Okinechikojkej tlajtlamach* para okichijchijkej on tabernáculo
25
ToTEKO iuan otlajtoj Moisés niman okijlij:
2 “Xkimijli on israelitas ma kisentlalikan sen uentli para nejua.
Xsentlalikan nochi on tlajtlamach* yejuan cada israelita kinekis nechmakas ikan nochi iyojlo.
3 In yejua uelis kisentlaliskej:
oro,
plata,
cobre,
4 tela yejuan morada,
azul,
niman chichiltik.
No kisentlaliskej:
lino fino,
imintsojmiyo chivos,
5 inkuetlax borregos yejuan tlapajlojkej chichiltik,
kuetlaxtin yejuan más kualtsitsimej,
kojtli* yejuan itoka acacia,
6 aceite para ika tlauiloskej,
niman ajuiyalistli para on aceite yejuan kitekitiltiaj para ika tekuatekiskej ikan aceite niman no para ika nenkichijchiuaskej kopajli yejuan ajuiyak.
7 No uelis nechmakaskej temej yejuan kualtsitsimej yejuan kuitiaj ónice niman okseki temej yejuan kualtsitsimej niman patioj para nenkualnextiskej itlakempani niman iyelpampejpech on ueyi tiopixki.
8 Xnechchijchiuilikan sen tabernáculo1 para ompa ninemis nemotlajkotian.
9 Pero noneki tikchijchiuas on tabernáculo* iuan nochi imuebles niman tlajtlamach* yejuan onyas kalijtik ijkin ken aman nimitsititis.
On yekcaja kampa keuaj on matlaktli tlanauatiltin
10 ’Xchijchiuakan sen yekcaja ikan on kojtli* itoka acacia.
Niman on yekcaja kipiyas se metro ipan majtlaktli centímetros ika ueyak niman 65 centímetros ika patlauak niman ika uejkapan.
11 Xkalauilikan oro ijtik,
tlapani niman iyeualkan.
Xtlalilikan sen kualnesyotl de oro itenyeualkan.
12 Xchijchiuilikan naui uejueyimej anillos de oro,
niman xtlalilikan sen anillo ipan cada ikxi,
ome ipan se lado niman ome ipan on okse lado.
13 No xchijchiuakan ome kojtli* ueueyakej yejuan de acacia,
niman xkalauilikan oro.
14 Niman xkinkalaktikan on kojtin* ueueyakej ipan on anillos yejuan onkaj ipan inakastlan on yekcaja para ijki uelis nenkechpanojtiaskej.
15 Maka xkinkixtilikan on kojtin* yejuan ika nenkiktiskej.
Ma nokauakan on kojtin* ipan ianillos on yekcaja.
16 Ijkuak nentlamiskej nenkichijchiuaskej on yekcaja,
ijtik xtlalikan on tepatlachtin yejuan kipiyaj on tlanauatiltin yejuan nimitsmakas.
17 ’Xchijchiuakan itentsakaa on yekcaja niman xkalauilikan oro.
Kipiyas se metro ipan majtlaktli centímetros ika ueyak,
niman 65 centímetros ika patlauak.
18 No xchijchiuakan ome querubines* de oro yejuan tlatetsotsontli ikan martillo,
niman yejuan ijkatiaskej ipan itentsaka on yekcaja.
Se querubín* ijkatias ipan se itenko niman se ipan okse itenko.
19 On ome querubines nochijkej yeskej san se ueyi nochiuas iuan itentsaka on yekcaja.
20 On querubines nijixnamiktiaskej niman tlachixtiaskej tlatsintlan ipan itentsaka on yekcaja.
Niman on querubines kipatlajtiaskej iminmastlakapal ikuapan on yekcaja para kitlapachojtiaskej.
21 Ijkuak yonentlankej nenkichijchiuaj itentsaka,
xtlalikan ijtik on yekcaja on tepatlachtin yejuan kipiyaj on tlanauatiltin yejuan nimitsmakas.
