On israelitas tetlaniskej ika iueyi poder toTEKO
9
’Xkakikan israelitas.
Aman nenkipanoskej on río Jordán niman nenkimoyaxtiskej intlal on naciones yejuan más uejueyimej niman más kojtikej xken nemejuamej,
yejuan kipiyaj uejueyikalpanmej niman kuajli yeualtsakutokej ikan tepantli sanoyej ueuejkapanmej.
2 On tlakamej yejuan ompa nemij sanoyej kojtikej niman uejueyimej ken iuejkakoneuan Anac.
Nemejuamej nenkixmatij on tlajtojli yejuan kijtoua:
“¿Akinon ueli kinmixnamiki iuejkakoneuan on ueyi tlakatl Anac?”
3 ’Aman tej,
noneki nenkimatiskej ika nemoTEKO Dios yejua mechyekanas.
Xmatikan ika yejua ken sen tlitl yejuan nochi kitlatia,
niman nenkitaskej ken kinmiktis niman kintlajyouiltis on naciones.
Nemejuamej nenkinkixtiskej niman nenkintlaniskej amanaman,
ijkon ken toTEKO yomechijlij.
4 ’Ijkuak nemoTEKO Dios yokinkixtij nemotech,
maka nemojliskej:
“Tejuamej techtoaroua tikseliskej in kuajli tlajli pampa tiyolmelajkej ixpan toTEKO.
Yejua ika,
techmaka.”
¡Ka!
On xmelauak.
ToTEKO kintotokas on tlakamej nemoyekapan pampa sanoyej tlajtlakolejkej.
5 Ka,
xpampa nenkuajkualtin noso kuajli nenkichiuaj.
Yejua kintotoka on tlakamej ipampa intlajtlakoluan niman no pampa toTEKO ika itokatsin kichiuas on tlen okintlajtolmakak nemoachtojtajuan Abraham,
Isaac niman Jacob.
6 Xmatikan ika toTEKO Dios xmechmaktilia on kuajli tlajli pampa nennemij melajki.
On xmelauak.
Nemejuamej sanoyej nenyoltechikajkej.
Ijkuak on israelitas otlajtlakojkej
7 ’Maka kaman nenkelkauaskej ika nemejuamej onenkualanijkej nemoTEKO Dios ipan on xalpatlajkan,
desde on tonajli ijkuak onenkiskej ipan on país Egipto hasta ijkuak onemejkokej nikan,
nochipa xipan onenkitakej.
8 ’Ipan on tepetl Sinaí onenkualanijkej toTEKO,
niman ika sanoyej okualan ne mouan hasta kinekiya mechpopolos.
9 Nejua onitlejkok ipan on tepetl para onikinkuito on ome tepatlachtli yejuan kipiya ipacto* toTEKO yejuan okichiu nemouan.
Niman ompa oninokau 40 tonajli niman 40 yejuajli.
Xitlaj onikuaj,
nion xitlaj* onikonik.
10-11 Ijkuak opanok 40 tonajli niman 40 yeuajli,
toTEKO onechmakak on ome tepatlachtli kampa yejua okijkuiloj on tlanauatiltin yejuan omechijlijka ikuapan on tepetl ijtik on tlitl ipan on tonajli ijkuak tinochimej otitosentlalijkej.
12 Kemaj onechijlij:
“Xisiui,
amanaman xtemo pampa on israelitas yejuan otikinkixtij Egipto yonixpolojkej.
Amanaman okikajkej on kuajli ojtli yejuan onikinnauatij ma kitokakan.
Okipatlakej oro niman yokinochijchiuilijkej sen ídolo.”
13 ’No ijki,
toTEKO onechijlij:
“Yonikitak ika on israelitas sanoyej tsontekonchikajkej*.
14 ‘Xmejkuani pampa nikinmiktis niman nikimpopolos imintoka ipan in tlaltikpaktli.
Pero motechkopa nikchiuas sen nación yejuan más kipiyas poder,
niman más miyekej yeskej xken yejuamej.”
15 ’Ijkuak oniuajtemok de on tepetl yejuan tlikuitikatka,
nikuajkiya ipan nomauan,
on ome tepatlachtli yejuan kipiya on pacto*.
16 Pero onikitak ika nemejuamej yonentlajtlakojkej itech toTEKO,
niman onenkipatlakej oro,
niman onenkimochijchiuilijkej sen becerro.
Ijkon onenkitlalkauijkej on kuajli ojtli yejuan toTEKO omechnauatij xtokakan.
17 On ome tepatlachtli yejuan nikuajkiya ipan nomauan,
inka onitlamotlatiaj ipan tlajli,
niman otetlajtlapankej nemixpan.
18 Sakin,
oksejpa oninotlakuantelkets ixpan toTEKO ken yonikchijka achtoj 40 tonajli niman 40 yejuajli.
Xitlaj onikuaj,
nion xitlaj* onikonik.
Ijkon onikchiu pampa sanoyej onentlajtlakojkej,
niman sanoyej onenkualanijkej toTEKO.
19 Nejua onikmakas itlauel toTEKO nemopampa,
pampa yejua kinekiya mechmiktis.
Pero toTEKO oksejpa onechkak.
20 ToTEKO no sanoyej kualantikatka iuan Aarón niman kinekiya kimiktis,
pero nejua onikchiu oración ipampa,
niman ikon onikmanauij.
21 Kemaj onikontilan on becerro yejuan nemejuamej onenkimochijchiuilijkej niman yejuan ika onentlajtlakojkej,
niman onikontlajkal ipan tlitl.
Kemaj,
ijkuak kualtsin yonikuechtilij,
onikonxinij ipan on ayajtok yejuan uajtemoua ipan on tepetl.
22 ’No ijki,
onenkualanijkej toTEKO ijkuak nennemiyaj Tabera,
niman Masah niman Kibrot-hataava.
23 Niman ijkuak toTEKO omechnauatij xkisakan desde itech on tlajli Cades-barnea para xmoyaxkatitij on kuajli tlajli yejuan yomechmakak,
xipan onenkitakej.
Xonenkineltokakej toTEKO,
nion xonenkitlakamatkej itlanauatil.
24 Desde ijkuak nejua nemechixmati nemejuamej,
nochipa xipan nenkitaj toTEKO.
25 Nejua oninotlakuantelkets miyekpa ixpan toTEKO on 40 tonajli niman 40 yeuajli,
pampa toTEKO yomechtlajtouilijka para mechpopolos.
26 ’Niman ijkin onikyemankatlajtlanilij:
“NoTEKO,
maka xkimpopolo in israelitas yejuan tejua moyaxkauan*,
yejuan tejua otikinmanauij ika moueyilis,
niman otikinkixtij ipan on país Egipto ika moueyi poder.
27 Xkimelnamiki motekitkauan Abraham,
Isaac niman Jacob.
Maka xkita inyoltechikaualis in israelitas,
nion inxompayejyeualis niman intlajtlakoluan.
28 Para maka kijtoskej ipan on país kampa otitechkixtij:
“InTEKO xouel okinuikak ipan on tlajli yejuan okimprometerouilij.
Niman ika kintlauelita,
okinkixtij de nikan san para kinmiktis ipan on xalpatlajkan.
29 Pero yejuamej mokoneuan niman moyaxkauan*.
Tejua otikinkixtij ipan on país Egipto ika moueyi poder.”