Moisés kinnauatia on israelitas ma tetlakamatikan
4
’Kemaj Moisés okinmijlij on israelitas:
‘Aman tej,
israelitas,
nemochimej* xkakikan on leyes niman on tlanauatiltin yejuan nemechititia,
niman xkintlakamatikan.
Ijkon xchiuakan para nenkipiyaskej nemilistli niman ijkon uelis nenkalakiskej ipan on kuajli tlajli yejuan mechmakas iminTEKO Dios nemoachtojtajuan.
2 Maka xtlalilikan okseki tlanauatijli nion maka xkixtilikan itlaj tlanauatijli yejuan nemechmaka.
Yej xkintlakamatikan itlanauatiluan toTEKO Dios,
yejuan nejua nemechnauatia.
3 Nemejuamej yonenkitakej kenijki nemoTEKO okinmiktij on israelitas yejuan okimauistilijkej on dios Baal ipan on tepetl Baal-peor.
4 Pero nemejuamej yejuan xonenkitlalkauijkej toTEKO Dios sanken* nennemij hasta aman.
5 ’Xkitakan,
nejua yonemechmachtij ika on leyes niman ika on tlanauatiltin yejuan noTEKO Dios onechnauatij ma nemechmaka para nemejuamej xchiuakan ipan on tlajli yejuan aman nenkiseliskej para nemoyaxka* yes.
6 Xkejeuakan niman xchiuakan tlen mechnauatia,
para ijkon kitaskej on tlakamej de oksekimej naciones ika nentlamatkej* niman kuajli nentlamachilisyejkej.
Niman ijkuak yejuamej kakiskej in tlanauatiltin,
ijkin kijtoskej:
‘Sa ye melauak,
in sen ueyi nación yejuan tlamatki* niman kuajli tlanemilia.’
7 Niman on melauak pampa ¿katlejua nación sanoyej ueyixtikaj yejuan imindios sanoyej nisiu iminuan nemi,
ijkon ken tejuamej touan nemi toDios niman technankilia nochipa ijkuak tiknotsaj?
8 Niman,
¿katlejua nación sanoyej ueyixtikaj yejuan kipiya leyes niman tlanauatiltin yejuan sanoyej melajki ken in yejuan aman nikan nemechmakatikaj?
9 ’Yejua ika tej,
xmejeuakan,
niman maka kaman nenkelkauaskej on tlajtlamach* yejuan yonenkitakej.
Ma nokaua ipan nemoyojlo niman ipan nemotlamachilis nochi tonaltin hasta nenmikiskej.
Niman xkintlajtlajtouilikan nemokoneuan niman nemoxuiuan.
ToTEKO tlajtoua ipan on tepetl Sinaí
10 ’Ipan on tonajli ijkuak nemejuamej nennemiyaj ixpan toTEKO Dios ipan on tepetl Sinaí,
toTEKO onechijlij: ’
Xkinsentlali nochimej on israelitas para kakiskej notlajtoltsin niman ijkon ueliskej nechtlakaitaskej ipan nochi tonaltin de innemilis.
Niman ma kinmachtikan iminkoneuan para no ijki ma kichiuakan.’
11 Nemejuamej onenmotelketskej tlatsintlan de on tepetl,
kampa kisaya tlitl,
yejuan tlejkouaya sanoyej tlakpak,
niman nochiuaya sen moxtli tilauak yejuan tlilijki.
12 Kemaj toTEKO omechnots ijtik on tlitl.
Nemejuamej onenkakkej itlajtoltsin,
pero xitlaj* onenkitakej itlachalis.
13 Niman toTEKO omechixpantilij ipacto* yejuan kipiya majtlaktli tlanautiltin,
yejuan okijkuiloj ipan ome tepatlachtli.
Niman omechnauatij xtlakamatikan tlinon tlanauatia.
14 Nejua onechnauatij ma nemechititi on leyes niman on tlanauatiltin yejuan noneki nenkichiuaskej ipan on tlajli yejuan nenkiseliskej para nemoyaxka* yes.
Tlanauatijli para maka kintlakaitaskej on ídolos
15 ’Ipan on tonajli ijkuak toTEKO omechnots ipan on tepetl Sinaí desde ipan on tlitl,
nemejuamej xitlaj* onenkitakej itlachalis.
Yejua ika tej,
xpiyakan miyek cuidado,
16 para maka nenkichiuaskej on tlen sanoyej xkuajli.
