Tlinon kichiuas yejuan kinextia sen mikatsintli
21
’Tla ipan on país yejuan nemoTEKO Dios mechmakas para nemoyaxka* yes,
kinextiaj sen mikatsintli yejuan yakaj okimiktij ipan campo niman xakaj kimati akinon okimiktij,
2 on uejueyixtokej tlayekankej niman on jueces kixtlaloskej kech ika uejka kampa tlajkaltok on mikatsintli hasta kampa onokej on uejueyikalpanmej yejuan onokej más nisiu.
3 Kemaj on uejueyixtokej tlayekankej yejuan nemij ipan on ueyikalpan yejuan más nisiu,
konanaskej sen becerra yejuan xe kaman kitekitiltiaj para tlaxoponia*,
4 niman kuikaskej ipan sen ixtlauatl yejuan xkaman kixoponiaj niman kipiya ayajtok yejuan nochipa kipiya atl.
Niman ompa kechtsontekiskej on becerra.
5 ’Kemaj nonisiuiskej on tiopixkej levitas pampa toTEKO okintlapejpenij para kichiuaskej intekiu ipan on tabernáculo* niman para tlatiochiuaskej ikan itokatsin toTEKO.
Niman kampa onkaj tlauejli noso kampa itlaj kinokuiliaj,
yejuamej kijtoskej kenijki kuajli nokuektlalis.
6 Kemaj nochimej on uejueyixtokej tlayekankej de on ueyikalpan nomajtekiskej ipan on becerra yejuan okimiktijkej,
7 niman kijtoskej in tlajtojlij:
“Tejuamej xotikmiktijkej in tlakatl,
nion xotikitakej akinon okimiktij.
8 ToTEKO,
xkintlapojpolui mokoneuan israelitas,
yejuan tejua otikinmanauij ne Egipto.
Niman maka xkintlajtlakolti de iyesyo in tlakatl yejuan xkipiya itlaj tlajtlakojli.”
Tla ijkon,
nenkichiuaskej,
xmechtlajtlakolmakas toTEKO ipampa imikilis on tlakatl.
9 Ijkon tej,
nemejuamej nenkichiuaskej on tlen melajki ixpan toTEKO,
niman nenkimokixtiliskej on tlajtlakojli ipampa imikilis on tlakatl.
Ley para on siuamej yejuan kimajsij ipan guerra
10 ’Ijkuak nemouijsokiskej iuan nemotlauelikniuan,
niman nemoTEKO Dios kichiua para nenkintlaniskej niman nenkinmajsiskej sekimej on motlauelikniuan,
11 tla nensemej nenkitaj intsajlan yejuamej sen siuatl yejuan kualtetsin,
niman kuelita para kinosiuatis,
12 uelis kuikas ichan.
Niman kichiualtis ma nokuatexikalo,
niman ma nostitejteki.
13 Ma kixti on itlaken yejuan kitlalijtiaya ijkuak okajsikej,
niman ma kitlali tlakentli* yejuan yenkuik.
Niman ma nokaua ichan on tlakatl,
niman ma kinchokili itajuan se metstli.
Sakin,
on tlakatl uelis iuan nemis niman nochiuas iueuentsin* on siuatl niman yejua nochiuas isiuau.
14 Pero tla sakin* xok okuelitak,
uelis kauilis ma uiya san kanon yejua kinekis.
Pero xuelis kinamakas nion kipiyas ken sen esclava pampa yejua yokipijpinajtij ika onotekak iuan.
On tlen kitocaroua kiselis sen yenkuiyotl
15 “San ma tikonijtokan ika sen tlakatl kipiya ome isiuau.
Se isiuau kineki niman on okse xkineki.
Pero on omemej kitlaskaltililiaj,
niman on siuatl yejuan yejua xkineki yejua kitlakatilia on yenkuiyotl.
16 Ijkuak ajsis on tonajli ijkuak on tlakatl kinxelouilis ikoneuan nochi on tlen kipiya,
xuelis kitas ken iyenkuiyou ikoneu on siuatl yejuan yejua kineki.
Pampa tla ijkon kichiuas,
kichiuilis tlen xkuajli ikoneu on siuatl yejuan xkineki yejuan melauak iyenkuiyou.
17 Ika onkaj,
in iachtojkoneu yejua kimakas okpa ichkich ijkon ken kitocaroua sen tekoneu yenkuiyotl.
Ika onkaj ijkon kichiuas pampa yejua achtoj otlakat,
niman yejua kitocaroua okpa ichkich kiselis pampa yenkuiyotl.
Castigo para on tekoneuan yejuan xipan teitaj
18 “Tla yakaj kipiya sen ikoneu yejuan xipan teita niman xompayejyeua,
yejuan xkintlakamati itajuan maski ijkuak castigarouaj xkintlakamati,
19 itajuan ika onkaj kuikaskej imixpan on uejueyixtokej tlayekankej de on ueyikalpan.
20 Niman ijkin kiteijliskej:
“In tokoneu xitlaj* ika techtlakamati,
niman xipan techita.
Yejua sen tlakuatetl niman sen tlauanketl.”
21 Kemaj nochimej on tlakamej de on ueyikalpan kitemojmotlaskej hasta kaman miki.
Ijkon nenkixtiskej on tlen xkuajli nemotsajlan,
niman ijkuak kimatiskej on israelitas nomojtiskej.
Tlajtlamach tlanauatiltin
22 ’Tla sen tlakatl kichiuas sen ueyi tlajtlakojli niman kajkopiloskej ipan sen kojtli* para ma miki,
23 xkuajli para itlalnakayo nokauas ajkopilkas nochi yeuajli ipan sen kojtli.
Yej ika onka nenkitokaskej itlalnakayo sano ipan on tonajli pampa on yejuan kajkopilouaj ipan sen kojtli* Dios kitlaulia.
Yejua ika,
nenkitokaskej itlalnakayo ipan on tonajli para maka kijtlakos on tlajli yejuan nemoTEKO Dios mechmaka.