On israelitas okitemakakej miyek tlanechikojli
36
’Ijkon tej,
Bezaleel niman Aholiab iuan nochimej on oksekimej tlamachijchijkej yejuan toTEKO okinmakak uelilistli niman kajsikamatilistli para tekitiskej niman kichijchiuaskej on tabernáculo* niman kichijchiuaskej nochi ken toTEKO otlanauatij.”
On israelitas okuajkikej miyek tlanechikojli
2 Moisés okinnots Bezaleel niman Aholiab,
niman nochimej on tlakamej yejuan toTEKO okinmakak uelilistli niman yejuan kinekiyaj ika nochi inyojlo tlapaleuiskej ipan on tabernáculo.
3 Niman Moisés okinmakak nochi on tlajtlamach* yejuan on israelitas okuajkikej para kipeualtiskej kichijchiuaskej on tabernáculo.
Niman mojmostla on israelitas sanken* kuajkitikatkaj tlanechikojli para kitekitiltiskej.
4 Sakin,
nochimej on tlamachijchijkej yejuan tekitiyaj,
okiteltijkej imintekiu,
5 niman okijlitoj Moisés:
“Nochimej kuajkitokej sanoyej miyek tlajtlamach* hasta yopanok on tlen noneki para tikchijchiuaskej nochi yejuan toTEKO otlanauatij.”
6 Yejua ika,
Moisés okinnauatij nochimej on israelitas ipan on campamento,
para on tlakamej niman siuamej maka sa ma kuajkikan más on tlajtlamach* tlanechikojli para on tabernáculo.
Ijkon tej,
okinteltijkej para xokuitlaj okuajkikej.
7 Ijkon otlanauatij pampa ye kipiyayaj sanoyej miyek yejuan kitekitiltiskej niman nesiya ika miyek nokauaskia.
Okichijchijkej on tabernáculo*
8 On tlakamej yejuan toTEKO okinmakak más uelilistli xken on oksekimej okichijchijkej on tabernáculo.
Okichijchijkej ikan majtlaktli cortina de lino tlamalintli,
tela yejuan morada,
azul,
niman chichiltik.
Niman okichijchiuilijkej kualtsin ikpanepanojli kampa okixneskayotijkej omemej ángeles intoka querubines*.
9 Cada se cortina kipiyaya majtlaktli uan ome metro uan tlajko ika ueyak,
niman ome metro ika patlauak.
Nochi san se medida kipiyayaj.
10 Okintlajtlakechilijkej makuijli cortina san sekan se iuan okse niman on okse makuijli no ijki okintlajtlakechilijkej.
11 Kemaj okitlalilijkej imekayotsitsiuan kojkoyonkej,
yejuan tlapajlojkej katkaj azul itenko on achtoj tlajtlakechilijli cortina,
niman ipan itenko on okse tlajtlakechilijli cortina,
no okintlalilijkej on mekayotsitsimej kojkoyonkej.
12 Para on achtoj makuijli tlajtlakechilijli cortina,
okitlalilijkej 50 imekayotsitsiuan kojkoyonkej niman para on okse makuijli tlajtlakechilijli cortina no okitlalilijkej 50 imekayotsitsiuan kojkoyonkej.
Ijkon tej,
on mekayotstsimej kojkoyonkej onokajkej imelajkan se iuan okse para on ome cortina onixnamikej.
13 No ijki,
okichijchijkej 50 teposchijkoltsitsimej de oro para ika okintlajtlakechilijkej imekayotsitsiuan kojkoyonkej on achtoj cortina iuan on okse para ouajnochiu san se ueyak.
On cortinas para ikuapan on tabernáculo
14 Bezaleel no okichijchiu majtlaktli uan se cortina ika intsojmiyo chivos para okitlalilijkej ikuatsaka on tabernáculo.
15 Cada cortina ueyak katka 13 metro uan tlajko,
niman ome metro ika patlauak.
Niman nochi on cortinas okipix san se medida.
16 Okitlakechilijkej makuijli cortina san seknek,
niman oksekan no okitlakechilijkej okse chikuasen cortina.
17 Kemaj okitlalilij 50 mekayotsitsimej kojkoyonkej ipan itenko sen cortina yejuan achtoj okintlajtlakechilij.
Niman kemaj on okse cortina yejuan no okintlajtlakechilij,
no ijki okinchijchiuilij okse 50 mekayotsitsimej.
