Okseki más tlanauatiltin
25
’Ijkuak omemej tlakamej itlaj ika nokualaniskej,
noneki yaskej imixpan on jueces para yejuamej kichiuaskej on tlen melajki.
Yejuamej kitoskej akinon xkipiya tlajtlakojli niman akinon kipiya tlajtlakojli.
2 On yejuan kipiya tlajtlakojli,
noneki kitlatsuitekiskej.
On juez tlanauatis ma kixakamanakan,
niman kemaj ompa ixpan kitlatsuitekiskej on keskipa nonekis ipampa on tlen okichiu.
3 Pero xkaman nenkitlatsuitekiskej hasta panos 40 tlatsuitekilistli,
pampa uelis sanoyej nenkojkokoskej niman nenkipijpinajtiskej.
4 ’Maka xtentematlayotikan sen uakax ijkuak ipan chocholoua on trigo para kiteinia.
Sen konetl noneki kitokayotiskej ken itataj yejuan yomik
5 ’Tla omemej iknijtin tlakamej san sekan chantij ipan itlal infamilia niman se de yejuamej miki niman xkajteua nion se ikoneu,
tla ijkon,
on siuakauajli* xuelis nonamiktis iuan okse tlakatl yejuan de okse familia.
Yej,
iuan nonamiktis icuñado niman ijki iuan tlaskaltis.
6 On tlakakonetl yejuan achtoj kitlakatilis on siuatl,
kitokayotis ken itoka katka on iueuentsin* yejuan yomik.
Ijkon itokayo xpopoliuis intech on israelitas.
7 Pero tla on tlakatl xkineki nonamiktis iuan icuñada,
on siuatl noneki yas kampa nemij on uejueyixtokej tlayekankej de on ueyikalpan niman kimijlis:
“Nocuñado xkineki nonamiktis nouan ken noneki para ijkon xpopoliuis itoka ikniu ipan in tlajli Israel.”
8 Kemaj on uejueyixtokej tlayekankej de on ueyikalpan kitekuitlaniskej ma uajla,
niman iuan tlajtoskej on tlakatl.
Niman tla yejua oksejpa kijtos ika xkineki nonamiktis iuan icuñada,
9 tla ijkon,
on siuatl kinisiuis niman imixpan on uejueyixtokej tlayekankej,
kixtilis se ikak on icuñado,
niman kixchijchas.
Niman kemaj ijkin kijtos:
“¡Ijkin kichiuiliaj sen tlakatl yejuan xkineki kimakas ikniu iuejkakoneu!”
10 Niman ifamilia on tlakatl ijkin kiteneuiliskej ipan on tlajli Israel:
“Ifamilia on yejuan xkipiya ikak.”
Okseki leyes
11 ’Tla omemej tlakamej nouijsokij niman uajlas isiuau semej de on tlakamej para kimanauis iueuentsin,
niman kimajxaktilanas on tlakatl yejuan teuisoki,
12 tla ijkon,
nemejuamej nentlanauatiskej para ma kitekilikan ima on siuatl.
Maka nenkikneliskej.
13-14 ’Ijkuak nentlanamakaskej noso nentlakouaskej,
maka nenkitekitiltiskej tlatemachiualtin yejuan xajsitikaj* para nentlaixpachoskej.
15 Yej,
xpiyakan tlatemachiualtin yejuan kuajli ajsitokej para ijkin nennemiskej miyek xipan ipan on país yejuan nemoTEKO Dios mechmakas.
16 Ijkon xchiuakan pampa toTEKO Dios sanoyej kikualaniaj nochimej on tlakamej yejuan tlakajkayauaj niman tlaixpachouaj.
Tlanauatijli para kinmiktiskej on amalecitas
17 ’Xkelnamikikan on tlen omechchiuilij Amalec inuan on amalecitas ijkuak onenkiskej Egipto.
18 Xkelnamikikan ika yejuamej nion xokimakaskej Dios.
Omechuijsokkej ipan ojtli ijkuak nemochimej* sanoyej nenuajsiautiayaj niman xok nenkojtikej katkaj.
Niman okinkuitlapanuijkej para okinuijsokkej on israelitas yejuan yonokajkaj tlakuitlapan.
19 Yejua ika,
ijkuak nemoTEKO Dios yomechmanauij de nochimej nemotlauelikniuan yejuan nemij iyeualkan on tlajli yejuan nemoTEKO Dios mechmakas para nenkimoyaxkatiskej,
ika onkaj nenkimpopoloskej ipan in tlaltikpaktli nochimej on amalecitas para xok kaman kinmelnamikiskej.
¡Maka nenkelkauaskej!