Tlanauatiltin ika on yejuan tlachtekij
22
’Tla yakaj kichteki sen uakax noso sen borrego niman kimiktia noso kinamaka,
ika onkaj kitlaxtlauas makuili uakax para on uakax yejuan okichtek,
noso naui borregos para on borrego yejuan okichtek.
2 ’Tla sen tlachtejketl okajsikej tlayoua ijkuak tlachtektikaj niman kimiktiaj,
on yejuan temiktia xkipiyas tlajtlakojli.
3 Pero tla ye tlajokaj kimiktiskej sen tlachtejketl,
kemaj kipiyas tlajtlakojli yejuan temiktia.
’Yejuan tlachteki ika onkaj kitlaxtlauas on kech ika patioj on tlen okichtek.
Niman tla xkipiya tomin,
ika onkaj nonamakas sano yejua para kitlaxtlauas on tlen okichtek.
4 ’Tla sen tlachteketl kinextiliaj sen uakax,
sen poloko,
noso sen borrego,
ika onkaj kitlaxtlauas okpa ichkich de on kech ika patioj.
5 ’Tla yakaj kinmakauas iyolkauan ipan campo noso ipan iuvasyoj para ma tlakuajkuakan,
niman on iyolkauan yej onkalakij ipan tetlatok noso ipan teuvasyoj,
on tlakatl ika onkaj kitlaxtlauas on tlen okixpolojkej on iyolkauan.
Kitlaxtlauas ika on yejuan más kuajli kipiya ipan itlatok noso ipan iuvasyoj.
6 ’Tla yakaj tlatlatia ipan itlal niman on tlitl panoua ipan tetlatok,
niman kitlatia on trigo yejuan yokitepayolojkaj,
noso yejuan xe kipixkaj noso kitlatia nochi on tlatoktli,
on yejuan otlatlatij ika onkaj kitlaxtlauas nochi on tlen okitlatij on tlitl.
7 ’Tla yakaj kipiyalia kuajli iyojlo okse tlakatl niman kimaka itomin noso tlajtlamach* yejuan patioj para ma keuili ichan,
niman kemaj sen tlachteketl kalakis ipan ichan niman kitlachtekilis,
tla kinextiaj on tlachteketl,
ika onkaj kitlaxtlauas okpa ichkich de on tlen okichtek.
8 Pero tla xkinextiaj on tlachteketl,
tla ijkon,
on yejuan keuaya on tlajtlamach* kuikaskej imixpan jueces de ne tabernáculo* para kitaskej tla yejua okikuik on tlen okimaktilijkej para kiteyeuiliaya.
9 ’Tla yakaj kinoyaxkatia sen uakax,
sen poloko,
sen borrego,
sen tlakentli*,
noso san tlinon yejuan okipolojkaj,
niman yakaj okse kijtos ika yejua iyaxka,
tla ijkon,
on omemej yejuan kijtouaj ika inyaxka noneki yaskej imixpan on jueces.
Niman on yejuan okitekuilij ika onkaj kikuepas okpa ichkich.
10 ’Tla yakaj kipiyalia kuajli iyojlo okse tlakatl niman kipiyaltia sen poloko,
sen uakax,
sen borrego noso itlaj okse yolki niman on yolki mikis,
noso nokokos,
noso cholos niman xakaj kimatis tlinon onochiu,
11 on tlakatl yejuan kitepiyaliaya on yolki noneki kitestigojtlalis toTEKO ika yejua xkipiya tlajtlakojli.
Niman yejuan iyaxka* katka on yolki noneki kineltokilis,
niman on okse tlakatl xitlaj* kitlaxtlauas.
12 Pero tla okichtekilijkej on yolki,
on yejuan kitepiyaliaya kitlaxtlauilis iteko on yolki kech ika patioj.
13 Pero tla on yolki yej okimiktij sen tepeyolki tekuani,
on yejuan kitepiyaliaya noneki kiteititis on tlen onokau de on yolki yejuan omik niman ijki xkitlaxtlauas.
