Xtemakakan uentli yejuan chipauak ixpan toTEKO
17
’Maka xmakakan nemoTEKO Dios sen uakax,
noso sen borrego yejuan tlakokojli* ipan itlakayo noso kipiya itlaj xkuajli,
pampa toTEKO Dios sanoyej kualania sen uentli kenon.
2 ’Tla saman,
ipan semej on kalpanmej yejuan nemoTEKO Dios mechmaka,
nenkimatij ika sen tlakatl noso sen siuatl kichiua tlen toTEKO xkuelita,
niman xipan kita ipacto* Dios,
3 ika kinmauistilia oksekimej dioses niman notlakuantelketsa imixpan kenon tonaltsintli,
noso on metstli noso on sitlalimej yejuan nemoTEKO xmechnauatia para xkinmauistilikan,
tla ijkon,
xipan kita ipacto* Dios.
4 Niman ijkuak nenkimatiskej ika ijkon kichiua yakaj,
noneki xtetlajtlajtoltikan kuajli nochiuiyan de on tlajtlamach*.
Niman tla onenkimatkej ika melauak onochiu intech on israelitas on tlen toTEKO sanoyej kualania,
5 nenkuikaskej on tlakatl noso on siuatl yejuan okichiu on tlen xkuajli hasta ne ikalakiyan on kalpan,
kampa nemij on tekiuajkej.
Niman ompa ne ikiauak on kalakiyan,
xtemojmotlakan hasta kaman miki.
6 ’Ika onkaj nemis ome noso yeyi tlakatl yejuan testigojkisaskej ika okitakej ijkuak okichiu on tlen xkuajli,
para ijkon sen juez uelis kijtos ma kimiktikan.
Xakaj uelis kimiktiskej tla san se testigo nemi.
7 On testigos achtoj yejuamej kitemojmotlaskej on tlakatl.
Kemaj nochimej on chanejkej ipan on kalpan no kitemojmotlaskej.
Ijki tlamis nenkixtiskej on tlen xkuajli yejuan onkaj ipan on kalpan.
8 ’Tla noneki nenkichiuaskej sen tekiuajyotl yejuan más ouijtikaj* yejuan on juez xuelis kichiuas,
kenon temiktilistli,
noso nouijsokilistli,
noso tlakokojli* yakaj ipan itlalnakayo noso sen ueyi tlauejli ipan nemoueyikalpan,
tla ijkon,
xuiyan ne kampa nemoTEKO Dios kitlapejpenis para onyas itabernáculo.
9 Niman ompa nenkinnotsaskej on levitas tiopixkej niman on juez yejuan kichiuas itekiu ipan on tonajli.
Yejuamej kijtoskej on castigo yejuan noneki ipampa on tlen onochiu.
10 Kemaj nemejuamej ika onkaj nenkichiuaskej nochi ken yejuamej mechnauatiskej kampa toTEKO kitlapejpenia.
11 Xchiuakan nochi ken yejuamej mechnauatiskej.
Ma nochiua on castigo yejuan mechijlis.
Maka nenkipatlaskej nion achijtsin.
12 Tla yakaj noueyimati niman xkitlakamati on tlen okijtoj on juez noso on tiopixki yejuan ompa kitekipanoua toTEKO,
ika onkaj nenkimiktiskej.
Ijkon tlamis nenkixtiskej on tlen xkuajli onkaj intech on israelitas.
13 Ijkuak nochimej on tlakamej kimatiskej on tlen onochiu nomojtiskej niman xok noueyimatiskej.
Tlanauatiltin para ken tlayekanas sen rey
14 ’Tla ijkuak yonenkalakkej ipan on tlajli yejuan nemoTEKO Dios mechmakas,
niman yonenkimoyaxkatijkej niman ye ompa nenchantij,
nenkijtoskej:
‘Tiknekij tikpiyaskej sen rey yejuan techmandaros ken kipiyaj nochimej on naciones yejuan onokej nisiu tejuamej’,
15 tla ijkon,
noneki nenkitlaliskej sen nemochanejkau para rey ipan nemonación,
sen tlakatl yejuan nemoTEKO Dios kitlapejpenis.
Noneki nenkitlaliskej sen tlakatl israelita niman maka se yejuan xchanej.
16 Xnauatikan on rey,
maka kouas miyek caballos,
nion kintitlanis tlakamej ne Egipto para kominaniliskej más caballos,
pampa toTEKO omechijlij maka sa kaman oksejpa nenyaskej Egipto.
17 No ijki,
noneki xkimpiyas miyekej siuamej para ijkon xkitlalkauis iojui toTEKO,
nion xkipiyas miyek oro niman plata.
18 ’Ijkuak on rey kiselis itekiu para tlamandaros,
xnauati ma kixkopina on achtoj amatlajkuilojli de on tlanauatiltin yejuan on levitas tiopixkej kipiyaj.
19 In amatlajkuilojli de on tlanauatiltin,
noneki nochipa kipiyas nisiu,
niman kinomachtis mojmostla ipan nochi inemilis.
Ijkon kimatis kenijki kitlakaitas iTEKO Dios niman kenijki kichiuas nochi on tlanauatiltin yejuan kijtoua on tlamachtijli.
20 Ijkon xkaman noueyimatis intech on sekimej ichanejkauan ipan on país niman xkaman kitlalkauis in tlanauatiltin nion achijtsin.
Niman ijki yejua niman iuejkakoneuan uejkauis tlamandaroskej ipan imintlal on israelitas.