On israelitas nejnentinemiyaj miyek xipan ipan on xalpatlajkan
2
’Kemaj otitokuepkej,
niman otiajkej ipan on xalpatlajkan ipan on ojtli yejuan yau kampaka onkaj on Mar Rojo,
ijkon ken toTEKO onechnauatij.
Niman miyek tonaltin tikyeualojtinemiyaj on tepemej de Seir.
2 ’Kemaj toTEKO onechijlij:
3 ‘Sanoyej youejkau nenkiyeualojtinemij in tepemej.
Aman xuiyan norte ika,
4 niman xkinmaka in tlanauatijli on israelitas:
Nemejuamej nenpanoskej ipan imintlal iuejkakoneuan Esaú yejuan chantij ipan on tlajli Seir.
Niman yejuamej nemouejkafamilias.
Yejuamej mechmakajsiskej.
Yejua ika,
noneki san kuajlotika xpanokan.
5 Maka nenkinuijsokiskej pampa nejua xnemechmakas nion pitetsin imintlal.
Xnemechmakas pampa on tepemej de Seir inyaxkauan iuejkakoneuan Esaú.
Nejua onikinmakak yejuamej.
6 Nemejuamej nenkintlajtlaniliskej ma mechnamakiltikan tlakuajli niman on atl yejuan nenkoniskej.
7 NemoTEKO Dios omechtiochiu ipan nochi on tlajtlamach* yejuan onenkichijkej.
Omechcuidaroj kampa nenkistinemiyaj ipan on ueyi xalpatlajkan nochi on 40 xipan.
Yejua nemiya nemouan,
niman xitlaj* omechpoloj.
8 ’Otikpanokej imintlal on yejuan ken tikintaj yejuan iuejkakoneuan Esaú yejuan chantij ipan on tlajli Seir.
Otikpanokej on ojtli de Arabá de Elat,
niman de Ezión-guéber.
Kemaj otiajkej ne xalpatlajkan ipan on ojtli yejuan panoua Moab.
9 ’Kemaj toTEKO onechijlij:
‘Maka xkimpajsolokan,
nion maka xkinuijsokikan on Moabitas,
pampa yejuamej iuejkakoneuan Lot,
niman xnemechmakas nion pitentsin imintlal.
Nejua yonikinmakak on tlajli Ar para inyaxka yes.’
10 (Ye uejkaui ipan in tlajli chantiyaj on emitas.
Yejuamej sanoyej uejueyitlakamej niman sanoyej miyekej katkaj.
Yejuamej uejueyimej katkaj ken ikoneuan Anac.
11 Yejuamej kinkuitiayaj uejueyi tlakamej niman intoka katka refaítas,
pero on moabitas kintokayotiayaj emitas.
12 Achtoj ipan on tlajli Seir chantiyaj on horeos,
pero iuejkakoneuan Esaú okinkixtijkej,
ijkon ken on israelitas okinkixtijkej imintlauelikniuan ipan on tlajli yejuan toTEKO yokimaxkatij.)
13 ’Kemaj toTEKO okijtoj:
‘Xnejnemikan niman xpanokan on atlautli itoka Zered.’
Niman kemaj otikpanokej on atlautli.
14 ’Desde ijkuak otikiskej Cades Barnea hasta on tonajli ijkuak otikpanokej on atlautli Zered,
opanok 38 xipan.
Ipan on tonaltin yomikaj nochimej on tlakamej yejuan kipiyayaj sempoajli xipan para tlakpak yejuan ueliyaj tlauijsokiyaj.
Ijkon onochiu ken toTEKO onotlajtolmakaka ika itokatsin.
15 ToTEKO okichiu ikan ipoder para ma mikikan nochimej on tlakamej hasta kaman otlankej.
16 “Ijkuak nochimej yomikej on tlakamej yejuan tlauijsokiyaj,
17 toTEKO onechnots niman onechijlij:
18 ‘Aman nenkipanoskej on tlajli Moab niman nenyaskej para on tlajli itoka Ar.
19 Pero ijkuak nemajsiskej intech on amonitas yejuan no iuejkakoneuan Lot,
maka nenkimpajsoloskej nion maka nenkinuijsokiskej,
pampa xnemechmakas nion pitetsin imintlal yejuan yejuamej yonikinyaxkatij.’
