On tlanauatiltin kijkuilouaj ipan on temej yejuan onkaj ipan on tepetl Ebal
27
Moisés,
niman on uejueyixtokej intech on israelitas okinmakakej on israelitas in tlanauatiltin.
Ijkin okinmijlijkej:
“Xchiuakan nochi on tlen aman nemechnauatia.
2 Ijkuak nenkipanoskej on río Jordán niman nenkalakiskej ipan on tlajli yejuan nemoTEKO Dios mechmakas,
xkintelketsakan temej patlachtikej yejuan uejueyimej,
niman xkinmalauilikan tenextli.
3 Niman ipan on temej nenkijkuiloskej nochi on tlajtoltin de on tlanauatiltin yejuan yomechnauatij nenkichiuaskej.
Ijkon xchiuakan ijkuak nenkalakiskej ipan on tlajli kampa sanoyej tlatlaki niman xitlaj* poliui yejuan nemoTEKO Dios mechmaktilis ijkon ken okimprometerouilij nemoachtojtajuan.
4 Ijkon tej,
ijkuak yonenkipanokej on río Jordán,
noneki nenkintelketsaskej ipan on tepetl Ebal on temej yejuan yonemechnauatij,
niman nenkinistaliskej ikan tenextli.
5 No ijki,
noneki nenkichijchiuaskej sen tlaixpan* ikan temej para nemoTEKO Dios,
niman maka nenkinximaskej on temej ikan tepostli.
6 Xtekitiltikan temej yejuan xtlapankej niman xtlaxintin para nenkichijchiuaskej on tlaixpan*.
Niman ompa ipan on tlaixpan* nenkimakaskej nemoTEKO Dios uentli yejuan nochi tlatlas,
7 niman on uentli de yoltlalilistli.
Niman ompa ixpan nemoTEKO Dios neniluichiuaskej ikan ueyi paktli niman nentlakuaskej.
8 Ipan on temej yejuan kipiya tenextli noneki nenkijkuiloskej niman kuajli nestias on tlajtojli de nochi on tlanauatiltin yejuan yonemechmakak.”
9 Sakin,
Moisés okinuikak on tiopixkej levitas,
niman okinmijlij on israelitas:
“Maka xnauatikan israelitas,
yej xkakikan.
Aman nemejuamej yonemochijkej ikoneuan nemoTEKO Dios.
10 Yejua ika,
tej xtlakamatikan nemoTEKO Dios niman xchiuakan itlanauatiluan niman ileyes yejuan nejua nemechnauatia aman.”
On tlaueliltin para on yejuan xkitlakamatij ileyes toTEKO
11 Sano ipan on tonajli Moisés okinmijlij on israelitas in tlanauatijli:
12 “Ijkuak nemejuamej yonenkipanokej on río Jordán,
on tribus de Simeón,
Leví,
Judá,
Isacar,
José niman Benjamín notelketsaskej ipan on tepetl Gerizim niman kitoskej on tlatiochiualistin yejuan kiseliskej on israelitas tla kitlakamatij ileyes toTEKO.
13 Niman on tribus de Rubén,
Gad,
Aser,
Zabulón,
Dan niman Neftalí notelketsaskej ipan on tepetl Ebal niman kinteneuaskej on tlaueliltin yejuan on israelitas kinseliskej tla xkintlakamatij ileyes toTEKO.
14 On levitas kinnotsaskej nochimej on israelitas,
niman chikauak ijkin kijtoskej in tlajtojli:
15 ’“Ma kajsi tlauelijli on yejuan kimachijchiuas sen ídolo de kojtli,
de tetl noso de tepostli,
niman kichtakapiyas kampa xakaj kimatis ika kimauistilia.
Kajsis tlauelijli pampa yejua on sanoyej kualania toTEKO.”
Niman nochimej on israelitas kijtoskej:
“¡Ma ijki nochiua!”
16 ’“Ma kajsi tlauelijli on yejuan xkitlakaita itataj noso inanaj.
Niman nochimej on israelitas kijtoskej:
“¡Ma ijki nochiua!”
17 ’“Ma kajsi tlauelijli yejuan kejkuanis on neskayotl yejuan kiteititia kampa notlalnamiki iuan inisiuchanejkau para kikuilis seki itlal.”
Niman nochimej on israelitas kijtoskej:
“¡Ma ijki nochiua!”
18 ’“Ma kajsi tlauelijli yejuan okse lado kontitlanis on yejuan xtlacha.”
Niman nochimej on israelitas kijtoskej “¡Ma ijki nochiua!”
19 ’“Ma kajsi tlauelijli yejuan kichiuilis itlaj xkuajli yakaj yejuan xchanej,
noso kaualtsintli noso iknotsintli.”
Niman nochimej on israelitas kijtoskej:
“¡Ma ijki nochiua!”
20 ’“Ma kajsi tlauelijli yejuan iuan notekas isiuau itataj pampa ijkon xkitlakaita itataj.”
Niman nochimej on israelitas kijtoskej:
“¡Ma ijki nochiua!”
21 ’“Ma kajsi tlauelijli yejuan notekas iuan sen yolki.”
Niman nochimej on israelitas kijtoskej:
“¡Ma ijki nochiua!”
22 ’“Ma kajsi tlauelijli yejuan iuan notekas ikniu yejuan siuatl yejuan okse itataj noso okse inanaj.”
Niman nochimej on israelitas kijtoskej:
“¡Ma ijki nochiua!”
23 ’“Ma kajsi tlauelijli on yejuan iuan notekas imonan.”
Niman nochimej on israelitas kijtoskej:
“¡Ma ijki nochiua!”
24 ’“Ma kajsi tlauelijli yejuan kimiktis yakaj san ichtaka.”
Niman nochimej on israelitas kijtoskej:
“¡Ma ijki nochiua!”
25 ’“Ma kajsi tlauelijli yejuan kiselis tomin para kimiktis yakaj tlakatl yejuan xitlaj* kipiya tlajtlakojli.”
Niman nochimej on israelitas kijtoskej:
“¡Ma ijki nochiua!”
26 ’“Ma kajsi tlauelijli yejuan xkichiuas niman xkitlakamatis nochi in tlanauatiltin.”
Niman nochimej on israelitas kijtoskej:
“¡Ma ijki nochiua!”