Itribu* Rubén niman itribu* Gad okiselijkej imintlal
32
Itribu* Rubén niman itribu* Gad kimpiyayaj sanoyej miyekej yolkej.
Ijkuak okitakej ika on ueyitlalpanmej Jazer niman Galaad sanoyej kuajli katkaj para inyolkauan,
2 oyajkej okitatoj Moisés,
on tiopixki Eleazar,
niman intlayekankauan on israelitas.
Niman ijkin okinmijlijkej:
3 —Xkitakan:
nochi in regiones de Atarot,
Dibón,
Jazer,
Nimra,
Hesbón,
Eleale,
Sebam,
Nebo niman Beón
4 toTEKO okitekuilij para on israelitas.
In tlaltin sanoyej kuajkualtin para yolkej,
niman tejuamej timotekitkauan tikimpiyaj miyekej yolkej.
5 Tla tikita kuajli,
xtechmaka tejuamej on ueyitlajli,
niman maka xtechpanolti ipan on río Jordán.
6 Pero Moisés okinnankilij:
—¿Nemejuamej nenkinekij nemokauaskej nikan chika nemokniuan israelitas yauij ipan guerra?
7 ¿Tline nenkinyolmajxalosnekij on israelitas para maka ma panokan ipan on ueyitlalpan yejuan toTEKO yokinmakak?
8 Ijkon okichijkej nemotajuan ijkuak onikintitlan desde Cades-barnea para ma ichtakatlajtlachatij ipan on ueyitlalpan.
9 Oajsikej hasta ipan on ixtlauatl,
Escol niman kuajli okijitakej on tlajli.
Niman sakin*,
okinyolmajxalojkej on israelitas para maka ma kalakikan ipan on país yejuan toTEKO yokinmakak.
10 Yejua ika,
toTEKO sanoyej okualan ipan on tonajli,
niman ijkin onotlajtolmakak ika itokatsin:
11 “On tlakamej yejuan okiskej Egipto,
yejuan kipiyaj sempoajli xipan para tlakpak,
xkalakiskej ipan on tlajli yejuan onikprometerouilij Abraham,
Isaac niman Jacob,
pampa xonechneltokakej niman xonechtlamatkej* ika nochi iminyojlo.
12 San uelis kalakis Caleb itelpoch Jefone on cenezeo,
niman Josué itelpoch Nun,
pampa yejuamej onechneltokakej niman onechtlakamatkej iminTEKO ika nochi iminyojlo.”
13 ToTEKO sanoyej okualan iminuan on israelitas niman okinchiualtij ma nejnentinemikan ipan on xalpatlajkan 40 xipan,
hasta kaman omikkej nochimej on yejuan sanoyej okualanijkej toTEKO ika iminxompayejyeualis.
14 Niman aman nemejuamej,
tekoneuan intech on tlajtlakolejkej tatajtin,
no nenkinekij nenkichiuaskej on tlen xkuajli ken okichijkej nemotajuan.
Niman aman ijkon oksejpa nenkualanisnekij toTEKO para kualanis iminuan on israelitas.
15 Tla nemejuamej xnenkinekij nenkineltokaskej niman nenkitlakamatiskej toTEKO,
yejua kichiuas para nochimej on israelitas más ma uejkauikan ipan in xalpatlajkan.
Ijkon tej,
nemejuamej nenkipiyaskej tlajtlakojli ipampa inmikilis.
16 Kemaj okinisiuijkej Moisés niman okijlijkej:
—In yejua on tlen tejuamej tiknekij tikchiuaskej:
Achtoj tikchijchiuaskej incorral toyolkauan,
niman kalpanmej para tofamilias.
17 Kemaj tiktiskej totepos niman tikinyekanaskej on oksekimej israelitas hasta kaman kiselia itlal cada se.
Pero chika tiauij,
tofamilias nokauaskej nikan ipan in uejueyikalpanmej yejuan kuajli tsakutiaskej ikan tepantli para xitlaj* kinchiuiliskej on tlakamej yejuan chantij nanika nisiu.
18 Tejuamej xtitokuepaskej tochan hasta ijkuak nochimej on israelitas yokiselijkej imintlal.
19 Pero tejuamej xtikseliskej itlaj tlajli iminuan ne lado de on río Jordán,
tla yotikselijkej nikan ipan in lado.