Kemaj xtsakuakan on yekcaja.
22 Niman ompa intlajkotian on querubines yejuan nemij tlapani ikuapan on yekcaja kampa nokauaskej on tepatlachtin yejuan kipiyaj on tlanauatiltin,
ompa nemechnamikis niman nemechmachistis nochi notlanauatiluan yejuan nikpiya para nemejuamej israelitas.
On mesa kampa kitlaliskej on pan yejuan kiteititia ika toTEKO nemi touan
23 ’Xchijchiuakan sen mesa ikan on kojtli* acacia.
Kipiyas 90 centímetros ika ueyak,
45 centímetros ika patlauak,
niman 65 centímetros ika uejkapan.
24 Nochi on mesa xkalauilikan oro.
No ijki,
xtlalilikan sen kualnesyotl de oro itenyeualkan.
25 On mesa xchijchiuilikan sen itenyeual de chikome centímetro uan tlajko ika uejkapan,
niman itempan xtlalilikan ikualnesyo de oro.
26 No xchijchiuilikan naui anillos de oro yejuan nenkitlaliliskej inajnakastlan kampa peuaj ikxiuan tlatsintlankopa.
27 On anillos pepechijtiaskej itech on itenyeuajlo,
niman ipan on anillos kalakiskej on kojtin* ueueyakej para ika nenkechpanojtiaskej on mesa.
28 Niman xchijchiuakan on kojtin* ueueyakej yejuan ika nenkechpanojtiaskej on mesa ikan acacia kojtli,
niman xkalauilikan oro.
29 No xchijchiuakan nochi ikan oro:
on platos,
cucharas yejuan uejueyimej,
niman uejueyimej jarros,
niman on copas para ipan nenkitekaskej uentli yejuan atki.
30 Mojmostla xtlalikan nixpan ipan on mesa on pan tlatiochijtli yejuan kiteititia ika ninemi nemouan.
On lámpara
31 ’No xchijchiuakan sen lámpara yejuan nochi oro.
Nenkichijchiuaskej itsinkaxyo,
ikojyo,
ixochimimijlouan niman ixochiponajlouan ikan oro yejuan tlatetsotsontli ika martillo.
Nochi san se ueyi tlachijchijtli yes.
32 Ikojyo on lámpara kipiyas chikuasen imakojyouan.
Yeyi imakojyouan onyaskej ipan se inakastlan niman yeyi onyaskej ipan on okse inakastlan.
33 Niman ipan cada se imakojyo kichijchiuiliskej yeyi copas yejuan nesiskej ken ixochiyo on almendra yejuan kemach ye pontikaj.
34 Niman ikojyo kipiyas naui copas yejuan no nesis ken ixochiyo sen almendra.
Cada se kipiyas imimijlo niman sen xochitl niman ixochiponajlouan.
35 De nochi on chikuasen imakojyouan yejuan kisa ipan ikojyo,
cada se kipiyas imimijlo itsintlan kampa peua imakojyo.
36 On mimiltin niman imakojyouan san se ueyi tlajchijchijtli yes iuan on lámpara yejuan nochi de oro.
Niman nochi on oro kitetsotsonaskej ika martillo.
37 ’Xchijchiuakan chikome tlauiltsitsimej niman xtlalilikan ipan on imakojyotsitsiuan on lámpara para ma tlauilo ixpan ika.
38 Niman xchijchiuakan tepostlakitskijli para ika nenkiseuiskej on tlauijli,
niman nenkichijchiuaskej kaxtsitsimej kampa xinis tlikonextli.
Xkinchijchiuakan ikan oro yejuan chipauak.
39 Xtekitiltikan 33 kilos de oro para nenkichijchiuaskej on lámpara iuan nochi on tlajtlamach* yejuan iuan notekitiltia.
40 Xkita kuajli para tikchijchiuas nochi ken nejua yonimitsititij amantsin nikan ipan in tepetl.