On uentli de on achtoj pixkalistli
26
’Moisés ijkin okinmijlij:
“Ijkuak yonenkalakkej ipan on tlajli yejuan nemoTEKO Dios mechmakas para nemoherencia niman ye ompa nenchantiskej,
2 nenkuiskej seki on achtoj tlakyotl yejuan nenpixkaskej ipan on tlajli,
niman nenkiktiskej ipan sen chikiutli ne ipan on tlajli kampa nemoTEKO Dios kitlapejpenis para itabernáculo kampa kitlakaitaskej itokatsin.
3 Ompa nenyaskej itech on tiopixki yejuan on tonajli kichiuas itekiu ipan on tabernáculo,
niman ijkin nenkijliskej:
‘Nejua nikpantlantia aman ixpan noTEKO Dios ika yonikalak ipan in país yejuan noTEKO onotlajtolmakak ika itokatsin intech toachtojtajuan ika techmakas.’
4 Kemaj On tiopixki kikuis on chikiutli yejuan nemejuamej nenkimakaskej,
niman kitlalis ixpan itlaixpan* nemoTEKO Dios.
5 Kemaj nenkijtoskej in tlajtojli ixpan nemoTEKO Dios:
“Noachtojtajuan katkaj arameosa yejuan san kijkistinemiyaj.
Ijkuak okalakkej ipan on tlajli Egipto,
san keskimej katkaj inkoneuan,
pero ompa onokajkej,
niman sakin* onochijkej sen ueyi nación yejuan okipixkej miyek poder.
6 Pero on egipcios techtekitiltiayaj ipan tekitl yejuan sanoyej ouijtikaj* niman sanoyej techtlajyouiltiayaj.
7 Kemaj otiktlajtlanilijkej iminTEKO Dios toachtojtajuan para ma techpaleui,
niman yejua okak toyemankatlajtlanilis.
Yejua okitak kenijki techtlajyouiltiayaj,
kenijki titekitiyaj ikan tekitl yejuan sanoyej ouijtikaj*,
niman okitak nochi ken titajmanayaj.
8 Yejua ika,
toTEKO otechkixtij de Egipto ikan iueyi poder niman okichiu miyek tlamajuisoltin niman miyek milagros* yejuan okinmojtij on egipcios.
9 Niman otechajuikak nikan niman otechmakak in tlajli kampa sanoyej tlatlaki niman xitlaj* poliui.
10 Yejua ika,
aman nikuajki in achtoj pixkalistli de in tlajli yejuan toTEKO onechmakak.’”
’Kemaj nenkitlaliskej on chikiutli ixpan nemoTEKO Dios niman nemotlakuantelketsaskej ixpan niman nenkimauistiliskej.
11 Sakin,
nenkichiuaskej sen iluitl ikan miyek pakilistli ipampa nochi on tlajtlamach* yejuan nemoTEKO Dios yomechmakak nemejuamej niman nemochanejkauan.
No ijki,
xkinnotsakan on levitas niman on xchanejkej yejuan nemouan nemij para pakiskej nemouan.
On diezmo* yejuan noneki cada yeyi xipan
12 ’Ijkuak ajsis on ika yeyi xipan para nenkitemakaskej nemodiezmo* de nochi on tlen tlaki ipan nemotlal,
nenkinmakaskej nemodiezmo* on levitas,
on iknotsitsimej,
on siuakaualtsitsimej,
niman on yejuan xchanejkej para ma kuakan nochi tlen kinekiskej.
13 Kemaj ijkin nenkijliskej nemoTEKO Dios:
“Yonikxeloj ne ipan nochan on diezmo* yejuan tlakauijli para tejua.
Niman yonikinmakak on levitas,
on iknotsitsimej,
on siuakakaualtsitsimej niman on xchanejkej yejuan nemij ipan topaís.
Yonikchiu nochi on tlen tejua otitlanauatij.
Xitlaj onikelkau,
nion xitlaj* onikixkau motlanauatil.
14 Xitlaj onikuaj de on diezmo* ijkuak ninajmanaya ika onitetokak,
noso ijkuak ninemiya xchipauak mixpan,
nion xonikinuentlalilij on mikatsitsimej.
NoTEKO Dios,
nejua onimitstlakamat niman onikchiu nochi on tlen otinechnauatij.
15 Xuajtlacha desde ne ipan moiluikak kampa yektli mochan niman xkintiochiua mokoneuan israelitas.
Niman xtiochiua in tlajli yejuan yotitechmakak kampa sanoyej tlatlaki niman xitlaj* poliui,
ijkon ken otikintlajtolmakak ika motokatsin toachtojtajuan.”
On israelitas nemij tlatiochijtin ixpan toTEKO
16 ’Kemaj Moisés ijkin okinmijlij:
“Aman in tonajli nemoTEKO Dios mechnauatia xtlakamatikan nochi in tlanauatiltin niman in leyes.
Xtlakamatikan ikan nochi nemoyojlo niman ikan nochi nemoalma.
17 Aman nemejuamej yonenkijtojkej ika toTEKO,
yejua nemoDios.
Niman yonenkiprometerojkej ika nenkitokaskej iojui,
niman ika nenkitlakamatiskej nochi itlamachtiluan,
ileyes niman itlanauatiluan.
18 No ijki,
toTEKO aman yokijtoj ika nemejuamej israelitas nenitetlajsojkakoneuan yejuan sanoyej kintlajsojkaita,
niman san yejua itech nenteyaxkauan* ken omechprometerouilij kichiuas.
Niman yejua tlanauatia nenkichiuaskej nochi itlanauatiluan.
19 Yejua kichiuas de nemejuamej sen ueyi nación para on tlakamej mechueyiteneuaskej,
niman nochiuiyan mechixmatiskej niman mechtlakaitaskej xken on oksekimej naciones yejuan toTEKO okintlalij.
Nemejuamej nemochiuaskej tlatiochitin para toTEKO Dios ken yejua okijtoj.”