On herencia yejuan kiseliskej on levitas tiopixkej
18
’Nochimej on levitas tiopixkej iuan nochimej yejuan kisaj itech itribu* leví,
xkiseliskej tlajli ken on oksekimej israelitas.
Yejuamej ika onkaj nopanoltiskej ika on uentli yejuan nochi tlatla niman on okseki uentli yejuan kimakaskej toTEKO.
2 Xkiseliskej tlajli ken on oksekimej israelitas,
pampa yejuamej yokiselijkej toTEKO ken iminherencia ijkon ken yokimprometerouilij.
3 ’Ijkuak on Israelitas kiuentlaliskej sen uakax noso sen borrego,
on tiopixkej kiminmakaskej imastlakapal,
ikamachal,
niman icuajo.
4 Niman no kiseliskej on achtoj pixkalistli de trigo,
vino niman aceite de olivo,
niman on achtoj itsojmiyo nemoborregos ijkuak nenkinximaskej.
5 Ijkon kiseliskej pampa nemoTEKO Dios okintlapejpenij on levitas niman inuejkakoneuan,
intsajlan nochimej on tribus para nochipa ma kitekipanokan.
6 ’Tla sen levita ikan nochi iyojlo kineki kisas ikalpan san kanon ipan on tlajli Israel,
niman yas para tekitis ipan itabernáculo toTEKO,
7 yejua uelis yas niman ompa tekitis para toTEKO Dios ken on oksekimej ikniuan levitas yejuan ompa kitekipanouaj.
8 Niman kiselis no ichkich tlakuajli ken on oksekimej kiseliaj aparte de on yejuan kiselis ken herencia de itataj.
Maka no ijki nenkichiuaskej ken on chanejkej ipan on oksekimej naciones
9 ’Ijkuak nemejuamej yonenkalakkej ipan on tlajli yejuan nemoTEKO Dios mechmaktilis para nemoyaxka* yes,
maka nenkichiuaskej on tlen sanoyej xkuajli ken kichiuaj on tlakamej yejuan ompa chantij.
10 Maka kaman yakaj kiuentlalis ipan tlitl sen ikoneu,
nion maka kejekos para tetlatejtemouilis,
nion maka kinekis kiteijlis on tlen nochiuas sakin*,
nion maka kejekos on nauajlotl.
11 Maka yakaj kejekos xkuajli tlaixkajkayaualistli,
nion maka kintejtemos on tetlatejtemouilijkej niman on yejuan kiminnotsaj ajakamej,
nion maka tlajtos iminuan mikatsitsimej.
12 Maka yakaj ijki kichiuas pampa toTEKO sanoyej kikualaniaj on yejuan kichiuaj nochi in tlajtlamach*.
Niman ijkuak nenkitaj nemoTEKO Dios kinkixtia on naciones,
on pampa yejuamej kichiuaj nochi on tlajtlamach* tlen sanoyej xkuajli.
13 Nemejuamej noneki nenkichiuaskej nochi tlen kuajli ixpan nemoTEKO Dios.
14 On tlakamej yejuan chantij ipan on naciones yejuan nemejuamej nenkimoyaxkatiskej imintlaluan,
nouikaj iminuan on yejuan kiteijliaj tlen nochiuas sakin* niman iminuan on yejuan tetlatejtemouiliaj.
Pero nemejuamej,
nemoTEKO Dios xmechkauilia ijkon xchiuakan.
On tiotlajtojketl yejuan uajlas no ken Moisés
15 ’NemoTEKO Dios kichiuas ma kisa nemotsajlan sen tiotlajtojketl ken nejua,
niman noneki nenkitlakamatiskej.
16 In yejua onenkitlajtlanilijkej nemoTEKO Dios ipan on tepetl Sinaí on tonajli ijkuak nemochimej* onemosentlalijkej ompa.
Onenkijtojkej:
“Xtiknekij oksejpa tikakiskej itlajtoltsin toTEKO Dios,
nion tikitaskej on ueyi temojtij tlitl,
pampa xtiknekij timikiskej.”
17 ’Kemaj toTEKO onechijlij:
“Kuajli on tlen okijtojkej.
18 Nejua nikchiuas para ma kisa intsajlan sen tiotlajtojketl ken tejua.
Yejua nikijlis tlinon noneki kijtos,
niman kimijlis on israelitas nochi tlinon nejua niknauatis.
19 Tla yakaj xkineki kakis notlajtoltsin ijkuak tlajtos on tiotlajtojketl niman xkitlakamatis,
nejua nikyolkuitis.
20 Pero tla on tiotlajtojketl noueyimatis niman kijtos tlajtojli yejuan nejua xonikmakak,
noso tla on tiotlajtojketl kijtos ika okiselij sen tlajtojli de oksekimej dioses,
ika onkaj mikis.”
21 Niman tla nemejuamej nenmotlajtoltiaj kenijki uelis nenkimatiskej ika on tlen kijtoua,
xejua itlajtoltsin toTEKO,
22 ijkin nenkimatiskej.
Tla on tiotlajtojketl kijtos ika toTEKO okimakak sen tlajtojli,
pero xonochiu on tlen okijtoj,
tla ijkon,
kijtosneki ika xtoTEKO okijlij para ma kijto,
yej san okinemilij itlaj pampa onoueyimat.
Yejua ika tej,
maka ma kimakajsikan.