18 No ijki,
okinchijchiuilij 50 teposchijkoltsitsimej de bronce para ika okitsojtsonuilijkej imekayotsitsiuan kojkoyonkej on ome cortina para itsaka on tabernáculo* niman ijkon on tabernáculo* san se ueyi ouajnochiu.
19 Bezaleel okichijchiu ome tlanepantli ikuatsaka on tabernáculo.
On achtoj tlanepantli okichijchiu ika inkuetlaxyo* borregos yejuan okitlalilij tlapajli chichiltik.
On ika ome tlanepantli okichijchiu ika kuetlaxtli yejuan más kuajli.
On kaltechtli de kojtsatsastin
20 Kemaj okinchijchiu on kojtsatsastin ika on kojtli* itoka acacia para kinmamanaskej iyeualkan on tabernáculo.
21 Cada kojtsatsastli okipix naui metro uan tlajko ika uejkapan,
niman 65 centímetros ika patlauak.
22 Niman cada kojtsatsastli okamachtlapan inajnakastlan para okinepanojkej iuan okse.
Nochi on kojtsatsastin ijki okinchiuilij.
23 Okinchijchiu 20 kojtsatsastin para okinmaman ipan on kaltechtli kampaka Sur.
24 Niman okichijchiu 40 itsintlatokyo de plata niman okintlalilij intsintlatokyo on kojtsatsastin.
Okitlalilij ome itsintlatokyo cada kojtsatsastli para ipan ijkayaj.
25 Ipan on kaltechtli kampaka norte de on tabernáculo* no okitlalij 20 kojtsatsastli,
26 ika on 40 itsintlatokyo de plata.
Cada kojtsatsastli kipiyaya itsintlan ome itsintlatokyo.
27 Ikuitlapan on tabernáculo* kampaka ikalakiyan tonaltsintli,
okitlalij chikuasen kojtsatsastli.
28 Niman okitlalij okse ome kojtsatsastli ikuitlapan on tabernáculo* ipan cada esquina.
29 In ome kojtsatsastli yejuan onkatkaj ipan on esquinas,
namiktikatkaj tlatsintlan hasta tlakpak kampa salijtikatkaj ika sen anillo.
Ijki okichijkej ika on ome kojtsatsastin ipan on ome esquina.
30 Dese nochi,
onkatka chikueyi kojtsatsastin niman 16 tsintlatoktli de plata yejuan ipan ijkayaj,
ome tsintlatoktli itsintlan cada kojtsatsastli.
On tlapalokojtin
31 Bezaleel no okichijchiu sekimej tlapalokojtin ueueyakej ika on kojtli* de acacia.
Okitlalij makuijli ipan on kojtsatsastin kampa inakastlan on tabernáculo,
32 niman okse makuijli tlapalokojtli okitlalij ipan on oksekan inakastlan,
niman okse makuijli tlapalokojtli okitlalij ipan on kojtsatsastin yejuan okintelkets ikuitlapan on tabernáculo,
kampaka ikalakiyan tonaltsintli.
33 On tlapalokojtli yejuan opanok intlajkotian on kojtsatsastin,
opeu desde se esquina de on tabernáculo* niman opanok hasta on okse esquina.
34 Kemaj okinalauilij oro on kojtsatsastin,
niman okinchijchiu anillos de oro yejuan okintlalij ipan on kojtsatsastin para ijtik okimpanoltij on tlapalokojtin.
Yejuamej on tlapalokojtin no okinalauilij oro.
35 No okichijchiu on yekcortina yejuan kitsakua kampa más tlayekkan.
Okichijchiu ikan tela yejuan morada,
azul,
chichiltik niman ikan tela itoka lino yejuan más kuajli.
Ipan on yekcortina okixneskayotij ikan ikpanepanojli omemej ángeles intoka querubines*.
36 Kemaj okichijchiu naui kuamantli de on kojtli* acacia para okipiloj on yekcortina,
niman okalauilij oro.
Kemaj okichijchiu naui teposchijkoltsitsimej de oro,
niman naui tsintlatoktli de plata.
On cortina para ikalakiyan on tabernáculo
37 Para ikalakiyan on tabernáculo,
okichijchiu sen cortina ika tela yejuan morada,
azul,
chichiltik niman ikan tela itoka lino yejuan tlamalintli.
Okikpanepanojkej kualtsin ikan itlajmachyo.
38 Niman para on cortina,
okichijchiu makuijli kuamantli iuan iteposchijkoltsitsiuan,
niman makuijli itsintlatokyo de bronce.
Inkuatipan on kuamantin niman on ianillos,
okinalauilij oro.