Leyes para kenijki noxotonis sen tlakatl iuan isiuau
24
’Tla sen tlakatl nonamiktia iuan sen siuatl,
pero sakin*,
xok kuelita pampa kinextilia itlaj yejuan xkuajli,
yejua uelis kimakas sen amatlajkuilojli kampa kijtos ika iuan noxotonia*,
niman kixtis de ichan.
2 Ijkuak on siuatl yokis ichan on tlakatl,
uelis nonamiktis iuan okse.
3 Pero tla on tlakatl yejuan ika okpa iueuentsin* no xok kinekis,
niman no kimakas sen amatlajkuilojli kampa kijtos ika iuan noxotonia*,
niman kuajkixtis ichan,
noso tla yej mikis on tlakatl,
4 tla ijkon,
on tlakatl yejuan achtoj iuan ononamiktijka xuelis oksejpa iuan nemis pampa on siuatl xok chipauak ixpan Dios.
Yejua in sanoyej kualania toTEKO,
niman nemejuamej noneki xnenkijtlakoskej on tlajli yejuan nemoTEKO Dios mechmaka para nemoyaxka*.
On tlajtlamach* leyes
5 ’Ijkuak sen tlakatl kemach nonamiktia,
maka kititlaniskej ipan guerra,
nion maka kimakaskej itlaj okse tekitl ipan nochi se xipan,
para ijki uelis nokauas ichan niman kipaktis isiuau.
6 ’Tla yakaj nocuentajtia mouan,
maka tiktlajtlanis imolino noso on tetl yejuan ika kuechouaj trigo pampa xok uelis kichijchiuas pan.
On sa no ijki ken tla kuiliskiaj on tlen ika nopanoltis ipan inemilis.
7 ’Tla nenkitaj ika sen israelita kichteki sen ichanejkau,
para kipiyas ken esclavo noso para kinamakas,
tla ijkon,
on teichtekketl ika onkaj nenkimiktiskej para ijkon tlamis on tlen xkuajli nemotsajlan.
8 ’Tla onkaj on kokolistli itoka lepra* nemotech,
noneki kuajli nenkitlakamatiskej nochi on tlanauatiltin yejuan mechijliskej on tiopixkej levitas.
Xchiuakan nochi ken nejua yonikinnauatij.
9 Xkelnamikikan on tlen nemoTEKO Dios okichiuilij María ipan nemoojui,
ijkuak onenkiskej Egipto.
10 ’Tla yakaj nenkitlanejtiaj itlaj,
maka nenkalakiskej ichan para nenkuiliskej itlaj yejuan nenkipiyaskej san chika mechtlaxtlauilia.
11 Yej xmokauakan kiauatenko niman xchakan,
para yejua ma kuajkixti on tlen mechmakas yejuan nenkipiyaskej san chika mechtlaxtlauilia.
12 Niman tla on tlakatl sen mayanki,
niman mechkauilia itlaken,
maka nenkiteltiliskej on tlakentli* ipan on tlayoua.
13 Ika onkaj nenkuepaskej on tlakentli* ijkuak xe tlapoyaui para ijki uelis ika notlapachos ijkuak kochis.
Niman yejua mechtlajsokamachilis pampa nenkitlajsojtlaj*.
Niman ijkon nemoTEKO Dios mechitas ika nenkichiuaj on tlen melajki ixpan.
14 ’Maka ika xmauiltikan nemotlakeual yejuan mayanki.
Maka xtlaxtlauilikan sa kenijki,
nion maka xteltilikan itlaxtlauil san akinon,
tla israelita noso tla xchanej yejuan nemi ipan semej nemoueyikalpan.
15 Xtlaxtlauilikan mojmostla ijkuak xe kalaki tonaltsintli pampa yejua sen mayanki niman konmatstikaj itlaxtlauil.
Tla xijki nenkichiuaskej,
yejua uelis noueyikatsajtsilis itech toTEKO niman kijlis on tlen nenkichiuaj,
niman toTEKO kitas ika nenkipiyaj tlajtlakojli.
16 ’On tatajtin xuelis kinmiktiskej ipampa on tlen xkuajli okichijkej inkoneuan,
nion on tekoneuan xuelis kinmiktiskej ipampa on tlen xkuajli okichijkej intajuan.
Yej cada se mikis ipampa itlajtlakol.
17 ’Maka xkinchiuilikan on tlen xkuajli on yejuan iknotsitsimej,
nion on yejuan xchanejkej.
Nion maka nenkiseliliskej on kaualtsitsintli itlaj itlaken chika nenkichaj para mechtlaxtlauilis.
18 Maka xkelkauakan ika nemejuamej nenesclavos katkaj ipan on tlajli Egipto,
niman ika nemoTEKO Dios omechkixtij de ompa.
Yejua ika,
nemechnauatia xtlakamatikan nochi in tlajtlamach*.
19 ’Ijkuak nenkipixkaskej nemotlatok niman tla seki onenkixkajkej,
maka nemokuepaskej para nenkonkuiskej.
Yej xkauakan para makuiti yakaj xchanej yejuan chanti nemouan,
noso sen iknotsintli,
noso sen siuakaualtsintli.
Niman ijkon nemoTEKO Dios mechtiochiuas ipan nochi on tlen nenkichiuaskej.
20 ’No ijki,
ijkuak nenkitekiskej on aceitunas ipan nemoolivoskojyoj,
maka nenkokpauiskej para nenkitejtekiliskej ipan nochi imakojyotsitsiuan.
On aceitunas yejuan nokauas,
xkinkauilikan para on xchanejkej,
on iknotsitsimej niman on siuakaualtsitsimej.
21 ’No ijki,
ijkuak nenkitekiskej nemouvas,
maka xkojokpauikan cada imatlakyo para nenkitekiskej yejuan onokau.
Yej xkinkauilikan on yejuan xchanejkej,
on iknotsitsimej niman on siuakaualtsitsimej.
22 Xkelnamikikan ika nemejuamej nenesclavos katkaj ipan on tlajli Egipto.
Yejua ika,
nemechnauatia xchiuakan nochi tlen melajki.