On israelitas okitlankej Og, yejuan rey de Basán
3
’Kemaj otiajkej ipan okse ojtli,
niman otiajkej ipan on ueyitlalpan Basán.
Pero Og,
yejuan rey katka ipan on país Basán,
ouajlaj iuan nochimej isoldados para otechuijsokiko ipan on ueyikalpan itoka Edrei.
2 ’Kemaj toTEKO onechijlij:
‘Maka xmakajsi,
pampa yejua iuan isoldados niman nochi imimpaís yonemechmaktilij.
No ijki,
xkinchiuilikan ken onenkichiuilijkej on rey Sehón iminrey on amorreos yejuan chantiya ipan on tlajli Hesbón.’
3 ’Ijkon tej,
toTEKO Dios otechkauilij ma tiktlanikan on rey Og iuan nochimej isoldados.
Niman otikinmiktijkej nochimej.
Xakaj otikajkej yoltikaj.
4 No ijki,
otikintoyaxkatijkej 60 uejueyikalpanmej yejuan onkatkaj ipan iueyitlalpan Argob,
yejuan iyaxka* katka Og irey on ueyitlalpan Basán.
5 Nochi on uejueyikalpanmej kuajli yeualtsakutikatkaj ikan tepantli sanoyej tlakpak,
niman no kipiyayaj uejueyi tsakuilomej niman tepostsatsastin para tlatsakuayaj.
Niman no xteuan otikimpojkej on oksekimej kalpanmej yejuan xyeualtsakutikatkaj ikan tepantli.
6 Otikinchiuilijkej ijkon ken otikchiuilijkej Sehón rey de Hesbón.
Otikinxoxotonijkej nochimej iuejueyikalpanuan,
niman otikinmiktijkej nochimej on tlakamej,
siuamej niman kokonej.
7 San otikintoyaxkatijkej iminyolkauan,
niman nochi on tlajtlamach* yejuan patioj de totlauelikniuan.
8 ’Ijkon tej,
ipan on tonaltin otikintoyaxkatijkej nochi on uejueyitlalpantin de on omemej reyes amorreos yejuan chantiyaj itech on río Jordán,
kampaka ikisayan tonaltsintli.
Otikintoyaxkatijkej on uejueyitlalpantin desde itech on río Arnón hasta on tepetl Hermón.
9 (On tepetl Hermón,
on sidonios kitokayotiaya Sirión,
niman on amorreos kitokayotiayaj Senir.)
10 Otikintoyaxkatijkej nochi on uejueyikalpanmej ipan on ixtlauatl,
on ueyitlalpan Galaad niman Basán hasta on uejueyikalpanmej Salca niman Edrei.
On uejueyikalpanmej iyaxka* katka on rey Og de Basán.
11 ’On rey Og sa iselti nokauaya de on uejueyi tlakamej yejuan imintoka refaitas.
Itepostlapech on rey Og katka naui metro uan tlajko ika ueyak niman ome metro ika patlauak.
On tepostlapechtli sanken* onkaj ipan on ueyikalpan Rabá,
ipan intlalpan on amonitas.
Ome tribu* uan tlajko onokajkej itech on río Jordán kampaka ikisiyan tonaltsintli
12 ’Ipan on tonaltin ijkuak ye kuajli yotiktoyaxkatijkaj on tlajli,
onikmakak itribu* Rubén niman itribu* Gad,
on tlajli yejuan ompejtok desde Aroer ipan on río Arnón,
hasta tlajkotipan on tepemej de Galaad iuan nochi iuejueyikalpanuan.
13 On itlajkotribu* Manasés onikmakak on okse tlajkotipan tlajli de on tepemej de Galaad,
niman onikmakak nochi on iueyitlalpan Basán kampa tlamandarouaya on rey Og.
Niman nochi iueyitlalpan Argob yejuan onkakta ipan on iueyitlalpan Basán,
kitokayotiayaj iminueyitlalpan on refaítas.
In kijtosneki iminueyitlalpan on uejueyi tlakamej.
