Sen tlakatl xuelis nemis san ika tlakuajli
8
’Xpiyakan cuidado para nenkintlakamatiskej nochi on tlanauatiltin yejuan aman yonemechnauatij.
Ijkon uelis kuajli nennemiskej,
niman nenmiyekiyaskej niman nenkalakiskej ipan on tlajli yejuan toTEKO okimprometerouilij nemoachtojtajuan.
2 Xkelnamikikan ken nemoTEKO Dios omechyekan ipan on xalpatlajkan 40 xipan.
Yejua omechtlajyouiltij para omechyolyemanilij niman omechtlatlatak para okimat kenijki nemotlamachilis niman para okitak tla nenkichiuaskej itlanauatil noso ka.
3 Niman maski omechtlajyouiltij niman omechmayanaltij,
sakin* omechkualtij maná,
sen tlakuajli yejuan nemejuamej niman nemoachtojtajuan xnenkixmatiyaj.
Ijkon omechititij ika xsan ikan tlakuajli uelis nemis sen tlakatl,
yej noneki kineltokas nochi itlajtoltsin toTEKO.
4 Ipan on 40 xipan,
xoijsoliu nemotlaken,
nion xonenikxipojposajkej.
5 Xmatikan ipan nemoyojlo ika nemoTEKO Dios omechcastigaroj ken sen tajtli castigaroua ikoneu ijkuak kitlatsuiteki.
On israelitas okipixkej tlatlatalistin ipan on tlajli Canaán
6 ’Xchiuakan tej,
nochi itlanauatiluan nemoTEKO Dios niman san yejua xtlakaitakan.
Xchiuakan nochi tlen yejua yomechmachtij,
7 pampa toTEKO Dios mechuikas ipan sen kuajli tlajli,
sen tlajli yejuan kipiya miyek ayajtoktsitsimej,
akueponaltin,
niman ameltin yejuan meyaj nochiuiyan ipan on ixtlauatl niman ipan tepemej.
8 On sen tlajli kampa onkaj nekutli,
trigo,
cebada,
uvas,
higueras,
granadas niman miyek olivo kojtin* yejuan itech kixtiaj aceite.
9 Ipan on tlajli nemejuamej xnenkontenmatstiaskej tlinon nenkikuaskej,
pampa xitlaj* mechpolos.
Ipan on temej yejuan ompa onkaj,
nenkinextiskej on tepostli hierro,
niman ipan tepemej nenkinextiskej on tepostli cobre.
10 Pero sakin*,
ijkuak yonentlakuajkej niman yonemixuikej,
noneki nenkimakaskej tlaxtlauili nemoTEKO Dios,
pampa omechmakak on kuajli tlajli.
Maka xkelkauakan toTEKO
11 ’Xpiyakan cuidado.
Maka nenkelkauaskej nemoTEKO Dios.
Maka nenkajkauaskej ika nenkichiuaskej nochi itlanauatiluan,
itemachtiluan,
niman ileyes yejuan yonemechnauatij aman.
12 Ijkuak nentlakuaskej niman nemixuiskej,
niman nenchantiskej ipan kuajli kaltin yejuan nenkinchijchiuaskej,
13 niman nenkitaskej ika nemoyolkauan yomiyekiyakej,
niman nemooro,
niman nemoplata yomiyekiyak niman no nochi on okseki tlajtlamach* yejuan nenkipiyaj yomiyekiyak,
14 maka nemoueyimatiskej,
nion maka nenkelkauaskej nemoTEKO Dios yejuan omechkixtij ipan on país Egipto kampa nenesclavos katkaj.
15 Yejua omechyekan ijkuak onenkistinenkej ipan on ueyi temojtij xalpatlajkan kampa nemij miyekej kouamej* pajyojkej,
kolomej,
niman kampa xonkatka atl.
Pero toTEKO okichiu ma kisa atl ipan sen ueyi tetl niman onenkipixkej para onenmatlikej.
16 Niman ipan on xalpatlajkan omechtlakualtij ikan maná,
sen tlakuajli yejuan nemoachtojtajuan xkixmatiyaj.
Yejua omechtlajyouiltij para omechyolyemanilij niman omechtlatlatak para sakin* nochi kuajli nochiuas para nemejuamej.
17 ’Maka kaman nenkinemiliskej ika nochi on ricojyotl yejuan nenkipiyaskej,
onenkitlankej ika nemochikaualis.
18 Xkelnamikikan nemoTEKO Dios,
pampa yejua mechmaka chikaualistli,
para nenkipiyaskej on ricojyotl.
Ijkon yejua tlamis kichiuas on pacto* ken okintlajtolmakak ika itokatsin nemoachtojtajuan.
19 ’Pero tla nemejuamej nenkelkauaj nemoTEKO Dios,
niman nenkintokaj oksekimej dioses,
niman nekinmauistiliaj,
nejua nemechmelajkaijlia aman ika nenpopoliuiskej nemochimej*.
20 Tla xnenkitlakamatij nemoTEKO Dios,
no ijki nemopan nochiuas ken impan nochiuas on naciones yejuan toTEKO kimpopolojtias kampaka nempanotiaskej.