20 ’(In tlajli,
no kixmatiyaj ken imintlal on uejueyi tlakamej intoka refaítas pampa ye uejkaui ompa chantiyaj,
pero on amonitas kinkuitiayaj on tlakamej zomzomeos.
21 In uejueyitlakamej sanoyej miyekej katkaj niman kojtikej katkaj ken iuejkakoneuan on ueyi tlakatl Anac.
Pero toTEKO okintlamij intechkopa on amonitas,
niman kemaj yejuamej onochantijkej ipan on tlajli.
22 ToTEKO sano ijki okichiu ken okichiu iuan iuejkakoneuan Esaú yejuan chantiyaj ipan on tlajli Seir.
Intechkopa okinkixtijkej on horeos,
niman iuejkakoneuan Esaú ompa onochantijkej hasta aman.
23 No ijki,
impan onochiu on heveos yejuan chantiyaj ipan on kalpanmej hasta Gaza.
Oualajkej on caftoreos de on tlajli Caftor niman okinkixtikej para sakin* yejuamej ompa onokajkej niman onochantijkej.)
24 ’ToTEKO okijtoj:
‘Xuiyan niman xpanokan on río Arnón.
Nejua nemechmaktilis on amorreo Sehón yejuan rey de Hesbón,
niman ipaís.
Xkalakikan ipan itlal,
xkuijsokikan niman peua xmoyaxkatikan iueyitlalpan.
25 Aman nejua nikchiuas para ma peua mechmakasikan on tlakamej nochiuiyan ipan tlaltikpaktli.
Ijkuak on tlakamej san kakiskej mechteneuaj hasta kuekuetlakaskej ika innemojtil.’
On israelitas okitlankej on rey Sehón
26 ’Desde ipan on xalpatlajkan Cademot,
onikintitlan keskimej tlajtojkej para otlajtotoj san kuajlotika iuan Sehón on rey de Hesbón.
Niman ijkin okijlitoj:
27 ’Xtechkauili ma tipanokan ipan motlal,
san tipanoskej ipan on ueyi ojtli kampa nochimej panouaj.
Nion xtikalakiskej ipan motlal yejuan tlayekmakopa nion tlaopochmakopa.
28 Nochi tlakuajli yejuan tikuaskej niman atl yejuan tikoniskej tiktlaxtlauaskej ika tomin.
San tiknekij xtechkauili ma tipanokan.
29 Xchiua ijkon ken otechkauilijkej iuejkakoneuan Esaú yejuan chantij Seir,
niman on moabitas yejuan chantij Ar.
Ma tiuiyan hasta tikpanoskej on río Jordán niman tajsiskej ipan on kuajli tlajli yejuan toTEKO Dios techmakas.
30 ’Pero Sehón,
irey on ueyitlalpan Hesbón,
xokinek otechkauilij ma tipanokan ipan itlal pampa toTEKO Dios okiyoltechikau.
Ijkin okichiu para ijkon ouel okitlalij on rey ipan nemoma ken aman yokichiu.
31 ’Kemaj toTEKO onechijlij:
Xkitaj,
aman niktlalia ipan nemoma on rey Sehón niman nochi ipaís.
Xpeuakan xmoyaxkatikan nochi ipaís.
32 ’On rey Sehón iuan nochi isoldados otechuijsokiko ne Jahaza,
33 pero toTEKO Dios otechinmaktilij niman otikintlankej yejuamej,
itelpochuan niman nochi isoldados.
34 Niman nochi on uejueyikalpanmej otikintokitskiltijkej,
otikinxoxotonijkej,
niman otikinmiktijkej nochimej on tlakamej,
siuamej niman kokonej.
Xakaj otikajkej yoltikaj.
35 San otikintoyaxkatijkej on yolkej niman nochi on tlajtlamach* yejuan patioj,
on tlen onkatka ipan on uejueyikalpanmej yejuan otikintlankej.
36 ’Desde on ueyikalpan Aroer yejuan nokaua itech on río Arnón,
niman on ueyikalpan yejuan onkaj ipan on ixtlauatl hasta Galaad,
nion se kalpan xouel otechixnamikej,
pampa toTEKO Dios okichiu para nochimej ma tikintlanikan.
37 Pero xotiktoyaxkatijkej intlaluan on amonitas,
on región yejuan onkaj itempan río Jaboc,
on kalpantin yejuan onkaj ipan tepemej niman oksekimej yejuan toTEKO Dios xotechkauilij ma tikinuijsokikan.