Tlanauatiltin para kichiuaskej on tlen melajki
23
’Maka xtemaka sen tlajtojli yejuan xmelauak.
Nion maka iuan xmati para tiktlajtolpaleuis sen xkuajli tlakatl ika on tlen xkuajli okichiu.
2 ’Ijkuak nemij miyekej yejuan kichiuasnekij on tlen xkuajli,
maka xmokalakti iminuan.
“Nion maka tikijtos on tlen xmelauak ne ixpan on jueces san pampa más miyekej ijkon kinekij kichiuaskej.
3 Nion maka tikmanauis sen mayanki san pampa yejua sen mayanki tla tikmatstikaj xkuajli tlinon okichiu.
4 ’Tla tiknextia iuakax motlauelikniu noso ipoloko* yejuan okipoloj,
xkuikili.
5 Tla tikita ipoloko* motlauelikniu kanaj youets ikan itlamamal yejuan yetik,
maka ijki tikauas,
yej xtemoltili itlamamal.
6 ’Tla sen mayanki itlaj ika kiteixpanuiyaj yejuan xokichiu,
tejua xpaleui.
7 ’Maka xmokalakti tla yakaj kitechtiaj okichiu itlaj niman xmelauak okichiu.
Nion maka xtekauili ma kimiktikan yakaj yejuan xitlaj* okichiu.
Maka ijkon xchiua pampa nejua nikastigaros on tlakatl yejuan kipiya tlajtlakojli.
8 ’Ijkuak titetlajtolpaleuis,
maka xseli sen tlaxtlauijli san ichtaka,
pampa on yejuan kiselia tlaxtlauijli san ichtaka kiyana on tlen melauak,
niman on kichiua para on yejuan xkipiya tlajtlakojli ma kitlanikan.
9 ’Maka xtlajyouilti yejuan xchanej,
pampa nemejuamej no xnenchanejkej katkaj Egipto.
Niman nenkimatij kenijkinenkimatiyaj ijkuak nennemiyaj ipan sen tlajli yejuan xnemoyaxka.
Tlanauatiltin ika nemotlal noseuiskej cada chikome xipan niman ika nemoseuiskej cada chikome tonajli
10 ’Chikuasen xipan nentlatokaskej niman nempixkaskej ipan nemotlal.
11 Pero ijkuak ajsis on chikome xipan,
maka itlaj xtokakan.
San xkauakan nemotlal ma noseui.
Niman tla noskaltis achijtsin tlatoktli iselti,
xkinkauilikan yejuan mayankej israelitas ma pixkakan para tlakuaskej.
Niman on tlen nokaua ma kuakan tepeyolkej.
No ijki,
nenkichiuaskej ikan nemouvasayoj niman ikan nemoolivojyoj.
12 ’Ipan chikuasen tonajli xchiuakan nochi on tlen noneki nenkichiuaskej,
pero ipan on chikome tonajli ika onkaj nemoseuiskej.
No ijki,
ma noseui nemouakax niman nemopoloko.
Ma noseuikan nemoesclavos niman on yejuan xchanej.
On noseuilistli mechpaleuis nochimej nemejuamej para oksejpa nenkajsiskej chikaualistli.
13 ’Xchiuakan nochi in yejuan yonemechijlij.
Maka kaman xkinnotsakan oksekimej dioses nion maka xkinteneuakan imintoka.
Tlanauatiltin para on yeyi más ueyi iluitl ipan se xipan
14 ’Yexpa ipan se xipan tinechiluichiuilis.
15 Xchiuakan on iluitl de pan yejuan xkipiya tlaxokolilistli* ken onemechnauatij.
Xkuakan pan yejuan xkipiya tlaxokolilistli* chikome tonajli ken onemechijlij.
Nenkikuaskej ipan on metstli Abib ipan on tonajli yejuan onimitsijlij,
pampa ipan on metstli onenkiskej Egipto.
Xakaj uelis uajlas nixpan uajmapijpilkatias.
Ika onkaj nochimej nechajkuilisej sen uentli.
16 ’No ijki,
xchiuakan on iluitl de pixkilistli ijkuak peua nenkipixka on tlen onenkitokakej ipan nemotlal.
