachtli.
Kemaj onikiktik on tepatlachtli ijkuak onitlejkok ipan on tepetl.
4 Niman toTEKO okijkuiloj ipan on tepatlachtli on majtlaktli tlanauatiltin,
ijkon ken okijkuilojka on achtoj ijkuak otlajtojka nemouan desde ijtik on tlitl ipan on tepetl ijkuak tinochimej otitosentlalijkaj.
Niman onechinmakak on tepatlachtli,
5 niman nejua oniuajtemok de on tepetl.
Kemaj onikintlalij on tepatlachtin ipan on yekcaja ijkon ken toTEKO onechnauatij,
niman aman sanken* ompa onokej.
6 (On israelitas okiskej desde itech on ameltin de Beerot-bene-jaacán,
niman oyajkej hasta Mosera.
Ompa omik Aarón niman okitokakej.
Kemaj Eleazar,
itelpoch Aarón,
yejua onochiu ueyi tiopixki.
7 De ompa okiskej niman oyajkej Gudgoda,
niman de Gudgoda oyajkej Jotbata kampa onokej miyekej ríos.
8 Kemaj ompa toTEKO okitlapejpenij itribu* Leví para kiktiskej on yekcaja yejuan kipiya on pacto* yejuan toTEKO okichiu touan.
No ijki,
okintlapejpenij para ma nemikan ixpan ken tiopixkej niman para ma tlatiochiuakan ika itokatsin toTEKO,
ijkon ken kichiuaj hasta aman.
9 Yejua ika,
on levitas xokiminmakakej iminherencia ken okiminmakakej on israelitas imikniuan,
pampa toTEKO yejua iminherencia,
ijkon ken toTEKO okinmijlij.)
10 ’Nejua oninokau ipan on tepetl 40 tonajli niman 40 yeuajli,
ken achtoj onikchijka.
Niman toTEKO oksejpa onechkak,
niman yejua ika,
xok okinek omechpopoloj.
11 Onechijlij:
“Xkinuika on israelitas niman xkinyekana ipan inojui para ma kalakikan niman ma kinoyaxkatitij on kuajli tlajli yejuan onikintlajtolmakak ika notokatsin inuejkatajuan.”
On tlen toTEKO kineki xchiuakan
12 ’Niman aman israelitas,
¿tlinon mechtlajtlanilia nemoTEKO Dios?
NemoTEKO Dios,
san kineki nemotlakaitalis niman nemotlakamatilis.
Kineki xtlajsojtlakan niman xchiuakan itekiu ika nochi nemoyojlo niman ikan nochi nemoalma,
13 niman xchiuakan nochi itlanauatiluan niman ileyes yejuan aman nemechnauatia,
para nochi kuajli kisas para nemejuamej.
14 Xmatikan ika nochi iyaxka* nemoTEKO Dios.
Iyaxka on cielo yejuan ueli tikitaj niman on cielo yejuan más tlakpak kampa xok tikajxiliaj tikitaj,
in tlaltikpaktli,
niman nochi yejuan ipan onkaj.
15 Pero toTEKO okintlajsojtlak* nemoachtojtajuan,
niman okintlapejpenij san yejuamej,
niman sakin*,
nemejuamej yejuan neniuejkakoneuan.
Omechtlapejpenij de nochimej on tlaltikpaktlakamej ijkon ken aman nenkitaj.
16 ’Aman tej,
xkixtikan on tlen xkuajli ipan nemoyojlo,
niman maka sa xmoyoltechikauakan ixpan toTEKO.
17 Ijkon xchiuakan pampa nemoTEKO Dios yejua Dios yejuan más ueyixtikaj xken on oksekimej yejuan kinkuitia dioses.
Niman yejua toTEKO más ueyixtikaj xken on oksekimej yejuan kinkuitiaj tetekouan.
Yejua más ueyixtikaj Dios,
sanoyej temojtij niman nochi ueli kichiua.
Yejua xakaj kichikoita,
nion kiselia tomin ken ichtakatlaxtlauijli.
18 Yejua kinchiuilia tlen melajki yejuan iknomej niman siuakaualtsitsimej.
Kintlajsojtla niman kinmaka tlakuajli niman tlakentin on xchanejkej yejuan chantij nemouan.
19 Nemejuamej tej,
xkintlajsojtlakan* on xchanejkej pampa nemejuamej no xnenchanejkej katkaj ipan on país Egipto.
20 ’Xtlakaitakan nemoTEKO Dios,
niman san yejua xmauistilikan.
Xmotemakakan san yejua itech,
niman ijkuak ika onkaj nenkichiuaskej sen tlajtolmakalislti ixpan,
xchiuakan san ika itokatsin.
21 Xkueyiteneuakan pampa yejua nemoTEKO Dios yejuan okichiu on uejueyi tlamauisoltin,
niman on uejueyi tlajtlamach* temojtij yejuan yonenkitakej.
22 Ijkuak nemouejkatajuan oajsikej Egipto,
katkaj san 70 tlakamej.
Pero aman nemoTEKO Dios sanoyej yomechmiyekilij ken on sitlalimej yejuan onokej ipan cielo.