On tlakamej yejuan xueliskej nopouaskej iminuan on israelitas
23
’Tla sen eunuco*,
noso tla on kampa tlapiasoua kipiya san tlajkotsin,
xuelis teuan nopouas iuan ikoneuan toTEKO.
2 ’Sen paxtilkonetl* xuelis teuan nopouas iuan ikoneuan toTEKO,
nion iuejkakoneuan hasta yejuan ika majtlaktlipa generación.
3 ’Xkaman uelis nopouaskej nemouan on amonitas,
niman on moabitas,
hasta yejuan ika majtlaktlipa generación,
4 pampa ijkuak onenualejkej ipan on tlajli Egipto,
yejuamej xomechpaleuijkej ikan atl,
nion tlakuajli.
Niman no,
yej okitlaxtlauilijkej Balaam,
ikoneu Beor,
yejuan ualeua iueyikalpan Petor ipan on tlajli Mesopotamia,
para ma mechtlaueli.
5 Pero nemoTEKO Dios xokinek okak Balaam.
Yej okipatlak on tlauelijli ikan sen tlatiochiualistli para nemejuamej,
pampa yejua mechtlajsojtla.
6 Aman tej,
xkaman nenkimpaleuiskej on tlakamej,
nion xnemouikaskej kuajli iminuan ipan nochi nemonemilis.
7 ’Maka nenkintlauelitaskej on edomitas pampa yejuamej ken nenkintaj.
No ijki,
maka nenkintlauelitaskej on egipcios pampa nemejuamej nennemiyaj ipan imintlal ken xchanejkej.
8 On edomitas niman on egipcios yejuan okiskej nemouan niman chantij nemouan yejuan ika yexpa generación,
uelis teuan nopouaskej iuan ikoneuan toTEKO.
Xkinselikan ken israelitas.
Leyes para onyas chipaualistli ipan on campamento
9 ’Ijkuak nennemiskej ipan on campamento ipan on tonaltin de guerra inuan nemotlaluelikniuan,
maka nenkichiuaskej on tlen xchipauak ixpan toTEKO.
10 Tla semej de nemejuamej xchipauak nemi ixpan toTEKO pampa tlayoua okis ixinachyoa kampa tlapiasoua,
ika onkaj kisas ipan on campamento niman xuelis kalakis ipan nochi on tonajli.
11 Pero ijkuak ye tiotlak naltis,
niman ijkuak kalakis tonaltsintli uelis oksejpa kalakis ipan on campamento.
12 ’On kampa nemoxixaskej,
noneki onyas uejkatsin de on campamento.
13 Iuan nochi on tlajtlamach* yejuan nenkiktitinemij,
no nenkiktiskej sen kojyakapitstli para ika nentlachkuaskej achijtsin kampa nemoxixaskej niman kemaj nenkitlapachoskej on xixalistli.
14 Xpiyakan nemocampamento chipauak pampa nemoTEKO Dios ompa nemi nemouan para mechmanauiya niman kichiua xkintlanikan nemotlauelikniuan.
Yejua xkineki kitas itlaj yejuan xchipauak nemotech para maka mechtlalkauis.
Tlajtlamach tlanauatiltin
15 ’Tla sen esclavo uajkisteua ichan iteko niman mechtlajtlanilia nokauas nemochan,
xselikan niman maka nenkontemakaskej itech iteko.
16 Xkauilikan ma nokaua nemouan kampa yejua kitlapejpenis sen ueyikalpan yejuan kuelitas.
Niman maka yakaj ma kipajsolo.
17 ’Xakaj tlakatl nion yakaj siuatl israelita uelis notemakas para auilnemis teuan ixpan itlaj dios para kimauistilis.
18 Ipan itabernáculo nemoTEKO Dios,
xakaj uelis kimakas tomin yejuan kitlani kampa auilnemi,
para kitlaxtlauas sen yektlajtolmakalistli yejuan okichiu ixpan toTEKO.
Xuelis ijkon kichiuas pampa on tomin oualeu ipan sen auilnemilistli yejuan toTEKO sanoyej kitlajyelita.
19 ’Ijkuak sen nemokniu israelita nenkitlanejtiskej tomin,
noso tlakuajli,
noso san tlinon,
maka xtlajtlanilikan ma mechtlaxtlauili itlanka.
20 Tla nenkitlanejtiskej yakaj yejuan xchanej,
kemaj uelis nenkitlajtlaniliskej ma mechtlaxtlaluili itlanka,
pero sen israelita maka ijkon nenkichiuiliskej.
Ijkon nemoTEKO Dios mechtiochiuas ipan nochi on tlajtlamach* yejuan nenkichiuaskej ipan on tlajli yejuan nemoyaxkatiskej.
21 ’Ijkuak nenkichiuiliskej nemoTEKO Dios sen promesa,
maka nenkuejkauitiskej ika nenkichiuaskej,
pampa kuajli xmatikan ika nemoTEKO Dios mechyolkuitis,
niman tla xnenkichiuaj nenkipiyaskej tlajtlakojli ika on tlen onenkiprometerouilijkaj Dios.
22 Tla xitlaj* promesa nenkichiuaj itech Dios,
xitlaj* tlajtlakojli nenkipiyaskej.
23 Pero,
tla ika nemoyojlo nenkichiuiliaj nemoTEKO Dios sen promesa,
tla ijkon,
ika onkaj nenkichiuaskej kuajli niman xuejkajtika.