20 Niman Moisés okiminankilij:
—Tla melauak nenkichiuaskej on tlen nenkijtouaj,
niman nemochimej* nenyaskej ikan nemotepos ipan on guerra ijkuak toTEKO tlanauatis,
21 niman nenkipanoskej on río Jordán ken toTEKO tlanauatia,
niman nemokauaj ompa hasta ijkuak toTEKO tlamis kinkixtis nochimej itlauelikniuan,
22 tla ijkon,
ijkuak toTEKO yokitekuilij on tlajli,
uelis nenmokuepaskej ipan nemotlal,
pampa yonenkichijkej nochi on tlen onenkijtojkej ixpan toTEKO,
niman inmixpan on israelitas.
Niman in tlajli nemoyaxka* yes ixpan toTEKO.
23 Pero tla xnenkichiuaj nochi on tlen yonenkijtojkej,
tlami xmatikan ika nenkipiyaskej tlajtlakojli itech toTEKO,
niman ika se tonajli mechajsis sen castigo ipampa on tlajtlakojli.
24 Xkinchijchiuakan tej,
uejueyikalpanmej para nemofamilias,
niman corrales para nemoyolkauan,
pero xchiuakan on tlen yonenkijtojkej.
25 On itribu* Rubén niman on itribu* Gad okinankilijkej:
—Tejuamej motekitkauan tikchiuaskej nochi on tlen yotitechnauatij.
26 Tokoneuan niman tosiuauan,
iuan nochi toyolkauan nokauaskej nikan ipan in uejueyikalpanmej de Galaad.
27 Pero tejuamej motekitkauan tiaskej ikan totepos ipan on guerra ikan itlanauatil toTEKO,
ijkon ken tejua yotitechnauatij.
28 Kemaj Moisés okimakak on tiopixki Eleazar,
Josué niman on tlayekankej ipan cada tribu* de on israelitas in tlanauatiltin:
29 —Tla nochimej on tlakamej de itribu* Gad niman itribu* Rubén panoskej nemouan on río Jordán ika intepos para ontlauijsokiskej ken toTEKO kinnauatia,
hasta ijkuak yonentetlankej ipan on país,
nemejuamej nenkinmakaskej on tlajli de Galaad para inyaxka yes.
30 Pero tla xpanouaj nemouan ikan imintepos,
tla ijkon,
no kiseliskej sen ueyitlalpan nemouan ne ipan Canaán.
31 On itribu* Gad niman on itribu* Rubén otlanankilijkej:
—Tejuamej motekitkauan tikchiuaskej nochi tlen toTEKO tlanauatia.
32 Tipanoskej ikan totepos ipan on tlajli Canaán.
Tiktlakamatiskej on tlen toTEKO technauatia,
pero toyaxka yes on ueyitlalpan yejuan onkaj ipan in lado de in río Jordán kampaka ikisayan tonaltsintli.
33 Ijkon Moisés okinmakak itribu* Gad niman itribu* Rubén niman on tlajkotipan itribu* Manasés yejuan itelpoch José,
on uejueyi tlalpanmej yejuan achtoj inyaxka katka Sehón yejuan iminrey katka on amorreos,
niman Og yejuan rey katka ipan on tlajli Basán.
Okinmakak nochi on uejueyikalpanmej yejuan ompa onkatkaj niman on ueyitlalpan yejuan onkatka inyeualkan.
34 On yejuan itribu* Gad okinkuejkuektlalijkej on uejueyikalpanmej de Dibón,
Atarot,
Aroer,
35 Atarot-sofan,
Jazer,
Jogbeha,
36 Bet-nimra niman Bet-arán.
Okinyeualtsakukej kuajli ikan tepantli niman okinyeualtsakukej iminyolkauan.
37 On yejuan itribu* Rubén okinkuejkuektlalijkej on uejueyikalpanmej Hesbón,
Eleale,
Quiriataim,
38 Nebo,
Baal-meón niman Sibma.
Sekimej de in uejueyikalpanmej okimpatilijkej imintoka,
niman okintokayotikej ken aman imintokaj.
39 Iuejkakoneuan Maquir,
itelpoch Manasés,
okinoyaxkatitoj on tlajli de Galaad,
niman okinkixtijkej on amorreos yejuan ompa nemiyaj.
40 Kemaj Moisés okinmakak iuejkakoneuan Maquir on tlajli Galaad,
niman yejuamej ompa onochantijkej.
41 Jair,
iuejkakoneu* Manasés,
no okinoyaxkatij* keskimej kalpantsitsimej de on amorreos,
niman okintokayotij Havot-jair.
42 Noba iuan oksekimej okinoyaxkatijkej on ueyikalpan Kenat iuan nochi on kalpanmej yejuan nisiu onkatkaj niman iuan nouikayaj,
niman okitokayotij on ueyitlalpan Noba ken yejua itoka.