14 Jair,
iuejkakoneu* Manasés,
okinotilanilij nochi on región de Argob hasta kampa iuan nonamiki on tlajli de Gesur niman de Maaca.
Niman hasta aman Basán no kitokayotiaj Havot-jair.
15 On tlajli de Galaad onikmaktilij Maquir.
16 Niman on tribus de Rubén niman Gad,
onikinmakak on tlajli yejuan peua itech Galaad niman panoua hasta on río Arnón.
Kampaka sur,
on tlajli tlantoya itlajkotian on ixtlauatl,
niman ajsitoya hasta on río Jaboc kampaka norte ika kampa nonamikiyaj iminuan on amonitas.
17 Kampaka ikalakiyan tonaltsintli,
imintlal nonamikiya iuan on río Jordán,
desde ipeuyan on ananko Cineret kampaka norte ika,
hasta itech on mar Arabá yejuan no itoka Mar Muerto kampaka ikisayan tonaltsintli.
Ompa nonamikiya iuan itsintlan on tepetl Pisga.
18 ’Ipan on tonajli onemechmakak in tlanauatijli:
‘ToTEKO Dios mechmaktilia in tlajli yejuan onkaj ikisayan tonaltsintli on río Jordan para nemoyaxkatiskej.
Nochimej yejuan uelij tlauijsokij ma kuikan intepos niman ma kinyekanakan inchanejkauan israelitas.
19 Ipan on uejueyikalpanmej yejuan yonemechmakak san nokauaskej on siuamej,
on kokonej niman nochi on miyekej yolkej yejuan nejua nikmatstikaj nenkipiyaj.
20 Xuelis nemokuepaskej ipan on tlajli yejuan yonemechmakak,
hasta ijkuak nemoTEKO Dios yokinmakak nochimej on israelitas kanon noseuiskej,
itech on río Jordán kampaka ikalakiyan on tonaltsintli.
Kemaj,
uelis nemokuepaskej ipan nemotlal yejuan yonenkiselijkej itech on río Jordán kampaka ikisayan tonaltsintli.
21 ’No ijki,
onikijlij Josué:
‘Ika mixtololojuan yotikitak nochi on tlen moTEKO Dios okichiu iuan on omemej reyes.
Niman no ijki kichiuas iuan nochimej on sekimej reyes kampaka tias.
22 Maka xkinmakajsikan pampa moTEKO Dios,
yejua teuijsokis nemopampa.’
ToTEKO xokauilij Moisés ma kalaki Canaán
23 ’Ipan on tonajli onikyemankatlajtlanilij toTEKO niman onikijlij:
24 ’NoTEKO yejuan tikpiya nochi poder,
yotipeu tinechititia moueyilis niman mopoder.
Xnemi okse Dios ipan iluikak,
nion ipan tlaltikpak yejuan uelis kichiuas on tlajtlamach* milagros* yejuan tejua tikchiua.
25 Nimitsiknotlajtlanilia:
‘Xnechkauili ma nikpano on río Jordán para nikitas on kuajli tlajli iuan on kualtsin tepeyoj niman iueyitlalpan Líbano.”
26 ’Pero san nemopampa,
toTEKO okualan nouan,
niman maski oniktlajtlanilij,
xonechkauilij ma nikalaki ipan on tlajli.
Yej onechijlij:
‘¡Ma ijki!
Maka sa más xnechijli on.
27 Xtlejko hasta ikuapan on tepetl Pisga niman xontlacha kampaka norte,
kampaka sur,
kampaka ikisayan tonaltsintli niman kampaka ikalakiyan tonaltsintli.
Xkonta on kuajli tlajli pampa on río Jordán xuelis tikpanos.
28 Xnauati Josué niman xyolchikaua pampa yejua kinyekanas on israelitas para kalakiskej ipan on tlajli.
Niman yejua kinmaktilis on kuajli tlajli yejuan tejua tikitas.’
29 ’Niman otitokajkej ipan on ixtlauatl ixpan Bet-peor.