On uejueyikalpanmej kampa nomanauilos
19
’Ijkuak nemoTEKO Dios yotlan kinxoxotonia on naciones,
niman yomechmakak nemejuamej on tlajli yejuan amantsin iminyaxka,
niman nenkimoyaxkiskej on tlajli,
niman nemejuamej ye nenchantij ipan iminueyikalpanuan niman iminkaluan,
2-3 nenkixeloskej yexkantipan on ueyitlalpan yejuan nemoTEKO Dios mechmakas para nemoyaxka* yes.
Itlajkotian cada ueyitlalpan,
nenkitlaliskej sen ueyikalpan,
niman nenkitlaliskej sen ojtli para ajsis ipan cada ueyikalpan.
Niman ompa uelis nomanauis sen tlakatl yejuan kimiktis yakaj.
4 ’On tlakatl yejuan temiktis uelis ompa nomanauis,
tla kiteititis ika xsan okiyokolij okimiktij niman xiuan notlauelitayaj on tlakatl yejuan okimiktij.
5 Ma tikonijtokan,
tla omemej tlakamej yauij onkuajkuauij.
Niman ijkuak on se tlatsontekiya,
ouajtekopin ihacha niman okimato okse tlakatl niman miki.
Tla ijkon,
on yejuan otemiktij uelis oniyanas ipan semej de on yeyi kalpanmej niman ijki nomanauis.
6 Tla sanoyej uejka onkaj on ueyikalpan kampa uelis nomanauis,
se yejuan ken kita on tlakatl yejuan yomik,
uelis kitojtokas ikan itlauel on yejuan otemiktij,
niman uelis konajsis niman kimiktis para kuepiltis on tlen okichiu maski xkipiyaya tline* kimiktis,
pampa xnotlauelitayaj.
7 Yejua ika,
nemechnauatia xkauakan yeyi kalpanmej tlakauiltin kampa nomanauilos.
8 ’Ijkuak nemoTEKO Dios más kueyilis nemotlal ken okintlajtolmakak ika itokatsin nemoachtojtajuan,
9 nonekis nenkitlaliskej okse yeyi kalpanmej kampa uelis nomanauiskej on tlakamej.
Ijkon uajnochiuas chikuasen ueyikalpanmej de nomanauiloyan.
Mechmakas nochi on tlajli yejuan okintlajtolmakak nemoachtojtajuan tla nenkitlakamatij nochi in tlanauatiltin yejuan aman nemechmaka,
niman tla nenkitlajsojtlaj* nemoTEKO Dios niman nochipa nenkitokaj iojui.
10 Ijkon tej,
xnenkimiktiskej yakaj tlakatl yejuan xkipiya tlajtlakojli ipan on tlajli yejuan nemoTEKO Dios mechmakas,
nion uetsis nemopan nemejuamej sen tlajtlakojli de temiktilistli.
11 ’Pero tla sen tlakatl kitlauelita yakaj,
niman kompijpiya kampa yau para kimiktia,
niman sakin*,
yau ipan semej de on uejueyikalpanmej para nomanauis,
12 kemaj on uejueyixtokej tlayekankej ipan ikalpan on temiktijketl tlanauatiskej para ma kajsikan.
Niman kemaj kitemakaskej itech on yejuan ken kitaya on mikatsintli para ma kimikti.
13 Maka nenkikneliskej on yejuan ijkon temiktia.
Niman ijkon on israelitas xok kipiyaskej tlajtlakojli tla kimiktiaj sen tlakatl yejuan okimiktij yakaj yejuan xokipix tlajtlakojli.
Kemaj nochi on tlajtlamach* kuajli kisas nemouan.
14 ’Ipan on tlajli yejuan nemoTEKO Dios mechmakas,
ika onkaj nenkitlakaitaskej on kampa nemotlalnamikij iuan nemonisiuchanejkau.
Maka xkejkuanikan on neskayotl yejuan kiteititia kampa nemotlalnamikij iuan nemonisiuchanejkau.
Nochipa ijki onyas ken okitlalijkej nemoachtojtajuan.
Ley para on xkuajkualtin testigos
15 ’Maka kaman nenkitlajtlakolmakaskej sen tlakatl ika on tlen xkuajli okichiu tla san se testigo nemi.
Nochipa noneki nemis ome noso yeyi testigo yejuan san se tlajtojli kipiyaskej.
16 ’Tla sen tlakatl ika xkuajli iyojlo kinekis notestigotlalis para ipan istlakatis yakaj,
niman kiteixpanuis ika okichiu itlaj xkuajli,
17 in omemej tlakamej noneki yaskej ixpan toTEKO niman imixpan on tiopixkej niman on jueces yejuan kipiyaskej tekiuajyotl ipan on tonajli.
18 On jueces kixtlaloskej kuajli on tlen onochiu.
Niman tla okinextijkej ika on testigo kijtoua tlen xmelauak,
19 tla ijkon,
in tlakatl yejua kiselis on castigo yejuan kinekiya ma kiseli on tlakatl yejuan ipan oistlakat.
Niman ijkon nenkipopoloskej on tlen xkuajli onkaj nemotech.
20 ’Niman ijkuak on oksekimej kimatiskej on tlen onochiu,
nomojtiskej niman xok kaman kinekiskej kichiuaskej on tlen sanoyej xkuajli.
21 Ipan on kenon tlajtlakojli,
maka xteiknelikan.
Tla yakaj temiktia,
no xmiktikan.
Tla yakaj teixtepatsaua,
no xkixtepatsauakan.
Tla yakaj tetlanteyopeua no xtlanteyopeuakan.
Tla yakaj temateposteki,
no xmatepostekikan.
Noso tla yakaj teikxiteposteki no xkikxitepostekikan.