Maka nenkichijchiuaskej sen tlaixkopinajli yejuan nesis ken sen tlakatl noso ken sen siuatl,
17 nion sen tlaixkopinajli de itlaj yolki,
nion itlaj tototl yejuan patlani,
18 nion yolkej yejuan noteuilanaj ipan tlajli noso michimej.
19 Niman ijkuak nemajkotlachaskej ipan cielo,
niman nenkintaskej on sitlalimej,
tonaltsintli,
metstli,
niman nochi on tlajtlamach* yejuan onkaj tlakpak,
maka nenkinekiskej nenkinmauistiliskej,
pampa nemoTEKO Dios okichijchiu nochi on tlajtlamach* para nochimej tlakamej ipan in tlaltikpaktli.
20 Pero nemejuamej,
toTEKO omechkixtij de on tlajli Egipto kampa sanoyej nentlajyouiyayaj.
Omechkixtij para omechtlalij nenteyaxkauan* san yejua itech,
ken aman nennemij.
21 Niman toTEKO okualan nouan nemopampa,
niman onotlajtolmakak ika itokatsin ika nejua xnipanos ipan on río Jordán,
nion xnikalakis ipan on kuajli tlajli yejuan nenkiseliskej.
22 Ijkon tej,
maski nejua nimikis ipan in tlajli niman xnikpanos on río Jordán,
nemejuamej kemaj,
nempanoskej niman nemoyaxkatiskej on kuajli tlajli.
23 Pero xpiyakan miyek cuidado para maka nenkelkauaskej on pacto* yejuan nemoTEKO Dios okichiu nemouan.
Maka nenkichijchiuaskej itlaj ídolo,
nion tlaixkopinajli yejuan nemoTEKO Dios yomechijlij maka xchijchiuakan
24 pampa nemoTEKO Dios,
yejua sen Dios yejuan xkixikos kitas nenkinmauistiliaj oksekimej dioses.
¡Yejua ken sen tlitl yejuan nochi kitlatia!
25 ’Ijkuak nemejuamej nenkimpiyaskej nemokoneuan niman nemoxuiuan,
niman yonenueuentsintiakej ipan on kuajli tlajli,
maka nenkimochijchiuiliskej nemoídolos noso tlaixkopinaltin de tlajtlamach*.
Yejua ika,
in nentlajtlakoskej ixpan toTEKO,
niman yejua sanoyej kualanis nemouan.
26 Nejua aman niktestigojtlalia on cielo niman in tlaltikpaktli,
ika nimantsin nempoliuiskej ipan on tlajli yejuan aman nenkimoyaxkatiskej,
ijkuak nempanoskej on río Jordán.
Pampa ipan on tlajli,
xuejkauis nennemiskej,
yej saniman nenmikiskej nemochimej*.
27 ToTEKO mechsesemanas nochiuiyan imanian naciones,
niman sa nenkeskimej yeskej yejuan xnenmikiskej.
28 Ompa ipan on naciones nenkinmauistiliskej dioses yejuan kinchijchiuaj on tlakamej,
dioses de kojtli* niman de tetl yejuan xtlachaj nion xtlakakij,
niman xtlakuaj,
nion xnijyotiaj.
29 ’Pero tla ompa nenkitejtemouaj nemoTEKO Dios ika nochi nemoyojlo,
niman ika nochi nemoalma,
nenkinextiskej.
30 Ijkuak yopanok miyek tonaltin ika yonentlajyouijkej niman yonenkipixkej miyek ajmantli,
tla nemejuamej nenkelnamikij nemoTEKO Dios niman tla nenkitlakamatij,
31 yejua sen Dios yejuan sanoyej tetlajsojtla.
Xmechtlauelkauas,
nion xtlamis mechmiktis nemochimej*.
Niman no xkelkauas on pacto* yejuan okintlajtolmakak ika itokatsin nemoachtojtajuan.
32 ’Xkixtlalokan nochi tlen onochiu ijkuak xe nentlakatiyaj,
desde ijkuak Dios okichijchiu on achtoj tlakatl ipan tlaltikpaktli.
Xtejtemokan desde ipeuyan on cielo hasta kampa ontlami.
Xkitakan tla yonochijka itlaj kenin yejuan sanoyej tetlatlachaltij,
noso tla kamanian yonenkimatkaj onochiu itlaj kenin.
