22
’Tla yakaj kita yopoliu sen uakax noso sen borrego yejuan iyaxka* ichanejkau,
maka nochiuas ken xkita,
yej noneki kuikilis on iteko.
2 Pero tla iteko on yolki xinisiuchanejkau,
noso xkimati akinon iyaxka,
tla ijkon,
on yolki kuikas ichan.
Ompa kipiyas hasta kaman kitlajtlanis iteko,
niman kemaj ika onkaj yejua kimakas.
3 No ijki,
nenkichiuaskej ika sen poloko,
noso sen tlakentli*,
noso san tlinon yejuan yakaj kipolos niman semej nemejuamej kinextis.
Maka yej kikuis.
4 ’ Tla yakaj kita tlajkaltok ipan ojtli ipoloko* noso iuakax ichanejkau,
maka san ompa kauas,
yej ma kipaleui ma nokuiteua.
5 ’Xkuajli para sen siuatl kitlalis itlaken sen tlakatl.
No xkuajli para sen tlakatl kitlalis itlaken sen siuatl,
pampa yejuan ijkon kichiua toTEKO Dios sanoyej kualania.
6 ’Tla yakaj ipan iojui kinextia sen tototl tlapachoua ipan tlajli,
noso ipan kojtli,
niman on nantli kimpachojtikaj iteuan noso ikoneuan,
maka kuikas on nantli iuan on ikoneuan.
7 Yej san uelis kinuikas ikoneuan,
pero on nantli kauilis ma uiya.
Ijkon nochi kuajli kisas iuan,
niman kipiyas ueyi nemilistli.
8 ’Ijkuak yakaj kichijchiuas sen kajli yenkuik,
noneki kitlalilis tlapani sen tepantsintli iyeualkan,
para ijkon xakaj uajuetsis,
niman ichanejkauan xkintlajtlakoltiskej tla yakaj miki.
9 ’Maka xtôkakan itsajtsajlan nemouvasyoj itlaj okse xinachtli,
pampa toTEKO xmechkauilis nenkuiskej itlakyo on uvasyoj nion itlakyo on okse tlatoktli.
10 ’Maka nenkixoponiskej nemotlal ikan yunta yejuan tlasalojli sen uakax iuan sen poloko.
11 ’Maka xtlalikan tlakentli* yejuan tlachijchijtli ikan lana* tlanelojli iuan lino.
12 ’Xtlalilikan itenchayajyo ipan on naui esquina nemotlakenpani yejuan nemokentiaj.
Leyes para kenijki nonamiktiuas
13 ’Tla sen tlakatl iuan nonamiktia sen ichpochtli,
niman sakin*,
xok kuelitas,
14 kemaj kiteneuilis ika achtoj yonotekaka iuan okse tlakatl,
noso kijtos:
“Nejua iuan oninonamiktij in siuatl,
pero ijkuak iuan oninotekak,
onikmat ika achto yonotekaka iuan okse tlakatl.”
15 Tla ijkon,
itajuan on ichpochtli yaskej kampa nemij on uejueyixtokej tlayekankej de on ueyikalpan niman kiktiskej on sábana yejuan yesyo kampa nestias ika yejua melauak xkaman onotekak iuan yakaj tlakatl ijkuak ononamikti iuan on tlakatl.
16 Niman itataj on ichpochtli kimijlis on uejueyixtokej tlayekankej:
“In tlakatl onikmakak nochpoch para isiuau,
pero aman xok kineki.
17 Aman kiteixpanuiya ika onotekaka iuan yakaj okse tlakatl ijkuak xe nonamiktia iuan.
Pero nikan onkaj in kampa nestikaj ika melauak xonotekaka iuan yakaj okse tlakatl.”
Kemaj kipatlauas on sábana yejuan yesyoj imixpan on uejueyixtokej tlayekankej.
18 Kemaj on uejueyixtokej tlayekankej kajsiskej on tlakatl niman castigaroskej.
19 Kichiualtiskej ma kitlaxtlaua sen multa de 100 tomin de plata,
niman on tomin kimakaskej itataj on ichpochtli pampa okipijpinajtij sen ichpochtli israelita.
Niman on ichpochtli sanken* isiuau yes on tlakatl niman xkaman uelis iuan noxotonis ipan nochi inemilis.
20 ’Pero tla on teixpanuilistli kisas yej melauak ika yejua yonotekaka iuan yakaj okse tlakatl,
21 tla ijkon,
kuikaskej on ichpochtli hasta ikiauatempan ichan itataj,
niman on tlakamej de on ueyikalpan kitemojmotlaskej hasta kaman miki pampa okichiu sen ueyi tlajtlakojli intech on israelitas niman okipijpinajtij itataj.
Ijkon nenkixtiskej on tlajtlakojli nemotsajlan nemejuamej.
22 ’Tla sen tlakatl nenkinextiaj iuan onok sen siuatl yejuan kipiya iueuentsin,
ika onkaj nenkinmiktiskej on omemej.
Ijkon nenkixtiskej on tlajtlakojli intech on israelitas.
23 ’Tla sen ichpochtli yokijtlankej niman okse tlakatl kinamiki kanaj ipan on ueyikalpan niman noteka iuan,
24 noneki nenkinuikaskej nochimej on omemej kampa tetlakanonotsaj on uejueyixtokej tlayekankej niman nenkintemojmotlaskej hasta kaman mikij.
On ichpochtli mikis pampa xokitsajtsilij yakaj ma kimanaui ipan on ueyikalpan.
Niman on tlakatl mikis pampa okipijpinajtij sen ichpochtli yejuan yokijtlankaj.
Ijkon nenkixtiskej tlajtlakojli nemotsajlan nemejuamej.
25 ’Pero tla sen tlakatl kinextia ipan campo sen ichpochtli yejuan yokijtlan okse tlakatl,
niman kichiualtia iuan ma noteka,
tla ijkon,
san kimitiskej on tlakatl yejuan okichiualtij iuan ma noteka.
26 On ichpochtli xitlaj* kichiuiliskej pampa yejua xokichiu tlajtlakojli yejuan noneki ika mikis.
In tlen okichiu in tlakatl sano ijki ken ijkuak sen tlakatl kimiktia okse tlakatl,
27 pampa yejua okinextij iselti neka campo on ichpochtli yejuan yokijtlankaj,
niman maski on siuatl tsajtsiskia,
xakaj ueliskia kimanauiskia.
28 ’Tla sen tlakatl kinextia sen ichpochtli yejuan xe yakaj kijtlani,
niman kichiualtia iuan ma noteka,
niman yakaj kiminnextia,
29 tla ijkon,
on tlakatl ika onkaj kimakas itataj on ichpochtli 50 tomin de plata.
Niman pampa yokipijpinajtij,
ika onkaj nonamiktis iuan on ichpochtli,
niman xkaman uelis iuan noxotonis ipan nochi inemilis.
30 ’Sen tlakatl xuelis notekas iuan isiuau itataj pampa on sanoyej pinaualistli para itataj.