Leyes para on guerra
20
’Ijkuak nenkisaskej para nenkonminuijsokiskej nemotlauelikniuan,
niman nenkintaj ika yejuamej kimpiyaj miyek caballos,
carretas de guerra,
niman más sanoyej miyekej soldados xken nemejuamej,
maka xkinmakajsikan,
pampa nemejuamej nemouan yau nemoTEKO Dios yejuan omechkixtij ipan on tlajli Egipto.
2 Ijkuak ye kisaskej on soldados para onteuijsokiskej,
on tiopixki yas onotelketsas imixpan,
3 niman ijkin kimijlis:
“Xkakikan israelitas,
aman nemouijsokiskej iuan nemotlauelikniuan.
Maka xmoyolyemanilikan,
nion maka xmomojtikan,
nion maka xmojkamikikan,
nion maka xmojkakuekuetlakakan imixpan
4 pampa nemoTEKO Dios nemi nemouan.
Yejua kinuijsokis nemotlauelikniuan niman kichiuas para xkintlanikan.”
5 ’Kemaj kej tlajtoskej intlayekankauan on soldados niman ijkin kimijliskej:
“Tla semej de nemejuamej okichijchiu sen kajli niman xe peua kitekitiltia,
ma uiya ma chantiti ipan on ikal.
Ijkin kichiuas,
pampa uelis mikis ipan on guerra niman yej okse tlakatl chantis ipan on yenkuik kajli.
6 Niman tla semej de nemejuamej okitôkak sen uvasyoj niman xe kikua on achtoj itlakyo,
ma uiya ichan,
pampa uelis mikis ipan on guerra niman yej okse tlakatl kikuas on uvas.
7 Niman tla semej nemejuamej yokijtlan sen ichpochtli niman xe kinonamiktia,
ma uiya ichan para nonamiktis niman chantis iuan isiuau.
Ijkon kichiuas pampa uelis mikis ipan on guerra niman yej okse iuan nonamiktis on ichpochtli.”
8 ’Sakin,
on tlayekankej oksejpa kinmijliskej on soldados:
“Tla yakaj nomojtia niman xyolchikauak,
ma uiya ichan pampa ika on inemojtil uelis kinmauas on sekimej soldados.”
9 ’Niman ijkuak on tlayekankej yotlankej tlajtouaj,
on soldadojtlayekankej notlaliskej inyakapan on soldados.
10 ’Ijkuak nemejuamej nenkinisiuiskej sen ueyikalpan para nenkuijsokiskej,
achtopa xkintlajtoltikan on chanejkej tla kinekij noyoltlaliskej nemouan.
11 Tla on chanejkej ipan on ueyikalpan kiseliaj on tlajtojli niman mechkauiliaj nenkalakiskej,
tla ijkon,
nochimej on chanejkej nochiuaskej nemoesclavos niman kichiuaskej para nemejuamej,
tekitl yejuan chikauak.
12 Pero tla xokinekkej onoyoltlalijkej nemouan niman yej peuas mechuijsokiskej,
tla ijkon,
nemejuamej nenkiyejyeualoskej on ueyikalpan niman nenkinuijsokiskej on chanejkej.
13 NemoTEKO Dios mechinmaktilis,
niman nemejuamej nenkinmiktiskej ikan espada nochimej on tlakamej yejuan ompa chantij.
14 Pero on siuamej,
kokonej,
yolkej niman nochi on tlen onkaj ipan on ueyikalpan,
uelis nenkinmoyaxkatiskej nemejuamej.
Niman no uelis nenkintekitiltiskej nochi on tlajtlamach* yejuan nemoTEKO Dios mechmakas on tlen inyaxka katka nemotlauelikniuan.
15 No ijkin,
nenkinchiuiliskej nochimej on uejueyikalpanmej yejuan uejka onokej,
yejuan xteuan nopouaj ipan in naciones yejuan nisiu onokej.
16 ’Pero ipan inueyikalpanuan on naciones de Canaán yejuan nemoTEKO Dios mechyaxkatia,
xakaj nenkauaskej yoltikaj.
17 Yej tlami xkinmiktikan nochimej.
Xkinmiktikan nochimej on heteos,
amorreos,
cananeos,
ferezeos,
heveos,
niman on jebuseos ijkon ken toTEKO Dios yomechnauatij.
18 Xchiuakan ijkon para ijki xmechititiskej on tlen sanoyej xkuajli yejuan kichiuaj ijkuak kinmauistiliaj imindioses,
niman ijkon mechchiualtiskej xtlajtlakokan ixpan nemoTEKO Dios.
19 ’Tla para nenkimoyaxkatiskej sen ueyikalpan nonekis miyek tonajli para nenkuijsokiskej,
maka xkintsontekikan on kojtlakijlomej pampa itlakyo on kojtin* noneki para nenkikuaskej.
Xnenkintsontekiskej pampa yejuamej san kojtin.
Yejuamej xtlakamej yejuan uelis mechuijsokiskej.
20 Pero on kojtin* yejuan xtlakij,
kemaj uelis nenkintsontekiskej para ika nemopaleuiskej ijkuak nenkinuijsokiskej on nemotlauelikniuan hasta kaman uetsij nemomak.