On yestli yejuan kipeualtia on pacto* iuan toTEKO
24
ToTEKO okijlij Moisés:
—Xtlejko nikan kampa ninemi,
tejua iuan Aarón,
Nadab,
Abiú niman on 70 tlayekankej tlakamej yejuan nemouan kinyekanaj on israelitas.
Yejuamej ma nokauakan san uejka niman ma notlakuantelketsakan para nechmauistiliskej.
2 San tejua,
Moisés,
uelis tinechnisiuis nikan kampa ninemi.
On sekimej tlayekankej maka nechnisiuiskej,
niman on oksekimej israelitas xuelis tlejkoskej nikan nemouan.
On israelitas okiselijkej on tlajtojli itech toTEKO
3 Kemaj Moisés oyaj okinmijlito on israelitas nochi on tlen toTEKO okijtoj niman otlanauatij.
Niman nochimej on israelitas san se tlajtojli otlanankilijkej:
—Tikchiuaskej nochi on tlen toTEKO yokijtoj.
4 Yejua ika,
Moisés okijkuiloj nochi on tlen toTEKO okinauatij.
Niman uajmostla saniman kualkan,
onokuiteu niman okichijchiu sen tlaixpan* itsintlan on tepetl.
Kemaj okitelketskej majtlaktli uan ome temej pampa katka majtlaktli uan ome itelpochuan Israel inuan inuekakoneuan.
5 Kemaj okintitlan sekimej israelitas telpokamej ma kimakatij toTEKO uentli yejuan nochi tlatlak.
Niman no okinmiktijkej sekimej uakaxtin niman okinuentlalijkej para ma kipiyakan teyoltlalijli iuan toTEKO.
6 Moisés okikuik tlajkotipan on yestli de on uakaxtin niman okitekak ipan tlaltekomamej,
niman on okse tlajkotipan ika okajuichij on tlaixpan*.
7 Kemaj okonkuik on amamoxtli* yejuan kipiya on pacto* yejuan toTEKO okichiu inmiuan on israelitas,
niman okinomachtij imixpan nochimej.
Ijkuak yejuamej okinkakistilij nochi on itlanauatiluan toTEKO,
okijtojkej:
—Kemaj,
tikchiuaskej nochi on tlen toTEKO technauatia.
8 Niman kemaj Moisés okonkuik on yestli ipan on tlaltekomatl,
niman okinmajuichij nochimej on israelitas,
niman okinmijlij:
—Yejua in yestli yejua kipeualtia on pacto* yejuan toTEKO okichiu nemouan ijkuak omechmakak nochi in tlanauatiltin.
Moisés niman on tlayekankej otlejkokej ipan on tepetl Sinaí
9 Kemaj Moisés otlejkok ipan on tepetl iuan Aarón,
Nadab,
Abiú niman on 70 tlakamej yejuan kinyekanayaj on israelitas.
10 On israelitas tlayekankej okitakej iDios Israel.
Ompa ijkaya ipan sen piso azultik ken on kualtsin tetl yejuan itoka zafiro,
niman sanoyej chipauak katka ken cielo.
11 Niman maski on tlayekankej israelitas okitakej Dios,
xomikkej nion xitlaj* impan onochiu.
Niman san seknek otlakuajkej niman oatlikej ixpan.
Moisés otlejkok más tlakpak ipan on tepetl Sinaí
12 ToTEKO okijlij Moisés:
—Xtlejko kampa ninemi ipan in tepetl niman xnechcha ompa.
Kemaj nimitsinmakas on tepatlachtin kampa onikijkuiloj on leyes niman tlanauatiltin para tikinmachtis on israelitas.
13-14 Kemaj Moisés okinmijlij on tlayekankej tlakamej:
—Xtechchakan nikan hasta ijkuak nejua niman Josué titokuepaskej.
Nikan nokauaj Aarón niman Hur nemouan,
niman tla yakaj itlaj kipasoloua ijkuak xnak,
xkimijlikan yejuamej.
Kemaj Moisés otlejkok ipan itepeu Dios iuan Josué on itlapaleuijkau.
15 Ijkuak Moisés otlejkok más tlakpak ipan on tepetl,
sen moxtli okitlapachoj.
16 Niman iueyilis toTEKO ouajtemok ipan on tepetl Sinaí,
niman on moxtli okitlapachoj on tepetl chikuasen tonajli.
Niman ijkuak oajsik ika chikome tonajli,
toTEKO okuajnots Moisés ijtik on moxtli.
17 Niman on israelitas yejuan nemiyaj tlatsintlan onajkotlachixtikatkaj niman okitakej iueyilis toTEKO.
Para yejuamej,
onochiu ken sen tlimilinajli yejuan nochi kitlatia ne ikuapan on tepetl.
18 Kemaj Moisés otlejkotiaj iselti ipan on tepetl,
niman okalak ipan on moxtli.
Ompa onokau 40 tonajli niman 40 yeuajli.