On iluimej ipan cada xipan
16
’Ijkuak ajsis on metstli Abib,
xchiuakan on iluitl Pascua para tetlakaitalistli itech nemoTEKO Dios,
pampa onochiu ipan sen tlayoua de on metstli ijkuak nemoTEKO Dios omechkixtij ipan on tlajli Egipto.
On iluitl itoka Pascua
2 ’Ipan on iluitl Pascua,
nenkiuentlaliliskej nemoTEKO Dios uakaxtin niman borregos,
ne kampa yejua kitlapejpenis para onyas itabernáculo para kitlakaitaskej itokatsin.
3 On yolki tlauentlalijli nenkikuaskej ikan pan yejuan xkipiya tlaxokolilistli*.
Chikome tonajli nenkikuaskej pan yejuan xkipiya tlaxokolilistli*.
(Yejua on pan itoka ‘Pan de Tlajyouilistli’,
pampa xonenmajxilijkej para nenkichijchiuaskej pan iuan tlaxokolilistli* ijkuak onenkiskej amanaman ne Egipto.)
Ijkon ipan nochi nemonemilis nenkelnamikiskej on tonajli ijkuak onenkiskej Egipto.
4 Nochi on chikome tonajli maka yakaj nenkaualiskej kipiyas tlaxokolilistli* ipan nochi nemoueyitlalpan.
Niman on nakatl yejuan nenkiuentlaliskej ipan on tlapoyajkan de on achtoj tonajli,
maka itlaj nokauas para uajmostla kualkan.
5 ’Maka nenkuentlaliskej on uentli de Pascua san kanon ipan san katlejua kalpan yejuan nemoTEKO Dios mechmakas.
6 Yej san uelis nenkichiuaskej ne ipan on tlajli kampa yejua kitlapejpenis para onyas itabernáculo kampa kitlakaitaskej itokatsin.
Niman nentlauentlaliskej tlapoyajkan ijkuak ye kalaktikaj tonaltsintli,
pampa ipan on hora onenkiskej ipan on tlajli Egipto.
7 Inakayo on yolki yejuan nenkiuentlaliliskej nemoTEKO noneki nenkikxitiskej niman nenkuaskej kampa nemoTEKO Dios kitlapejpenis para onyas itabernáculo.
Niman kemaj uajmostla kualkan nenmokuepaskej nemochan.
8 Niman nochi on chikuasen tonajli de on iluitl nenkikuaskej pan yejuan xkipiya tlaxokolilistli*.
Niman kampa ika chikome tonajli,
nemochimej* nemosentlaliskej para nenkimauistiliskej nemoTEKO Dios.
Niman ipan on tonajli xnenkichiuaskej nion se tekitl.
On iluitl itoka Pixkalistli
9 ’Ijkuak yopanok chikome semana desde ijkuak peuas nenkipixkaskej on trigo,
10 nenkichiuaskej on iluitl itoka Pixkalistli para nenkimauistiliskej nemoTEKO Dios.
Niman nenkimakaskej uentli yejuan ipan nemoyojlo nenkixtiaj,
niman nenkimakaskej ijkon kech yejua yomechtiochiuilij.
11 Niman neniluichiuaskej ikan ueyi pakilistli ixpan nemoTEKO Dios ne kampa yejua kitlapejpenis para ompa onyas itabernáculo para kitlakaitaskej itokatsin.
Nemejuamej nenkichiuaskej san sekan iuan nemokoneuan,
nemoesclavos,
on levitas,
on xchanejkej,
on iknotsitsimej,
niman on kaualtsitsimej yejuan nemij ipan nemokalpan.
12 Xkelnamikikan ika nenesclavos katkaj ipan on tlajli Egipto.
Yejua ika,
xtlakamatikan nochi in leyes.
On iluitl de Kalmatsitsimej
13 ’Ijkuak yonentlankej nenkipixkaj nemotrigo,
niman yotlan nenkipatskaj nemouvas,
nenkichiuaskej chikome tonajli on iluitl yejuan nenkitokayotiskej Iluitl de Kalmatsitsimej.
14 Xpakikan san sekan iuan nemokoneuan,
nemoesclavos,
inuan on levitas,
on xchanejkej,
on iknotsitsimej,
niman on kaualtsitsimej yejuan nemij nemokalpan.
15 ’In iluitl nenkichiuaskej para nenkimauistiliskej nemoTEKO Dios chikome tonajli,
ne ipan on tlajli kampa yejua kitlapejpenis.
Nenkichiuaskej pampa nemoTEKO Dios mechtiochiuilis nochi nemotlatok niman nochi nemotekiu yejuan nenkichiuaskej.
Niman nemejuamej sanoyej nempakiskej.
16 ’Nochimej on yejuan tlakamej noneki yaskej ixpan toTEKO Dios yexpa ipan se xipan,
ne kampa yejua kitlapejpenis.
Yaskej ipan on iluitl Pascua,
ipan on iluitl de Semanas niman ipan on iluitl de Kalmatsitsimej.
Xakaj san ma pijpilkatias ijkuak yaskej ixpan toTEKO,
17 yej noneki cada se kiktis iuen kech ika toTEKO Dios yokitiochiuilij.
18 ’Xkintlalikan jueces niman tlajkuilojkej para nochi on uejueyikalpanmej ipan cada tribu* yejuan nemoTEKO Dios mechmakas.
Ijkon xkintlalikan para yejuamej tekiuajtiskej intech on tlakamej ika kuajli inyojlo niman ken kitocaroua.
19 Maka kichiuaskej on tlen xmelajki,
nion maka techikoitaskej.
Maka kiseliskej tomin ken ichtakatlaxtlauijli pampa on kimixkuepa on tlamatkej* niman kinchiualtia para kichiuaj on tlen xmelajki.
20 ’Ika nochi nemoyojlo xchiuakan on tlen melajki.
San yejua on tlen melajki xchiuakan.
Melauak san yejua xchiuakan para uelis nemoyaxkatiskej on tlajli yejuan nemoTEKO Dios mechmakas.