33 ¿Manin nemij oksekimej tlakamej yejuan okakkej itlajtoltsin Dios yejuan okinnots desde ipan sen tlitl ken nemejuamej onenkakkej omechnots niman xonenmikkej?
Nemechijlia:
Ika ka.
34 ¿Manin nemi sen dios yejuan okinmanauij tlakamej yejuan nemiyaj esclavos itech sen nación ika tetlatlatalistin para kitas tla kuajli iminyojlo,
ika uejueyi tlamauisoltin,
ika uejueyi milagros,
ika tlauijsokilistli niman ika iueyi poder ken nemoTEKO Dios okichiu ne Egipto,
nemixpan niman nemopampa?
Nemechijlia:
Ika ka.
35 ToTEKO omechtitij nochi in tlajtlamach* para xmatikan ika yejua melauak Dios,
niman xnemi okse ken yejua.
36 Yejua omechnots desde iluikak para omechmachtij,
niman ipan tlaltikpaktli omechititij sen ueyi tlitl,
niman ompa ipan on tlitl omechnots.
37 ’Yejua okintlajsojtlak* nemoachtojtajuan,
niman okintlapejpenij inuejkakoneuan.
Yejua ika,
sa no yejua omechkixtij Egipto ikan iueyi poder.
38 Niman okinkixtij nemotech naciones yejuan más uejueyimej niman más kojtikej xken nemejuamej,
pampa kinekiya mechmakas imintlal ijkon ken aman nochijtikaj.
39 ’Yejua ika,
kuajli xkejeuakan ipan nemotlamachilis niman maka xkelkauakan ika nemoTEKO san yejua melauak Dios ipan in tlaltikpaktli niman ipan iluikak,
niman ika xnemi okse más ken yejua.
40 Xtlakamatikan ileyes niman itlanauatiluan yejuan nejua nemechmaka ipan in tonajli.
Ijkon kuajli nennemiskej,
nemejuamej niman nemouejkakoneuan.
Nennemiskej miyek xipan ipan on kuajli tlajli yejuan nemoTEKO Dios mechmakas para nochipa.”
On uejueyikalpanmej kampa uelis nomanauiskej
41 Kemaj Moisés okitlapejpenij yeyi uejueyikalpanmej ipan ilado on río Jordán kampaka ikisayan tonaltsintli,
42 para tla sen tlakatl okimiktij yakaj yejuan xsan okiyokolij,
uelis nomanauis ipan semej de on yeyi uejueyikalpanmej pampa ompa xakaj uelis kitlakuepiltis.
43 On uejueyikalpanmej ijkin intoka katka:
Baser,
yejuan onokau ipan on xalpatlajkan ipan imintlal itribu* Rubén para on rubenitas,
Ramot de Galaad yejuan onokau ipan imintlal itribu* Gad para on gaditas,
niman Golán de Basán yejuan onokau ipan imintlal itlajko tribu* Manasés para yejuamej.
ToTEKO okinmakak tlanauatiltin on israelitas
44 In yejua on leyes niman temachtiltin yejuan Moisés okinmakak on israelitas.
45 Ijkuak on israelitas okiskej ipan on tlajli Egipto,
Moisés okinmakak in tlanauatiltin,
leyes niman okseki tlajtlamach* tlanauatiltin.
46 Ijkon okichiu chika sanken* nemiyaj itech on río Jordán kampaka ikisayan tonaltsintli ipan on ixtlauatl ixpan on kalpan Bet-peor itlal Sehón,
rey de on amorreos yejuan chantiya ipan on ueyikalpan Hesbón.
Ompa Moisés iuan on israelitas okintlankej ijkuak oualejkej ipan on tlajli Egipto.
47 On israelitas okinoyaxkatijkej itlal niman no okinoyaxkatijkej itlal Og yejuan rey katka ne Basán.
On omemej reyes katkaj de on amorreos yejuan chantiyaj kampaka ikisayan tonaltsintli de on río Jordán.
48 Iminueyitlalpan pejtoya desde on kalpan Aroer itech on río Arnón niman ajsitoya hasta itech on tepetl Sirión,
yejuan no kitokayotiayaj Hermón,
49 niman nochi iueyitlalpan Arabá itech on río Jordán kampaka ikisayan tonaltsintli hasta itech on Mar Muertoa yejuan nokaua tlatsintlan de on tepetl itoka Pisga.