14 ’Tla yakaj notlaneuiya sen yolki,
niman on yolki kinamikis itlaj xkuajli noso mikis ijkuak on iteko xkita,
tla ijkon,
on yejuan otlaneu ika onkaj kitlaxtlauas.
15 Pero tla iteko on yolki okitak ken omik iyolkau,
on yejuan okitlaneu xkitlaxtlauas.
Yej kitlaxtlauas san on kech notlaxtlaua sen yolki ijkuak kitlaneuij.
Tlanauatiltin ika on ken nouikaskej inuan oksekimej niman ixpan Dios
16 ’Tla saman yakaj tlakatl kikajkayaua sen ichpochtli yejuan xe kijtlanij niman kitlapololtia para iuan ma noteka,
ika onkaj kitlaxtlauilis itataj ijkon ken uajnochijtiu,
niman iuan nonamiktis.
17 Maski tla on tajtli xkinekis kimakas para iuan nonamiktis,
on tlakatl ika onkaj kitlaxtlauas ken notlaxtlaua sen ichpochtli yejuan xe kaman noteka iuan se tlakatl.
18 ’Maka xkauilikan ma nemi yakaj siuatl yejuan nauajli.
Ika onkaj niman nenkimiktiskej.
19 ’Tla yakaj nonepanoua iuan sen yolki,
ika onkaj nenkimikitiskej.
20 ’Tla yakaj kinmaka uentli oksekimej dioses,
ika onkaj nenkimiktiskej pampa san nejua,
nemoTEKO nennechmakaskej uentli.
21 ’Maka ika xmauiltikan nion maka xtlajyouiltikan on yejuan xchanej,
pampa nemejuamej no xnenchanejkej katkaj ipan on tlajli Egipto niman nenkimatij kenijkinenkimatiyaj ijkuak nennemiyaj ipan sen tlajli yejuan xnemoyaxka.
22 ’Maka xtlajyouiltikan sen siuakaualtsintli,
nion yejuan iknotsintli,
23 pampa tla ijkon nenkinchiuiliaj,
niman yejuamej nechtlajtlaniliaj para ma nikimpaleui,
nejua nias niman nikimpaleuis.
24 Nejua sanoyej nikualanis niman nemechmiktis ikan espada,
niman ijkon yej nemosiuauan nokauaskej kaualtsitsimej niman nemokoneuan iknotsitsimej.
25 ’Tla nensemej nenkitlanejtiaj tomin sen mayanki yejuan no israelita,
maka xchiuakan ken sen tetlanejtijketl niman maka xtlalilikan itlanka nemotomin.
26 Tla on tlakatl mayanki noneki mechkauilis itlaken ken itlaj promesa ika melauak mitstlaxtlauilis,
xkuepilikan ijkuak xe tlapoyaui,
27 pampa uelis san ka nochijtsin itlaken kipiya para kitlalis ijkuak tlaseseya.
Niman san yejua kipiya para ika notlapachos ijkuak kochis.
Niman tla yejua nechtlajtlanis ma nikpaleui,
nikakis niman nikpaleuis pampa nejua nitetlasojtla.
28 ’Maka kaman tikuijuikaltis Dios,
nion maka tikinuijuikaltis on tekiuajkej.
29 ’Maka xmouejkaua para tinechajkuilis on uentli yejuan noyaxka* de nochi on tlen tikkipixkas niman de nochi mouvasayoj.
“Noneki tinechmaktilis moyenkuiyou yejuan tlakatl.
30 No ijki,
xnechmaka iyenkuiyou mouakax niman moborrego.
Uelis nokauaskej chikome tonajli iuan iminnanaj,
pero ipan on chikueyi tonajli tinechinmakas.
31 ’Nemejuamej noneki nenmochiuaskej tlakamej yolchipajkej para nejua.
’Yejua ika,
maka xkuakan inakayo on yolkej yejuan san kimiktia sen tekuani yejuan tepeyolki.
On nakatl xkinmakakan chichimej.