Niman no xchiuakan cada xipan on iluitl de itlamiyan pixkilistli ijkuak ye nenkisentlalijtokej nochi on tlatoktli yejuan onenkipixkej.
17 ’Yexpa ipan se xipan noneki nochimej on tlakamej uajlaskej nixpan para nechmauistiliskej,
nejua nemoTEKO niman nemoDios.
18 ’Ijkuak nenechmakaskej iyesyo sen yolki para sen uentli,
maka nennechmakaskej iuan pan yejuan kipiya tlaxokolilistli*.
Nion maka xkeuakan ichajka on yolki para nenechmakaskej uajmostla.
19 ’Ipan on achtoj tonajli de on achtoj pixkilistli,
xtlapejpenikan yejuan más kuajli de itlakyo yejuan kitlakitia nemotlal,
niman xnechajkuilikan kampa nenechmauistiliaj nejua nemoTEKO Dios.
’Maka xkikxitikan sen chivito ika ileche inan.
ToTEKO okititlan iángel para kinyekanas on israelitas
20 ’Xkita,
nejua niktitlanis noángel para ma mechcuidaro ipan ojtli,
niman ma mechuika ipan on tlajli yejuan yonemechkuektlalilij.
21 Xkakikan kuajli on tlen yejua mechijlis niman xtlakamatikan.
Maka yej xipan nenkitaskej,
pampa yejua kikti nochi notekiuajyo niman xmechtlapojpoluilis nemotlajtlakoluan tla xipan nenkitaj.
22 Pero tla melauak nenkakiskej kuajli nochi on tlen yejua mechijlia niman nenkichiuaskej nochi on tlen nemechnauatijtikaj,
nejua ninochiuas niintlauelikniuan on nemotlauelikniuan niman nikintlajyouiltis yejuan mechtlajyouiltiaj.
23 Noángel mechyekanas niman mechuikas ipan inpaís on amorreos,
heteos,
ferezeos,
cananeos,
heveos niman jebuseos.
Niman nejua nikinmiktis nemixpan.
24 Maka xmotlakuantelketsakan imixpan iminídolos on tlakamej,
nion maka xkinmauistilikan.
Maka kaman nemouikaskej ken yejuamej.
Yej xkinxoxotonikan nochi iminídolos,
niman xkinkuechtilikan nochi on temej yejuan kinmauistiliaj.
25 San nejua xnechmauistilikan,
nemoTEKO Dios,
niman nejua niktiochiuas on tlen nenkikuaj niman tlen nenkonij.
’Niman nikixtis nochi kokolistli nemotech.
26 Xnemis nion se siuatl ipan nemotlal yejuan tetsakatl* yes noso yejuan piluetsis.
Niman nikchiuas para xnemikan miyek xipan ipan in tlaltikpaktli.
27 ’Nejua niktitlanis sen ueyi nemojtijli impan nochimej on xkuajkualtin tlakamej ipan nochi naciones kampa nemajsiskej hasta xkimatiskej tlinon kichiuaskej.
Niman nikchiuas ma cholojteuakan nemixpan nochimej nemotlauelikniuan.
28 Nikintitlanis chilpanmej nemoyakapan para ma kintotokakan on heveos,
on cananeos,
niman on heteos nemixpan.
29 Pero xnikintotokas para nochimej ma kisakan san ipan se xipan.
Tla ijkon nikchiuaskia,
xok yakaj nemiskia ompa,
niman on tepeyolkej miyekixtiaskia niman mechtlaniskiaj.
30 Yejua ika,
yolik nikintotokatias nemixpan.
No ijki,
ika yolik nenkimpixtiaskej más nemokoneuan niman ijkon nemomiyekilijtiaskej para uelis nemoyaxkatiskej on tlajli.
31 ’Ijkin nikueyilis nemotlal:
Pejtos nemotlal ipan on Mar Rojo niman yas hasta on Mar Mediterráneoa.
No ijki,
pejtos ipan on xalpatlajkan de Sinaí niman tlamis ipan on río Éufrates kampaka ikisayan tonaltsintli.
Nejua nikaua ipan nemoma nochi on tlakamej yejuan nemij ipan on tlajli para xkinkixtikan.